KO ‘ISIKELI 28
28
Ko ha Kikite ki Hano Fakamāu‘i ‘o e Tu‘i Taiá
1PEA na‘e hoko ‘a e folofola ‘a Sihova kiate au, ‘o pehē, 2Hako‘i-tangata, ke ke lea ki he ‘eiki ‘o Taia, ‘o pehē, Ko e folofola ‘eni ‘a ‘Ātonai Sihova: Ko e me‘a ‘i he mahiki ho loto, ‘o ke pehē, “Ko ha ‘otua au; ‘oku ou nofo ‘i ha nofo‘anga faka‘otua ‘i loto tahi;” ‘osi, ko e tangata koe ‘o ‘ikai ko e ‘otua; ka ‘oku ke ‘ai pē ho loto ke hangē ko e finangalo ‘o e ‘Otua– 3tokua ‘oku ke poto hake ‘ia Tāniela;#28.3 Tāniela; pe ko Tānela, (vakai ki he 14.14). ‘oku ‘ikai ha me‘a fufū ‘oku ke ta‘etāea. 4‘I he fai‘aki ho poto, mo ho‘o fakakaukau, kuo ma‘u ho nima, pea kuo ke fokotu‘utu‘u ‘a e siliva mo e koula ‘i ho ngaahi fale koloa. 5‘I ho‘o fai fakapotopoto lahi ‘i he fai ‘o ho‘o fakatau, kuo ke fakalahi ho ivi, pea ‘oku mahiki ho loto koe‘uhi ko ho ivi.
6Ko ia, ko e folofola ‘eni ‘a ‘Ātonai Sihova: Ko e me‘a ‘i ho‘o tuku ho loto, tokua ‘oku tatau mo e finangalo ‘o e ‘Otua; 7ko ia, ko au ‘eni ‘oku ou ‘omi kiate koe ha kau muli, ko e fa‘ahinga fakamālohi ‘i he ngaahi pule‘anga: pea te nau unuhi ‘enau heletā ki he faka‘ofo‘ofa kuo fakatupu ‘e ho poto, pea te nau fakapalakuu‘i ho lāngilangi. 8Te nau ‘ohifo koe ki he luo; pea te ke mate ‘i he fu‘u mate‘anga ‘o e kakai kuo tāmate‘i ‘i he loto moana. 9Te ke momo‘i lau, Ko e ‘otua au, ‘i ho‘o ‘i he ‘ao ‘o ia ‘oku fakapoongi koe? ‘osi ko e tangata koe, ‘o ‘ikai ko e ‘otua, ‘i he nima ‘o ia ‘oku tāmate‘i koe. 10Te ke mate ‘i he mate‘anga ‘o e ta‘ekamu ‘i he nima ‘o ha kau muli: he ko au ia kuo u tala–ko ‘Ātonai Sihova ia mei he Ta‘ehāmai.
Ko e Fakahifo ‘o e Tu‘i Taiá
11Pea hoko ‘a e folofola ‘a Sihova kiate au, ‘o pehē, 12Hako‘i-tangata, ofa‘aki ha tangilāulau ki he Tu‘i Taia, pea ke pehē ki ai: Ko e folofola ‘eni ‘a ‘Ātonai Sihova: Ko koe ko e sila ‘o e kakato na; ko e fonu ‘i he poto, mo e fungani ‘i he faka‘ofo‘ofa. 13Ko ‘Īteni tofu pē na‘a ke ‘i ai, ko ha ngouetapu ‘a e ‘Otua: ‘ilonga ha makakoloa na‘e ‘ufi‘ufi ‘aki koe–ko e sātio, ko e tōpasi, mo e pelili, ko e kalisolaite, ko e maka ‘onike, mo e siasipa, ko e sāfaia, ko e kapukeli, mo e ‘emalata, mo e koula. Na‘e ‘iate koe hao ngaahi nafa, mo hao kau fefine ke fekau;#28.13 Na‘e… fekau: ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: Na‘e ngaohi ia ma‘au. ‘i he ‘aho na‘e ngaohi koe kuo ‘osi teu kinautolu. 14Ko ha selupimi pani ‘oku fakamalumalu;#28.14 Ko ha… fakamalumalu: ‘Oku ‘ikai ke mahino ‘a hono faka-Hepeluú, ka ‘oku pehē ‘i hono hiki fuoloa ‘e taha: Na‘á ku fekau ke tu‘u ai ha ‘āngelo fakailifia ke ne le‘ohi koe. pea na‘a ku ngaohi koe ke pehē: ko ha mo‘unga tapu faka‘otua na‘a ke ‘i ai; na‘a ke hā‘ele ‘i he lotolotonga ‘o e ngaahi maka maama. 