KO ‘ISIKELI 36
36
Ko Hono Tāpuaki‘i ‘e he ‘Otuá ‘a ‘Isileli
1SIINI, Hako‘i-tangata, fai ha palofisai ki he ngaahi mo‘unga ‘o ‘Isileli, pea ke pehē, ‘A e ngaahi mo‘unga ‘o ‘Isileli, fanongo ki he folofola ‘a Sihova. 2Ko e folofola ‘eni ‘a ‘Ātonai Sihova: Ko e me‘a ‘i he lau ‘a e fili kiate koe, Uē! na‘a mo e ngaahi sia ta‘engata kuo hoko ko hotau tofi‘a: 3ko ia, ke ke palofisai, pea te ke pehē, Ko e folofola ‘eni ‘a ‘Ātonai Sihova: Ko e me‘a, ‘io, ko e me‘a ‘i he‘enau ngaohi koe ke lala, mo nau ‘oho u‘u kiate kimoutolu mei he potu kotoa pē, ka mou hoko ai ko e tofi‘a ‘o e toenga ‘o e ngaahi pule‘anga, pea taungalea kiate koe ‘a e tama lau, mo e kakai ‘i he‘enau talanoa: 4ko ia, fanongo ki he folofola ‘a ‘Ātonai Sihova, ‘a e ngaahi mo‘unga ‘o ‘Isileli; Ko e folofola ‘eni ‘a ‘Ātonai Sihova ki he ngaahi mo‘unga mo e ngaahi fo‘i mā‘olunga, ki he ngaahi halanga vai mo e ngaahi tele‘a, pea mo e ngaahi potu ‘oku maumau mo lala; pea ki he ngaahi kolo kuo li‘aki, ‘a ia kuo hoko ko e me‘a ke vetea mo e me‘a ke manukia ‘e he toenga ‘o e ngaahi pule‘anga takatakai–ko ia ko e folofola ‘eni ‘a ‘Ātonai Sihova.
5Ko au ē kuo u lea ‘i he kakaha ‘o ‘eku fua‘a, koe‘uhi ko e toenga ‘o e ngaahi pule‘anga, pea koe‘uhi ko ‘Ītomi kātoa, ‘a ia kuo nau ta‘ofi hoku fonua ko e tofi‘a mo‘onautolu, ‘o fai‘aki ‘a e loto ‘oku fu‘u fiefia, mo e fehi‘a ‘a honau laumālie, koe‘uhi ke tuku atu ia ke vetea.
6Ko ia, ke ke fai ‘a e palofisai ke kau ki he kelekele ‘o ‘Isileli; ‘io, ke ke lea ki he ngaahi mo‘unga, pea ki he ngaahi fo‘i mā‘olunga, pea ki he ngaahi halanga vai, pea ki he ngaahi tele‘a, ‘o pehē, Ko e folofola ‘eni ‘a ‘Ātonai Sihova: Ko au ‘eni kuo u lea ‘i he‘eku fua‘a, pea ‘i he‘eku kakaha, koe‘uhi kuo mou fuesia ‘a e tālalakulaku ‘a e ngaahi pule‘anga: 7ko ia ko e folofola ‘eni ‘a ‘Ātonai Sihova: Ko au ‘eni kuo u hiki hoku nima, ‘Ilo ‘e au ‘oka ‘ikai fua honau fakamaa‘i ‘e he ngaahi pule‘anga ‘oku takatakai kiate kimoutolu. 8Ka ko kimoutolu, si‘i ngaahi mo‘unga ‘o ‘Isileli, te mou fakava‘ava‘a atu, pea te mou fai fua ma‘a hoku kakai ‘Isileli; tala atu, ‘oku vave ‘a e hoko ‘a e ngaahi me‘a ko ia. 9He ko au ‘eni te u fai ma‘amoutolu; ‘io, te u hanga kiate kimoutolu, pea ‘e ngoue‘i kimoutolu, ‘o tōta‘u‘i kimoutolu; 10pea te u fakatokolahi kakai kiate kimoutolu, ‘a e fale kotoa ‘o ‘Isileli, ‘io, hono kotoa pea ‘e nofo‘ia ‘a e ngaahi kolo, pea ‘e langa ‘a e ngaahi potu kuo maumau; 11‘io, te u fakatokolahi kiate kimoutolu ‘a e tangata mo e manu; pea te nau tupu ‘o fua: ‘io, te u ‘ai ke nofo‘ia kimoutolu, ‘o hangē ko homou ngaahi kuonga mu‘a, pea ‘e hulu ‘eku fai lelei kiate kimoutolu ‘i homou ngaahi ‘uluaki taimi: pea te mou ‘ilo ko Sihova au. 12Pea te u ‘ai ke ha‘elea kimoutolu ‘e ha kakai ‘io ‘a hoku kakai ‘Isileli; pea te nau ma‘u koe, pea te ke hoko ko honau tofi‘a, pea ‘e ‘ikai te ke toe faka-ta‘e-ha-fānau kinautolu.
