KO ‘ISIKELI 24
24
Ko e Kulo ‘Ume‘umea
1PEA na‘e hoko ‘a e folofola ‘a Sihova kiate au, ‘i hono hiva ‘o e ta‘u mo hono hongofulu ‘o e māhina mo e ‘aho hongofulu ‘o e māhina, ‘o pehē, 2Hako‘i-tangata, tohi kiate koe ‘a e totonu ‘o e ‘aho ni, ‘a e ‘aho matematē pē ko eni: kuo ‘ohofia ‘a Selusalema ‘e he Tu‘i Pāpilone ‘i he ‘aho matematē pē ko eni.#2 Tu‘i 25.1; Sel 52.4 3Pea ke lea‘aki ha fakatātā ki he fāmili pau‘u na, pea ke pehē kiate kinautolu, Ko e folofola ‘eni ‘a ‘Ātonai Sihova:
Fokotu‘u ‘a e kulo,
Fokotu‘u, pea ke lilingi foki ha vai ki ai:
4Tānaki ki ai ‘a e ngaahi fo‘i kanomate ‘o ē,
‘A e ngaahi ‘inasi mu‘a, ko e tenga mo e uma,
Fakafonu ‘aki ‘a e ngaahi hui fisifisimu‘a;
5To‘o ‘a e lelei ‘o e tākanga,
‘Ai mo e fokotu‘unga fefie#24.5 fefie: ‘Oku ngali tonu ‘a h ono hiki ko iá, ka ‘oku pehē ‘i he ngaahi hiki fuoloa ‘e ni‘ihi: hui.
Koe‘uhi ko e ngaahi hui;
‘Ai ke ne mātu‘aki lili,
Ke moho foki ‘a e ngaahi hui ‘oku ‘i loto.
6Ko ia ko e folofola ‘eni ‘a ‘Ātonai Sihova: ‘Oiauē ‘a e kolo fonu fakapō, ‘a e kulo kuo ‘ume‘umea, pea ko hono ‘ume‘umea ‘oku ‘ikai ke mahu‘i mei ai! ‘A‘au: to‘o mai ‘a e konga takitaha, tala‘ehai kuo fai talotalo ki ai. 7He ‘oku tekefili ‘i loto hono toto; kuo ne tuku ia ki he funga maka molemole; tala‘ehai na‘a ne hua‘i ki he kelekele ke ‘ufi‘ufi ‘aki ‘a e efu. 8Na‘a ku tuku ‘a e toto na‘a ne lilingi ke tō ki he funga maka molemole, ke ‘oua na‘a lava hono ‘ufi‘ufi, koe‘uhi ke langa hake ai ‘a e houhau, ke fai ha sauni.
9Ko ia, ko e folofola ‘eni ‘a ‘Ātonai Sihova:
‘Oiauē ‘a e kolo fakapō!
Ko au foki te u fokotu‘utu‘u ‘a e fefie ki ai.
10‘Ai ke lahi ‘a e fefie,
‘Ai ke kakaha ‘a e afi,
‘Ai ke mohungalaku ‘a e kakano,
Pea ‘ai ke fatu ‘a e supo,
Ke molū mo e hui.#24.10 Pea ‘ai… huí: ‘Oku ‘ikai ke mahino ‘a hono faka-Hepeluú ka ‘oku pehē ‘i he ngaahi hiki fuoloa ‘e ni‘ihi: Haka ke maha ‘a e supó, ‘ai ke ‘osi‘osi ‘a e huí he afí!
11Pea toki fokotu‘u ‘a e nge‘esi kulo ki he funga afi,
Koe‘uhi ke vela,
‘Io, ke vela ‘afu ‘a hono palasa,
Pea ke ma‘a hono ‘uli ‘oku tekefili ‘i loto,
Ke ‘osi‘osingamālie hono ‘ume‘umea.
12Kuo ‘osi ‘ene ngaahi feinga: ka ‘oku ‘ikai ke matanga mei ai hono fu‘u ‘ume‘umea:#24.12 ‘Oku kamata ‘aki ‘a e vēsí ni ‘a e ongo fo‘i lea ‘e ua ‘a ia ‘oku ‘ikai ke mahino hono ‘uhingá. lī ki he afi mo hono ‘ume‘umea. 13‘Oku ‘i ho‘o ta‘ema‘a na ha mousa‘a tautea. Ko e me‘a ‘i he‘eku fakama‘a koe, kae ‘ikai te ke ma‘a ai, ‘e ‘ikai toe fakama‘a koe mei ho ‘uli, kae‘oua ke ‘osiki ‘eku kakaha kiate koe. 14Ko au Sihova kuo u tala ia: ‘oku pau, ‘io, te u fai; ‘e ‘ikai te u momou, pea ‘e ‘ikai te u faka‘atu‘i, pea ‘e ‘ikai te u liliu; te nau fakamaau koe ‘o taau mo ho ngaahi ‘alunga pea mo ho‘o ngaahi fai anga–ko ‘Ātonai Sihova ia mei he Ta‘ehāmai.
