KO ‘ISIKELI 38
38
Ko Hano Me‘angāue‘aki ‘e he ‘Otuá ‘a Koki
1PEA na‘e hoko ‘a e folofola ‘a Sihova kiate au, ‘o pehē, 2Hako‘i-tangata, ‘ai ho mata kia Koki ‘o e fonua ko Mēkoki, ko e ‘eiki ‘o Losi, Mēseke, mo Tūpale, pea ke fai ha palofisai ki ai.#Fkhā 20.8 3Pea te ke pehē ki ai, Ko e folofola ‘eni ‘a ‘Ātonai Sihova: Ko au ‘eni te u fai mo koe, ‘e Koki, ‘eiki ‘o Losi, Mēseke, mo Tūpale: 4pea te u hele ‘aki koe, pea te u ‘ai ha ngaahi māta‘u ki ho kaungao, pea te u fakahū koe ki tu‘a, mo ho‘o fu‘u hōsitē foki, ‘a e hoosi mo e tau heka hoosi, kuo kofu fungani honau kotoa, ko e fu‘u fakataha ‘oku nau ma‘u ‘a e fakaū mo e pā, ‘oku nau to‘o heletā kotoa pē; 5ko e Pēsia, ko e Kusa,#38.5 Kusa; Ko ‘Itiopea ia. Vakai ki he “Ngaahi Huluhulu”. mo e Futi,#38.5 Futi; Ko Līpia ia. Vakai ki he “Ngaahi Huluhulu”. ‘oku ō mo kinautolu, ‘oku nau fakapā kotoa pē mo ‘ai tatā tau: 6ko Kōmela mo hono ngaahi vāhenga tau kotoa; fale ‘o Toka‘ama ‘i he tuliki ‘o e noate, mo hono ngaahi vāhenga tau kotoa: ‘ani kakai lahi ‘oku ō mo koe. 7Fai ho‘o teu ke mateu, ‘a koe mo ho‘o fakataha kotoa, ‘a kinautolu kuo fakatahataha mai kiate koe, pea te ke hoko ko honau angi. 8Hili ‘a e ‘aho lahi, ‘e fai ha ‘a‘ahi kiate koe: ‘i he ‘osi ‘a e ngaahi ta‘u te ke ha‘u ki he fonua kuo fakafoki mei he heletā, kuo tānaki mei he ngaahi kakai lahi, te ke ha‘elea ‘a e ngaahi mo‘unga ‘o ‘Isileli, ‘a ia kuo nofo maumau ai pē: ka ko eni kuo fakahū ki tu‘a mei he ngaahi kakai, pea ‘oku nau nofo nonga pē honau kotoa. 9Pea te ke ‘alu hake, ‘o tatau mo e afā ho‘o ha‘u, te ke hangē ha ‘ao ke ‘ufi‘ufi ‘a e fonua, ‘a koe mo ho ngaahi vāhenga tau, pea ‘e ō mo koe ha ngaahi kakai lahi.
10Ko e folofola ‘eni ‘a ‘Ātonai Sihova: ‘e hoko ‘i he ‘aho ko ia ‘a e ‘alu hake ‘a e ngaahi me‘a ‘i ho loto, pea te ke fakakaukau‘i ha fakakaukau kovi: 11‘io, te ke pehē,
Ka u ‘alu hake ki he fonua tuku‘uta,
‘O a‘u ki he kakai nofo noa;
‘A kinautolu ‘oku nofo nonga honau kotoa:
‘Oku nofo ta‘ehanau ‘ā,
‘O ‘ikai hanau songo pe lau matapā;
12Ke u ma‘u ha vete ‘o fa‘ao me‘a–ko e toe ‘ai ho nima ki he ngaahi potu maumau kuo nofo‘ia, pea ki ke kakai kuo tānaki mei he ngaahi pule‘anga, kuo nau ma‘u monumanu mo e koloa, ‘oku nau nofo ‘i he pito ‘o māmani. 13Ko Sipa, mo Tētani, mo e kau mesianiti ‘o Tāsisi, ‘io, ‘a hono manu hau kotoa te nau pehē kiate koe, Ko ho‘o ha‘u koā ke ma‘u ha vete? kuo ke tānaki ho‘o fu‘ufu‘unga kakai ke fa‘ao me‘a? Ko ho‘o fai ke fetuku siliva mo e koula, ke to‘o fanga manu mo e koloa, ke ma‘u ha fu‘u vete?
