KO ‘ISIKELI 29
29
Ko o ha Kikite ki Hano Fakamāu‘i ‘o ‘Isipite
1‘I HE ta‘u ko hono hongofulu, mo e māhina ko hono hongofulu, pea mo hono hongofulu mā ua ‘o e ‘aho ‘i he māhina, na‘e hoko ‘a e folofola ‘a Sihova kiate au, ‘o pehē,#‘Ais 19.1-25; Sel 46.2-26 2Hako‘i-tangata, ‘ai ho mata kia Felo Tu‘i ‘Isipite, pea ke fai ha palofisai kiate ia, pea ki ‘Isipite kātoa. 3Lea, mo ke pehē, Ko e folofola ‘eni ‘a ‘Ātonai Sihova: Ko au ‘eni te u fai mo koe, ‘e Felo Tu‘i ‘Isipite, ‘a e fu‘u tanini ‘oku tokoto na, ‘o huluni ‘i he ngaahi manga ‘o Naila, ‘a ia ‘oku ne lau, “‘Oku ‘o‘oku hoku vaitafe, ‘io, na‘a ku ngaohi ia mo‘oku.”#29.3 na‘á ku… mo‘oku: ‘Oku pehē ‘a hono fakalea ‘i he ngaaahi hiki fuoloa ‘e ni‘ihi, ka ‘oku ngali tonu hono hiki ‘o: na‘á ku ngaohi pē ‘e au au. 4Ko ia te u ‘ai ha ngaahi māta‘u ki ho kaungao, pea te u ngaohi ‘a e ngaahi ika ‘o ho ngaahi vaitafe ke piki ki ho ngaahi ‘uno, pea te u toho koe mei ho ngaahi vaitafe, fakataha mo e ngaahi ika ‘o ho ngaahi vaitafe ‘oku piki ki ho ngaahi ‘uno. 5Pea te u li‘aki noa koe ki he toafa, ‘a koe mo e ika kotoa ‘o ho ngaahi vaitafe: te ke tō ki he funga fonua; ‘e ‘ikai tānaki pe tufi: te u tuku koe ki he manu ‘o e fonua mo e manupuna ‘o e ‘atā ke nau me‘akai ‘aki. 6Pea ‘e ‘ilo ‘e he nofo kotoa ‘o ‘Isipite ko Sihova au.#‘Ais 36.6 Ko e me‘a ‘i he‘enau hoko ko e kaho ‘oku tokotoko ‘aki ‘e he fale ‘o ‘Isileli– 7(ka nau ka puke koe mo ho lau, te ke mafahi, ‘o tatala honau nima kotoa ‘o a‘u ki he uma; ka nau ka faaki kiate koe, ‘oku ke fasi, pea hahaka fu‘u ai honau kongaloto)#29.7 pea hahaka fu‘u ai honau kongalotó: ‘Oku ngali tonu ‘a hono hiki ‘o e faka-Hepeluú ‘o: ‘o kēvekeva tonu honau fo‘i tu‘á, ka ‘oku pehē ‘i he hiki fuoloa ‘e taha: mafilitāmakia honau fo‘i tu‘á. – 8ko ia, ko e folofola ‘eni ‘a ‘Ātonai Sihova: Ko au ‘eni ‘oku ou ‘omi kiate koe ‘a e heletā, pea te u tu‘usi meiate koe ‘a e tangata mo e manu. 9Pea ‘e hoko ‘a e fonua ko ‘Isipite ko e maumau mo e lala; pea te nau ‘ilo ko Sihova au. Ko e me‘a ‘i he‘ene lau, “‘Oku ‘o‘oku ‘a Naila, he ko au na‘a ku ngaohi ia.”