Ko e Mate ‘a e Hoa ‘o e Palōfitá
15Pea hoko ‘a e folofola ‘a Sihova kiate au, ‘o pehē, 16Hako‘i-tangata, ko au ‘eni ‘oku ou to‘o meiate koe ‘a e mamana‘anga ‘o ho mata ‘aki ha fo‘i tā: ka ‘e ‘ikai te ke tēngihia, pea ‘e ‘ikai te ke tangi, pea ‘e ‘ikai hao lo‘imata ‘e tō. 17Te ke māpuhoi fakalongo pē; ‘e ‘ikai te ke fai ha tangilāulau koe‘uhi ko e pekia; ‘ai ho tatā, ‘o nono‘o, pea ‘ai sū ki ho va‘e, pea ‘e ‘ikai te ke ‘ufi‘ufi ho kava, pea ‘e ‘ikai te ke kai ‘a e me‘akai ‘oku ‘omi ‘e he kakai.
18Pea ko e pongipongi ia na‘a ku fai ‘eku lea ki he kakai, pea na‘e pekia hoku uaifi efiafi: pea pongipongi hake na‘a ku fai ‘a e me‘a na‘e tu‘utu‘uni mai. 19Pea lea mai kiate au ‘a e kakai ‘ikai te ke tala mai pē ko homau hā ‘ena ‘oku ke fai?
20Pea u tali kiate kinautolu, Kuo hoko kiate au ‘a e folofola ‘a Sihova, ‘o pehē, 21Lea ki he fale ‘o ‘Isileli, Ko e folofola ‘eni ‘a ‘Ātonai Sihova: Ko au ‘eni ‘oku ou ngaohi hoku potu tapu ko e me‘a noa, ‘a ia ko e mālohinga ‘oku mou pōlepole ai, ‘a e mamana‘anga ‘o homou mata, mo e me‘a na‘e ngaue ai homou loto; pea ko ho‘omou fānau tangata mo fānau fefine, ‘a ia na‘a mou tuku li‘aki, te nau tō ‘i he heletā. 22Pea te mou toki fai ‘o hangē ko ‘eku fai; ‘e ‘ikai te mou ‘ufi‘ufi ‘a e kava, pea ko e me‘akai ‘oku ‘omi ‘e he kakai ‘e ‘ikai te mou mama. 23Pea ‘e ‘ai tatā homou ‘ulu, pea ‘ai sū homou va‘e; ‘e ‘ikai te mou tangilāulau, pea ‘e ‘ikai te mou tangi, pea te mou faka‘au‘ausino ‘i ho‘omou ngaahi kovi, pea te mou fetō‘eaki ‘a ē ki hē mo ē ki hē. 24Ko ia ‘e hoko ‘a ‘Isikeli ko e taipe kiate kimoutolu; hangē tofu pē ko ‘ene fai, ‘e pehē ho‘omou fai: ka hoko mai ia, te mou ‘ilo ko ‘Ātonai Sihova au.
25Pea ko e me‘a kiate koe, Hako‘i-tangata, ‘Ikai ‘e hoko ia ‘i he ‘aho ‘oku ou to‘o ai meiate kinautolu honau mālohinga, honau matamatalelei‘anga na‘a nau fiefia ai, ‘a e mamana‘anga ‘o honau mata, mo e me‘a na‘e hu‘u ki ai honau loto, ‘enau fānau tangata mo fānau fefine?– 26‘Ikai ‘e ha‘u ‘i he ‘aho ko ia kiate koe ha taha kuo hao, ke ongoongo ki ho telinga? 27‘I he ‘aho ko ia ‘e to‘o ho ngutu fakataha mo e ngutu ‘o e hola; pea te ke lea, ‘o ‘ikai te ke toe longo: pea te ke hoko ko e taipe kiate kinautolu, ke nau ‘ilo ko Sihova au.
Currently Selected:
KO ‘ISIKELI 24: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