13Ko e folofola ‘eni ‘a ‘Ātonai Sihova: Ko e me‘a ‘i he‘enau lau kiate kimoutolu, Tu ko e fonua keina kakai koe, pea kuo ke ngaohi ho pule‘anga ke ta‘e-ha-fānau: 14ko ia ‘e ‘ikai te ke toe keina kakai, pea ‘e ‘ikai te ke toe faka-ta‘e-ha-fānau ho pule‘anga–ko ‘Ātonai Sihova ia mei he Ta‘ehāmai. 15‘E ‘ikai te u toe ‘ai ke ongo mai ‘a e taukae ‘a e ngaahi pule‘anga, pea ko e manuki ‘a e ngaahi kakai ‘e ‘ikai te ke toe fua, pea ‘e ‘ikai te ke toe fakahumu ha pule‘anga–ko ‘Ātonai Sihova ia mei he Ta‘ehāmai.
Ko e Mo‘ui Fo‘ou ‘a ‘Isilelí
16Pea hoko ‘a e folofola ‘a Sihova kiate au, ‘o pehē, 17Hako‘i-tangata, na‘e nofo ‘a e fale ‘o ‘Isileli ‘i honau kelekele, pea nau ‘uli‘i ia ‘aki honau ‘alunga mo ‘enau ngaahi fai anga: hangē ko e fakalielia ‘a ha fefine kuo mavahe,#36.17 kuo mavahé; ‘Oku ngali tonu ‘a hono hiki ‘o e faka-Hepeluú ‘o: ‘i he‘ene puke fakamāhiná. ‘Oku makatu‘unga ‘a e lau ko ení ‘i he Lao ‘a Mōsesé ‘ia Lev 15.19, ‘a ia ko e fakakaukau ‘o pehē ‘oku ‘i ai e ngaahi fa‘ahinga ‘uli tokua ‘a ia ka lave ia ki hoto sinó pea tapu leva ke te kau ‘i ha ma‘unga kelesi. na‘e pehē honau ‘alunga kiate au. 18Ko ia, na‘a ku huhua ‘eku ‘ita kiate kinautolu, koe‘uhi ko e toto kuo nau lilingi ‘i he fonua, pea koe‘uhi kuo nau ‘uli‘i ‘aki ‘enau ngaahi ‘aitoli: pea u veteki kinautolu ‘i he ngaahi pule‘anga, 19pea na‘e tūtuu‘i kinautolu ki he ngaahi fonua: na‘a ku hilifaki honau tautea ke hoa mo honau ‘alunga, mo ‘enau ngaahi fai anga. 20Pea ‘i he‘enau a‘u ki he ngaahi pule‘anga na‘a nau ‘alu ki ai, na‘a nau maumau ‘a e tapu ‘o hoku hingoa; he ko e lau na‘e fai ki ai, Ko e kakai ‘eni ‘a Sihova, pea kuo nau ‘alu atu mei hono fonua. 21Ko ia, na‘a ku mamae ki hoku hingoa tapu, ‘a ia kuo fakalielia‘i ‘e he fale ‘o ‘Isileli ‘i he ngaahi pule‘anga kuo nau a‘u ki ai.