10Ko ia, ko au ‘eni te u fai mo koe, pea mo ho ngaahi manga‘i vaitafe na; pea te u ngaohi ‘a e fonua ko ‘Isipite ko e koto lala ‘o e lala, kuo maumau‘i mei Mikitoli ‘o a‘u ki Suene, ‘o fai atu ki he tafafonua ‘o ‘Itiopea.#29.10 ‘itiopea; Vakai ki he “Ngaahi Huluhulu”. 11‘E ‘ikai laka atu ai ‘a e va‘e ‘o e tangata, pea ‘e ‘ikai laka atu ‘a e va‘e ‘o e manu, pea ‘e ‘ikai nofo‘ia, ‘o fāngofulu ta‘u. 12‘Io, te u ngaohi ‘a e fonua ko ‘Isipite ko e fonua maumau ‘i he lotolotonga ‘o e ngaahi fonua kuo maumau, pea ‘e hoko hono ngaahi kolo ko e koto maumau ‘i he lotolotonga ‘o e ngaahi kolo ‘oku lala, ‘o fāngofulu ta‘u: pea te u veteki ‘a e kau ‘Isipite ‘i he ngaahi pule‘anga, ‘o tūtuu‘i kinautolu ‘i he ngaahi fonua.
13He ko e folofola ‘eni ‘a ‘Ātonai Sihova. Hili ‘a e ta‘u ‘e fāngofulu, te u tānaki ‘a e kau ‘Isipite mei he ngaahi kakai na‘e veteki kinautolu ki ai. 14Pea te u liliu ‘a e pōpula ‘a ‘Isipite, pea te u fakafoki kinautolu ki he fonua ko Patalosi, ki he fonua na‘a nau tutupu ai; pea te nau hoko ‘i he potu ko ia ko e pule‘anga oloolo lalo. 15‘E hoko ia ko e taupotu ‘o e ngaahi pule‘anga oloolo lalo; pea ‘e ‘ikai ke toe mahiki ke fotu ‘i he ngaahi pule‘anga: ‘io, te u fakamingi kinautolu, ke ‘oua te nau toe pule ki he ngaahi pule‘anga. 16Pea ‘e ‘ikai toe hoko ia ko e falala‘anga ‘o e fale ‘o ‘Isileli, ke langa‘i ‘a e manatu ki he‘enau kovi, ‘enau muimui kiate kinautolu: pea te nau ‘ilo ko ‘Ātonai Sihova au.
‘E Ikuna‘i ‘e he Tu‘i ko Nepukanesá ‘a ‘Isipite
17Pea ‘i hono hongofulu mā fitu ta‘u, ‘i he ‘uluaki māhina mo e ‘uluaki ‘aho ‘o e māhina, ‘iloange na‘e hoko ‘a e folofola ‘a Sihova kiate au, ‘o pehē, 18Hako‘i-tangata, ko Nepukanesa Tu‘i Pāpilone na‘a ne tuku ke fai ‘e he‘ene tau ha ngāue lahi ki Taia: na‘e tula ‘a e ‘ulu kotoa pē, pea mafohifohi ‘a e uma kotoa pē: ka tala‘ehai na‘a ne ma‘u ha totongi mei Taia, ‘e ia pe ko ‘ene tau, koe‘uhi ko e ngāue kuo ne fai ki ai. 19Ko ia, ko e folofola ‘eni ‘a ‘Ātonai Sihova: Ko au ‘eni ‘oku ou ‘atu kia Nepukanesa ko e Tu‘i Pāpilone ‘a e fonua ko ‘Isipite; pea te ne ‘ave hono fu‘u kakai, ‘o vete ‘ene koloa, ‘o fa‘ao ‘ene me‘a; pea ‘e hoko ia ko e totongi ki he‘ene tau. 20Kuo u foaki kiate ia ‘a e fonua ko ‘Isipite ko e totongi na‘a ne ngāue ki ai, koe‘uhi na‘a nau ngāue kiate au–ko ‘Ātonai Sihova ia mei he Ta‘ehāmai.
21‘I he ‘aho ko ia te u fakatupu ha nifo ‘i he fale ‘o ‘Isileli, pea te u ‘atu kiate koe ‘a e to‘o ho ngutu ‘i honau lotolotonga; pea te nau ‘ilo ko Sihova au.
Currently Selected:
KO ‘ISIKELI 29: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
