KO ‘ISIKELI 30
30
‘E Tautea ‘e Sihova ‘a ‘Isipite
1PEA na‘e hoko ‘a e folofola ‘a Sihova kiate au, ‘o pehē, 2Hako‘i-tangata, ke ke fai ha palofisai, mo ke pehē, Ko e folofola ‘eni ‘a ‘Ātonai Sihova: Ofa‘aki ‘a e ‘oiauē, ‘Oi, ‘a e ‘aho na! 3He ‘oku ofi ‘a e ‘aho, ‘oku ofi ‘a e ‘aho ‘o Sihova, ko e ‘aho ‘ao‘aofia; ko e taimi ia ‘o e ngaahi pule‘anga. 4Pea ‘e hoko ‘a e heletā ki ‘Isipite, pea ‘e ai ha fu‘u mamahi ‘i ‘Itiopea,#30.4 ‘Itiopea; Vakai ki he “Ngaahi Huluhulu”. ‘oka tō ‘i ‘Isipite ‘a e kakai kuo tāmatea; pea te nau ‘ave hono uōuōtu‘u, pea ‘oku maumau hono ngaahi tu‘unga.
5Ko ‘Itiopea,#30.5 ‘Itiopea; Vakai ki he “Ngaahi Huluhulu”. mo Futi, mo Luti, mo e ngaahi fa‘ahinga ‘oku fefiofi mo e Lupi,#30.5 Lupi, pe ko Kupi. mo e kainanga ‘o e fonua ‘o e kovinānite, te nau tō ‘i he heletā fakataha mo e fa‘ahinga ko ē.
6Ko e folofola ‘eni ‘a Sihova: Pea ‘e tō ‘a e kau pukepuke ‘o ‘Isipite, pea ‘e holo hifo ‘a e ivi ‘oku nau pōlepole ai: te nau tō ai ‘i he heletā mei Mikitoli ki Suene: ko e folofola ia ‘a ‘Ātonai Sihova. 7Pea te nau nofo maumau ‘i he lotolotonga ‘o e ngaahi fonua kuo maumau, pea ko hono ngaahi kolo te nau lotolotoi ‘i he ngaahi kolo kuo lala. 8Pea te nau ‘ilo ko Sihova au, ‘oka u ka ‘ai ha afi ki ‘Isipite, pea kuo maumau ‘a kinautolu kotoa ‘oku tokoni ki ai.
9‘I he ‘aho ko ia ‘e ‘alu atu meiate au ha kau talafekau ‘i he ngaahi vaka, ke fakatete‘i ‘a e kau ‘Itiopea#30.9 ‘Itiopea; Vakai ki he “Ngaahi Huluhulu”. falalanoa: pea ‘e ‘iate kinautolu ha fu‘u mamahi, hangē ko e ‘aho ko ē ‘o ‘Isipite–tala atu ko ena ia ‘oku ha‘u.
10Ko e folofola ‘eni ‘a ‘Ātonai Sihova: Pea te u ‘ai ke tuku ‘a e uōuōtu‘u ‘o ‘Isipite, ‘o u fakafai ‘ia Nepukanesa Tu‘i Pāpilone. 11Ko e toko taha ko ia fakataha mo ‘ene kakai, ko e fa‘ahinga fakamālohi ‘i he ngaahi pule‘anga, ‘e ‘omi kinautolu ke faka‘auha ‘a e fonua ko ē; pea te nau unuhi ‘enau heletā ki ‘Isipite, pea te nau fakafonu ‘a e fonua ‘i he kakai kuo mate tāmate‘i. 12Pea te u ‘ai ke mātu‘u ‘a e ngaahi manga ‘o Naila, pea te u fakatau ‘a e fonua ki he nima ‘o e kakai kovi: pea te u maumau ‘a e fonua mo hono mahu ‘i he ngāue ‘a ha kau muli: ko au Sihova kuo u tala.