14Ko ia, ke ke fai ha palofisai, si‘i Hako‘i-tangata, pea ke lea kia Koki, Ko e folofola ‘eni ‘a ‘Ātonai Sihova: ‘Ikai ko ia? ‘i he ‘aho ko ē ka nofo nonga hoku kakai ‘Isileli, te ke ‘ilo ki ai?#38.14 ‘ilo ki ai? Ko hono faka-Hepeluú ia, ka ‘oku pehē ‘i he hiki fuoloa ‘e taha: tuku fononga atu. 15Pea te ke ha‘u mei ho feitu‘u ‘i he tuliki ‘o e tokelau, ‘a koe mo e ngaahi kakai lahi fakataha, ‘oku nau heka hoosi kotoa pē, ko e fu‘ufu‘unga kakai mo e tau lahi. 16Pea te ke ‘alu hake ki hoku kakai ‘Isileli, ke ‘ufi‘ufi ‘a e fonua hangē ha ‘ao; ‘i he faka‘osi ‘o e taimi ‘e hoko, ‘io, te u toki taki koe ki hoku fonua, koe‘uhi ke ‘ilo au ‘e he ngaahi pule‘anga, ‘oka u ka fakatāpuhaa‘i au ‘iate koe, ‘e Koki, ka nau sio ki ai. 17Ko e folofola ‘eni ‘a ‘Ātonai Sihova: Ko koe ia koā na‘e kau ki ai ‘eku lea ‘i he ngaahi taimi mu‘a, ‘o fakafai ‘i he‘eku kau tamaio‘eiki ko e kau palōfita ‘o ‘Isileli, ‘a ia na‘e lahi ta‘u ‘enau palofisai ‘i he ngaahi taimi ko ia, ko e pehē te u ‘omi koe kiate kinautolu?
Ko Hano tautea ‘e he ‘Otuá ‘a Koki
18Pea ko e me‘a ‘e hoko ‘i he taimi ko ia, ‘a e taimi ‘oku ‘alu ai ‘a Koki ki he kelekele ‘o ‘Isileli–ko ‘Ātonai Sihova ia mei he Ta‘ehāmai–‘e toki pupū hake ‘eku ‘ita ‘i hoku ihu. 19‘Io, kuo u lea ‘i he‘eku fua‘a, ‘i he kakaha ‘o ‘eku houhau: ‘Ilo ‘e au kae hoko ‘i he ‘aho ko ia ‘a e tete lahi ki he kelekele ‘o ‘Isileli; 20‘io, ko e ika ‘o e tahi, mo e manupuna ‘o e ‘atā, mo e manu ‘o e vao, mo e ngaahi fa‘ahinga ‘oku totolo ‘i he kelekele, mo e kakai kotoa ‘oku ‘i he funga kelekele, te nau tete ‘i hoku ‘ao; pea ‘e holoki ‘a e ngaahi mo‘unga, pea matule ‘a e ngaahi lilifa, pea holo ki he kelekele ‘a e ngaahi ‘ā kotoa. 21Pea te u ui mai ‘a e heletā ki hoku ngaahi mo‘unga ke fai mo ia#38.21 Pea… mo ia: ‘Oku ‘ikai ke mahino ‘a hono faka-Hepeluú, ka ‘oku pehē ‘i hono hiki fuoloa ‘e taha: Te u fakailifia‘i ‘a Koki ‘aki ha ngaahi fakaevaha kehekehe. –ko ‘Ātonai Sihova ia mei he Ta‘ehāmai: ‘e fepātoosi ‘a e heletā ‘a ē mo ē. 22Pea te u hopo mo ia ‘i he mahaki faka‘auha mo e lingi toto, mo e lōvai mo e ‘uha maka; te u faka‘uha ‘a e afi mo e maka vela kiate ia mo hono ngaahi vāhenga tau, pea mo e ngaahi kakai lahi ‘oku kau mo ia. 23Pea te u ‘ai ke u hā lahi mo tāpuhā; ‘io, te u ‘ai ke u ‘ilonga ‘i he vakai ‘a e ngaahi pule‘anga lahi; pea te nau ‘ilo ko Sihova au.
Currently Selected:
KO ‘ISIKELI 38: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