15Na‘a ke taka haohaoa pē mei he ‘aho na‘e ngaohi ai koe, ‘o a‘u ki he taimi na‘e ‘ilo ai ‘a e kovi ‘iate koe. 16Ko e me‘a ‘i he lahi ‘o ho‘o fai fakatau na‘a ke fonu loto ‘i he fakamālohi, pea na‘a ke fai angahala: ko ia te u to‘o ho‘o tapu, ‘o hifo mei he mo‘unga faka‘otua; pea te u ‘omi koe mei he lotolotonga ‘o e ngaahi maka maama, si‘i selupimi fakamalumalu, ‘o u maumau‘i koe. 17Kuo mahiki ho loto koe‘uhi ko ho‘o faka‘ofo‘ofa; na‘a ke fakalusa ho poto ‘i he funga ‘o ho lāngilangi: ‘oku ou lī hifo koe ki he kelekele, kuo u tuku koe ‘i he ‘ao ‘o e ngaahi tu‘i, ke nau vakai koe. 18Ko e me‘a ‘i he lahi ho‘o kovi, ‘i he fai ta‘etotonu ho‘o fakatau, kuo ke maumau ai ‘a e tapu ‘o ho ngaahi potu tapu: ko ia kuo u ngaohi ha afi ke ‘alu atu mei ho lotolotonga; ko ia ia te ne keina koe, pea te u liliu koe ko e efuefu ‘i he kelekele; ‘o mamata tonu ki ai ‘a e kakai kotoa ‘oku vakai koe. 19Ko kinautolu fuli pē ‘i he ngaahi kakai ‘oku ‘ilo koe te nau mo‘u tāfu‘ua ‘i he me‘a kuo hoko atu: na‘a ke hoko ko e me‘a fakatupu ilifia, pea te ke ‘ikai ‘o ta‘engata.
Ko ha Kikite ki Hano Fakamāu‘i ‘o Saitoni
20Pea hoko ‘a e folofola ‘a Sihova kiate au, ‘o pehē,#Sioelí 3.4-8; Sāk 9.1-2; Māt 11.21-22; Luk 10.13-14 21Hako‘i-tangata, ‘Ai ho mata ki Saitoni, pea fai ha palofisai ki ai, 22pea ke pehē, Ko e folofola ‘eni ‘a ‘Ātonai Sihova: Ko au ‘eni te u fai mo koe, Saitoni; pea te u lāngilangi‘ia ‘i ho loto kolo: pea te nau ‘ilo ko Sihova au, ‘oka u ka fai ai ha ngaahi tautea, ‘o u hā tāpuhā ‘i ai. 23Pea te u tuku atu ki ai ‘a e mahaki faka‘auha mo e tāmate ‘i hono ngaahi hala; pea ‘e tō ‘i loto kolo ‘a e kakai kuo mate ‘i he heletā, ‘a ia ‘oku hoko kiate ia mei he ngaahi potu takatakai; pea te nau ‘ilo ko Sihova au.
‘E Tāpuaki‘i ‘a ‘Isileli
24Pea ‘e ‘ikai toe ma‘u ‘e he fale ‘o ‘Isileli ha ‘akau vali kona, pe ha talatala huhu mamahi, ‘i he kakai ‘o e tukui feitu‘u takatakai, ‘a ia ‘oku nau fakasīkaka‘i kinautolu; pea te nau ‘ilo ko ‘Ātonai Sihova au.
25Ko e folofola ‘eni ‘a ‘Ātonai Sihova: Ka u ka tānaki ‘a e fale ‘o ‘Isileli mei he ngaahi kakai ‘oku nau nofo movete ki ai, ‘o u hā tāpuhā ‘iate kinautolu ‘i he ‘ao ‘o e ngaahi pule‘anga, te nau toki nofo ‘i honau kelekele, ‘a ia na‘a ku foaki ki he‘eku tamaio‘eiki ko Sēkope. 26Pea te nau nofo nonga ai, pea te nau langa fale, mo tō ngoue vaine, ‘io te nau nofo nonga; ‘oka u ka fai ‘a e ngaahi tautea ki he kakai ‘oku fakasīkaka‘i kinautolu ‘i he ngaahi fa‘ahinga ‘oku nofo takatakai; pea te nau ‘ilo ko Sihova au ko honau ‘Otua.
Currently Selected:
KO ‘ISIKELI 28: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
