KO ‘ISIKELI 27
27
Ko ha Hiva Putu Mo‘o Taia
1PEA na‘e hoko ‘a e folofola ‘a Sihova kiate au, ‘o pehē, 2Siini, Hako‘i-tangata, ofa‘aki ha tangilāulau ki Taia; 3pea te ke pehē ki Taia, Si‘i nofo ‘i he ngaahi hū‘anga ‘o e tahi, si‘i fai fakatau ki he ngaahi kakai ‘i he ngaahi motu lahi, ko e folofola ‘eni ‘a ‘Ātonai Sihova: ‘E Taia, ‘oku ke lau ‘e koe,
Ko e fungani au ‘i he faka‘ofo‘ofa.
4Ko ho tofi‘a ‘oku ‘i loto moana:
Ko ho kau matai kuo nau ‘ai ke kakato ho‘o faka‘ofo‘ofa.
5Ko e paini mei Sēnili na‘a nau fa‘u ‘aki ho lauvaka ‘i tu‘a mo loto;
Na‘a nau to‘o sita mei Lepanoni ke fokotu‘u ho fana.
6Na‘a nau ngaohi ‘aki ho fohe ‘a e ‘oke mei Pēsani:
Ko ho nofo‘a ‘a‘alo nau ngaohi ‘aki ‘a e tasua mei he ngaahi motu ‘o Kītimi, ‘o fonofonolei.
7Ko ho lā ko e tupenu hinehina mei ‘Isipite,
Kuo tuitui fakananivi ke hoko foki ho‘o fuka:
Ko e lanu langi mo e kula po‘upo‘uli mei he ngaahi motu ‘o ‘Ēlisa ko ho falevaka.
8Ko e nofo Saitone mo
‘Āvati ko ho‘o kau ‘a‘alo ia:
Ko ho‘o kau poto, ‘e Taia, na‘e heka ai;
Ko kinautolu ia ho kau toutai.
9Ko e mātu‘a mei Kīpeli, mo ‘ene kau poto na‘e ‘iate koe ke hukihuki mama:
Na‘e ‘iate koe ‘a e ngaahi vaka kātoa ‘o e tahi mo honau ngaahi kauvaka,
Ke fai ho‘o fakatau koloa.
10Ko e Pēsia mo e Luti mo e Futi na‘e ‘i ho‘o tau,
Ko ho‘o kau sōtia:
Na‘a nau tautau ‘a e pā mo e tatā ‘iate koe:
Ko e fa‘ahinga ko ia na‘e mei ai ho kolōlia.
11Ko e ha‘a ‘Āvati, mo ho‘o tau ‘a‘au, ‘oku tu‘u takatakai ki ho funga ‘ā,
Ko e kau to‘a kinautolu ‘i ho ngaahi taua:
Na‘a nau tautau ‘enau ngaahi mahafu ‘i ho ngaahi ‘ā takatakai;
Ko e fa‘ahinga ko ia na‘e kakato ai ho‘o faka‘ofo‘ofa.
12Ko Tāsisi ko si‘i fakatau meiate koe,
Koe‘uhi ko e lahi ‘o ho‘o koloa kehekehe:
Na‘a nau totongi ki he me‘a na‘a ke hifo
‘Aki ‘a e siliva mo e ‘aione mo e tini mo e pulu.
13Ko ‘Iavana, Tūpale, mo Mēseke,
Ko kinautolu ko ho‘o kau fai fakatau;
Na‘a nau totongi ki ho‘o koloa
‘Aki ‘a e kakai mo‘ui,#27.13 pe ‘aki ‘a e laumālie ‘o e kakai. mo e nāunau palasa.
14Ko kinautolu mei he fale ‘o Toka‘ama,
Na‘a nau totongi ki he me‘a na‘a ke hifo
‘Aki ‘a e fanga hoosi mo e hoosi ki he tau,
Pea mo e fanga miuli.
15Ko ha‘a Tētani#27.15 Tētani: Ko hono faka-Hepeluú ia, ka ‘oku pehē ‘i he hiki fuoloa ‘e taha: Lota. ko ho‘o fai fakatau ia,
Na‘e lahi ‘a e ngaahi motu na‘a ke fa‘iteliha ki ai ‘i he fakatau.
Na‘a nau ‘omi mōno totongi
‘a e nifo‘i ‘elefāniti mo e ‘eponī.
16Ko Sīlia ko si‘i fai fakatau meiate koe,
Koe‘uhi ko e lahi ‘o e ngaahi me‘a kuo ke ngaohi:
Na‘a nau totongi ki he me‘a kuo ke hifo ‘aki ‘a e kapukeli,
‘Aki ‘a e kula po‘upo‘uli, mo e me‘a kuo tuitui fakananivi, mo e tupenu mahu‘inga,
Mo e feo kula, mo e makakula koloa.
17Ko Siuta, mo e fonua ‘o ‘Isileli,
Ko ho‘o kau fakatau kinautolu:
Na‘a nau totongi ki ho‘o koloa ‘aki ‘a e uite#27.17 uite: ‘Oku toe ‘i ai mo e ongo fo‘i lea ‘e ua ‘i he faka-Hepeluú ‘a ia ‘oku ‘ikai ke mahino a hono ‘uhingá. ‘o Mīniti mo
Pānaki,#27.17 pe mo e panaki. Mo e honi mo e lolo mo e paame.
18Ko Tāmasikusi ko si‘i fakatau meiate koe
‘a e ngaahi me‘a lahi na‘a ke ngaohi,
Koe‘uhi ko e lahi ho‘o koloa kehekehe:
Na‘a nau totongi ‘aki ‘a e uaine ‘o Keliponi,
Mo e fulufulu‘i sipi hinaekiaki.