13Ko e folofola ‘eni ‘a ‘Ātonai Sihova: Pea te u fakangata ‘a e ngaahi ‘aitoli, pea te u faka‘osi mei Nofi ‘a e ngaahi tamapua; pea ‘e ‘ikai toe ai ha ‘eiki mei he fonua ko ‘Isipite; pea te u ‘ai ha ilifia ki he fonua ko ‘Isipite. 14Pea te u maumau ‘a Patalosi, pea te u ‘ai ha afi ki Soani, pea te u fai ha ngaahi tautea ki Nō. 15Pea te u lilingi ‘eku ‘ita ki Sini, ko e talitau‘anga ‘o ‘Isipite; pea te u tu‘usi ‘a e uōuōtu‘u ‘o Nō. 16‘Io, te u ‘ai ha afi ki ‘Isipite; ‘e mākauua ‘a Sini ‘i he mamahi, pea ‘e hoko ‘a Nō ko e koto movete: pea ko e me‘a ki Nofi ko honau fili ‘e fai ‘aho.#30.16 pea… ‘aho: ‘Oku ‘ikai ke mahino ‘a hono faka-Hepeluú, ka ‘oku pehē ‘i hono hiki fuoloa ‘e taha: pea ‘e lōmekina ‘a e koló. 17Ko e kau talavou ‘o ‘Oni mo Pipeseti te nau tō ‘i heletā: pea ko e fa‘ahinga ko ē te nau ‘alu pōpula. 18Pea ‘i Tapanesi ‘e fakapo‘uli ‘a e ‘aho, ka u ka laiki ai ‘a e ngaahi ‘ioke ‘a ‘Isipite, pea ‘e fakangata ai hono ivi na‘a ne pōlepole ai: ko e me‘a ki he kolo, ‘e ‘ufi‘ufi ia ‘e ha ‘ao, pea ko hono ngaahi kolo ‘uhiki te nau ‘alu pōpula. 19‘Āua, te u fai ‘a e ngaahi tautea ‘i ‘Isipite: pea te nau ‘ilo ko Sihova au.
Ko e Holo ‘a e Mafai ‘o e Tu‘i ‘Isipité
20Pea ‘i hono hongofulu mā taha ta‘u, ‘i he ‘uluaki māhina, mo e ‘aho fitu ‘o e māhina, ‘iloange na‘e hoko ‘a e folofola ‘a Sihova kiate au, ‘o pehē, 21Hako‘i-tangata, kuo u maumau‘i ‘a e nima ‘o Felo Tu‘i ‘Isipite; pea vakai kuo ‘ikai ke ha‘iha‘i ke ‘ai ha ngaahi faito‘o ki ai, pe ‘ai ‘a e lāfosi mōno ha‘iha‘i, ke mālohi ai ke puke ‘a e heletā. 22Ko ia, ko e folofola ‘eni ‘a ‘Ātonai Sihova: Ko au ‘eni te u fai mo Felo Tu‘i ‘Isipite, pea te u maumau hono ongo nima fakatou‘osi, ‘a ia ‘oku mālohi mo ia ‘oku fasi; pea te u ‘ai ke tō ‘a e heletā mei hono nima. 23Pea te u veteki ‘a e kau ‘Isipite ‘i he ngaahi pule‘anga, mo tūtuu‘i kinautolu ‘i he ngaahi fonua. 24Pea te u ‘ai ke mālohi ‘a e ongo nima ‘o e Tu‘i Pāpilone, pea te u ‘ai ki hono nima ‘eku heletā: pea te u fesi‘i ‘a e ongo nima ‘o Felo, pea te ne fai ‘i hono ‘ao ‘a e to‘e ‘a ha taha kuo kafo. 25‘Io, te u pukepuke ‘a e ongo nima ‘o e Tu‘i Pāpilone, ka ko e ongo nima ‘o Felo ‘e tāupe; pea te nau ‘ilo ko Sihova au, ‘oka u ka ‘ai ‘eku heletā ki he nima ‘o e Tu‘i Pāpilone, ke ne mafao ia ki he fonua ko ‘Isipite. 26‘Io, te u veteki ‘a e kau ‘Isipite ‘i he ngaahi pule‘anga, mo tūtuu‘i kinautolu ‘i he ngaahi fonua; pea te nau ‘ilo ko Sihova au.
Currently Selected:
KO ‘ISIKELI 30: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