22Ko ia, ke ke lea ki he fale ‘o ‘Isileli, Ko e folofola ‘eni ‘a ‘Ātonai Sihova: Tala‘ehai ‘oku ou ngāue koe‘uhi ko kimoutolu ‘a e fale ‘o ‘Isileli, ka koe‘uhi ko e hingoa tapu ‘o‘oku, ‘a ia kuo mou fakalielia‘i ‘i he ngaahi pule‘anga kuo mou a‘u ki ai. 23Pea te u ‘ai ke tāpuhā hoku hingoa lahi, ‘a ia ‘oku va‘inga‘aki ‘e he ngaahi pule‘anga, ‘a ia kuo mou fakalielia‘i ‘i honau lotolotonga; koe‘uhi ke ‘ilo ‘e he ngaahi pule‘anga ko Sihova au, ‘oka u ka hā tāpuhā ‘iate kimoutolu, ‘o nau sio ki ai–ko ‘Ātonai Sihova ia mei he Ta‘ehāmai. 24He te u to‘o kimoutolu mei he ngaahi pule‘anga, pea te u tānaki kimoutolu mei he ngaahi fonua, pea te u ‘omi kimoutolu ki homou kelekele. 25Pea te u luluku kimoutolu ‘aki ‘a e vai fakama‘a, pea te mou ma‘a: ‘io, te u fakama‘a kimoutolu mei ho‘omou ta‘ema‘a fua pē, pea mei homou ngaahi ‘aitoli kotoa. 26Te u ‘atu foki kiate kimoutolu ha loto fo‘ou, pea te u tuku ha laumālie fo‘ou ke huluni ‘iate kimoutolu: pea te u to‘o ‘a e loto maka mei homou kakano, pea te u ‘atu kiate kimoutolu ha loto kakano.#‘Isi 11.19-20 27‘Io, ko e laumālie ‘o‘oku te u tuku ke huluni ‘iate kimoutolu, pea te u ‘ai ke mou fou ‘i he‘eku ngaahi tu‘utu‘uni, pea ke tauhi ‘eku ngaahi kupu‘i konisitūtone, ‘o fai ki ai. 28Pea te mou nofo ‘i he fonua na‘a ku ‘atu ki ho‘omou ngaahi kui; pea te mou nofo mai ko hoku kakai, pea te u nofo atu au ko homou ‘Otua. 29Pea te u fakahaofi kimoutolu mei ho‘omou ta‘ema‘a fua pē: pea te u ui mai ‘a e uite, pea te u ‘ai ke fu‘u lahi ia, pea ‘e ‘ikai te u toe tuku atu ‘a e honge. 30Pea te u ‘ai ke fu‘u lahi ‘a e fua‘i ‘akau, mo e tupu ‘o e ngoue‘anga, koe‘uhi ke ‘oua na‘a tō kiate kimoutolu ‘a e manuki ‘a e ngaahi pule‘anga koe‘uhi ko e honge. 31Pea te mou manatu ki homou ngaahi ‘alunga kovi, mo ho‘omou ngaahi fai anga na‘e ‘ikai lelei; pea te mou fakalili‘a kiate kimoutolu koe‘uhi ko ho‘omou ngaahi kovi, pea koe‘uhi ko ho‘omou ngaahi fakalielia. 32Ke mou ‘ilo mu‘a ‘oku ‘ikai koe‘uhi ko kimoutolu ‘oku ou ngāue–ko ‘Ātonai Sihova ia mei he Ta‘ehāmai: mou mā pē, ‘a e fale ‘o ‘Isileli, pea mou laea koe‘uhi ko homou ngaahi ‘alunga.
33Ko e folofola ‘eni ‘a ‘Ātonai Sihova; ‘I he taimi te u fakama‘a kimoutolu mei ho‘omou ngaahi kovi fua pē, te u toki ‘ai ke nofo‘ia ‘a e ngaahi kolo, pea ‘e langa ‘a e ngaahi potu ‘oku maumau. 34Pea ko e fonua ‘o e lala ‘e ngoue‘i, ‘o ‘ikai hā kiate ia ‘oku laka ange ko e koto lala. 35Pea te nau lau, Ko e fonua ko ē na‘e lala, kuo hoko hangē ko e ngouetapu ko ‘Īteni; pea ko e ngaahi kolo na‘e maumau mo lusa mo have‘i kuo ‘aa‘i mo nofo‘ia. 36Pea ko e ngaahi pule‘anga na‘e toe takatakai kiate kimoutolu te nau ‘ilo, ko au Sihova ‘oku ou langa hake ‘a e ngaahi potu na‘e have‘i, ‘oku ou ngoue‘i ‘a e ngaahi potu na‘e fakalala: ko au Sihova kuo u lea, pea te u fai.
37Ko e folofola ‘eni ‘a ‘Ātonai Sihova: Te u toe tuku ke fai ha huhū kiate au ‘e he fale ‘o ‘Isileli ‘i he me‘a ni, ke u fai ia ma‘anautolu; te u ‘ai honau kakai ke tupu hangē ha tākanga. 38Hangē ko e tākanga me‘a tapu, hangē ko e tākanga ‘i Selusalema ‘i he ngaahi kātoanga, ‘e pehē ‘a e ngaahi kolo na‘e koto maumau, te nau fonu ‘i he ngaahi tākanga ‘a kakai: pea te nau ‘ilo ko Sihova au.
Currently Selected:
KO ‘ISIKELI 36: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