19Ko Vētani mo ‘Iavana mei ‘Usali#27.19 ‘Oku fihi. #27.18-19 ‘Oku toe ‘i ai mo e ngaahi fo‘i lea ‘e tolu ‘i he faka-Hepeluú ‘a ia ‘oku ‘ikai ke mahino a hono ‘uhingá.
Na‘a nau totongi ‘aki ‘a e me‘a na‘a ke hifo ‘a e ‘aione tuki:
Ko e kāsia mo e kaho namu kakala
Na‘e ‘i he ngaahi me‘a na‘a ke fakatau.
20Ko Tētani ko si‘o fai fakatau ia
‘I he me‘a fakamolū teuteu.
21Ko ‘Ālepea mo e hou‘eiki kotoa ‘o Keta,
Ko kinautolu na‘a ke fa‘iteliha ki ai ‘i he fakatau:
Ko ‘enau me‘a fakatau mo koe
Ko e fanga lami, mo e sipi tangata, mo e kosi tangata.
22Ko e kau mesianiti ‘o Sipa mo Laama,
Ko kinautolu na‘a nau fakatau meiate koe:
Na‘a nau totongi ki he me‘a na‘a ke hifo
‘Aki ‘a e fungani ‘o e me‘a namu kakala kehekehe,
Pea ‘aki ‘a e makakoloa kehekehe mo e koula.
23Ko Kālana, mo Kane, mo ‘Īteni,
Ko e kau mesianiti ‘o Sipa, ‘Āsuli, Kilimati,
Ko ho‘o kau mesianiti kinautolu:
24Ko e fa‘ahinga ko ia na‘a nau fai fakatau mo koe
‘I he ngaahi me‘a fungani;
Ko e ngaahi pulupulu lanu langi mo tuitui fakananivi,
Mo e ngaahi koloa filo,
Ko e ngaahi afo kuo takai mo fakama‘u,
Ke fai‘aki ho‘o tu‘uaki.#27.24 ‘Oku fihi. ‘Oku hiki ‘e he ni‘ihi: ko e ngaahi puha kofu kuo ngaohi ‘aki ‘a e sita pea ha‘i ‘aki ‘a e afo.
25Ko e ngaahi vaka ‘o Tāsisi ko ho‘o ngaahi kalavana.#Fkhā 18.11-19
Na‘a nau fai ho‘o fakatau:
Ko ia, na‘a ke fu‘u fonu koe,
Mo lāngilangi‘ia ‘i he loto moana.
26Kuo ‘omi koe ‘e ho kau ‘a‘alo ki he vahanoa,
Kuo maumau koe ‘e he matangi hahake ‘i he moana loloto.
27Ko ho‘o koloa, mo ho‘o me‘a kuo fakatau, mo e me‘a ‘oku ke tu‘uaki,
Ko ho‘o ngaahi kauvaka, mo ho‘o kau toutai,
Ko ho‘o kau hukihuki mama, mo ho‘o kau tu‘uaki fakatau,
Mo e kau sōtia kotoa na‘e ‘iate koe,
Mo e fu‘ufu‘unga kakai na‘e heka kiate koe,
Na‘a nau tō kotoa ki loto moana
‘I he ‘aho ‘o ho‘o tu‘utāmaki.
28‘I he ongoonga‘a mai ‘a e kaila ho‘o kau toutai
‘Oku tete ‘a e ngaahi potu ‘i ‘uta.
29Pea ‘oku hifo mei honau ngaahi vaka
‘a e kau ‘a‘alo kātoa;
‘A e kau vaka, ‘a e kau taukei moana kotoa,
‘Oku nau tutu‘u ‘i ‘uta.
30Pea ‘oku nau ‘ai ke maongo atu hanau le‘o
He tēngihia koe;
Pea nau tangi fakamamahi, mo laku efu ki honau ‘ulu,
Pea nau tekefili he efuefu.
31Pea te nau fakatekefua kinautolu koe‘uhi ko koe,
Mo no‘o tauanga‘a;
Pea te nau tēngihia koe kuo mamahi honau loto:
Ko e tangilāulau fakamamahi.
32Pea ‘i he‘enau tangi ‘oku nau ofa‘aki ha tangilāulau ‘iate koe;
‘Io, ‘oku nau fai ho tangilāulau, ‘o pehē, “Ko hai mo Taia,
Ko hai mo si‘i Me‘a kuo maumau ‘i loto moana?”
33‘I he hū mai mei he ngaahi tahi
‘a e ngaahi me‘a kuo ke fakatau,
Na‘a ke fakatopono ‘aki ‘a e ngaahi kakai lahi,
Na‘a ke fakakoloa ‘a e ngaahi tu‘i ‘o māmani
‘Aki ‘a e lahi ‘o ho‘o koloa, mo ho‘o me‘a fakatau.
34Talu ho‘o motu mai mei he ngaahi tahi,
‘O nofo maumau ‘i he takele ‘o e moana,
Mo e tō tekefili ‘iate koe ho‘o me‘a fakatau,
Mo ho‘o fu‘ufu‘unga kakai.
35Ko e nofo kotoa ‘i he ngaahi motu
‘Oku mo‘utāfu‘ua koe‘uhi ko koe;
Pea ‘oku fu‘u līfusia honau ngaahi tu‘i,
‘Oku tete honau mata.
36Ko e kau mesianiti ‘o e ngaahi kakai
Te nau patapatakā, “Na‘a ke hoko ko e me‘a fakatupu ilifia;
Pea te ke ‘ikai ‘o ta‘engata!”
Currently Selected:
KO ‘ISIKELI 27: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
