KO ‘ISIKELI 23
23
Ko e Ongo Tautehina Fefine Fai Angahala
1PEA na‘e hoko ‘a e folofola ‘a Sihova kiate au, ‘o pehē, 2Hako‘i-tangata, na‘e ‘i ai ha ongo fafine na‘e fa‘ē taha. 3Pea na‘a na fai fe‘auaki ‘i ‘Isipite; na‘a na fai fe‘auaki ‘i he‘ena finemui: ko e potu ko ia na‘e fakavili ai hona huhu, ‘io, ko e potu ko ia na‘e ngaohia ai ‘a e mata‘i huhu ‘o ‘ena tāupo‘ou. 4Pea ko hona hingoa ko ‘Ōhola ‘a e lahi, pea ko hono tokoua ko ‘Oholipa.#23.4 ‘Ōhola… ‘Oholipa. Ko e ‘uhinga ‘o e ‘Ōholá ko e ko hono tēniti; pe fai‘anga lotu; ko e ‘uhinga ‘o e ‘Oholipá ko e ko hoku tēnití ‘oku ‘i ai. Pea na‘e faifai pea ‘o‘oku kinaua, pea na‘a na fā‘ele‘i ha fānau tangata mo e fānau fefine. Pea ko e me‘a ki hona hingoa, ko ‘Ōhola ko Samēlia ia, pea ko ‘Oholipa ko Selusalema. 5Pea fai fe‘auaki ‘a ‘Ōhola ‘i hoku funga; pea na‘a ne holi ki hono kau ‘ofa‘anga, ‘io, ki ‘Āsilia ko si‘enau tu‘u ofi mai. 6Si‘enau kofu lanu langi, ko e hou‘eiki kōvana mo e kau pule, ko e kau mānumanumelie kotoa pē, ko e kau heka hoosi kuo heka ki he‘enau hoosi. 7Pea ne foaki ia kiate kinautolu ke fe‘auaki, ki he mānumanumelie ‘o e kau ‘Āsilia, honau kotoa: ‘io, mo ia fuli pē na‘a ne holi ki ai, na‘a ne ‘uli‘i ia ‘aki ‘enau ngaahi ‘aitoli kotoa. 8Pea na‘e ‘ikai te ne tuku ‘ene fe‘auaki na‘e kamata ‘i ‘Isipite; he kuo nau mohe mo ia ‘i he‘ene finemui, pea ko kinautolu na‘e ngaohi ‘a e mata‘i huhu ‘o ‘ene tāupo‘ou: pea kuo nau hua‘i ‘enau fe‘auaki kiate ia. 9Ko ia kuo u tuku ia ki he nima ‘o hono kau ‘ofa‘anga, ki he nima ‘o e kau ‘Āsilia ‘a ia na‘a ne holi ki ai. 10Na‘e tatala ‘e he fa‘ahinga ko ia hono telefua: na‘a nau ‘ave ‘ene kau tama mo ‘ene kau ta‘ahine, pea ko e finemotu‘a na‘a nau tāmate‘i ‘aki ‘a e heletā: pea ne hoko ko e taungalea ki he kau fefine; he kuo nau fakaai hono tautea.
11Pea sio ki ai ‘e hono tokoua ko ‘Oholipa, ‘o ne hulu ‘i he toko taha ko ē he‘ene fai fakalielia ‘ene holi, pea ko ‘ene fe‘auaki na‘e hulu ‘i he fe‘auaki ‘a hono tokoua. 12Na‘a ne holi ki he kau ‘Āsilia, ko e hou‘eiki kōvana mo e kau pule, si‘enau tu‘u ofi mai, si‘enau kofu fungani, ko e kau heka hoosi ‘oku heka ki he‘enau hoosi, ko e kau mānumanumelie honau kotoa. 13Pea u vakai kuo ne ‘uli‘i ia; kuo na ‘alunga taha fakatou‘osi.
14Pea ne mōia atu ‘ene fai fe‘auaki; he na‘a ne mamata ki ha kau tangata kuo vali‘i pe ‘aofi, ko e fakatātā ‘o e kau Kalitia kuo vali kulokula– 15si‘i ngaahi no‘o ‘i honau kongaloto, si‘i ngaahi ao pulepule ‘i honau ‘ulu, ngali ko e kau laulōtaha honau kotoa, tatau mo e ha‘a Pāpilone, ‘a ia ko Kalitia, ko e fonua na‘a nau tutupu ai. 16Pea ne holi kiate kinautolu ‘i he sio ki ai hono mata, ‘o ne tuku atu ha kau talafekau ki ai, ki Kalitia. 17Toki ha‘u ki ai ‘a e ha‘a Pāpilone ki he mohenga ‘ofa‘anga, ‘o nau ‘uli‘i ia ‘aki ‘enau fai fe‘auaki; pea hili hono ‘uli‘i ‘iate kinautolu, na‘a ne fakatalatala meiate kinautolu ‘ene tokanga. 18Pea ‘i he‘ene fakae‘a ‘ene fe‘auaki, mo fakae‘a hono telefua, na‘e toki fakatalatala ‘eku tokanga meiate ia, ‘o hangē ko e fakatalatala ‘eku tokanga mei hono tokoua. 19Pea ne mōia atu ‘ene fai fe‘auaki, ‘i he‘ene manatu ki he taimi ‘o ‘ene finemui, ‘a ia na‘a ne fai pa‘umutu ai ‘i he fonua ‘o ‘Isipite. 20Pea na‘a ne holi ki honau kau tangata muitau, ‘a ia ‘oku hangē ko e ‘asi ‘a kita ni, pea ko ‘enau fai ko e fai ‘a ha hoosi. 21‘Io, na‘a ke kumi ki he mousa‘a ho‘o finemui, ‘a ia na‘e ngaohia ai ‘e he kau ‘Isipite ho mata‘i huhu, koe‘uhi ko e huhu ‘o ho‘o tāupo‘ou.
Ko Hono Fakamāu‘i ‘e he ‘Otuá ‘a e Tehiná
22Ko ia, ‘e ‘Oholipa–ko e folofola ‘eni ‘a ‘Ātonai Sihova–Ko au ‘eni ‘oku ou langa‘i ho kau ‘ofa‘anga, ‘a ia kuo fakatalatala mei ai ho‘o tokanga, ke nau ngaohi koe; pea ‘oku ou ‘omi kinautolu kiate koe mei he potu kotoa pē; 23ko e ha‘a Pāpilone mo e kau Kalitia kotoa, ‘a Pēkoti mo Soa mo Koa;#23.23 ‘Oku hiki ‘e he ni‘ihi: kau pule mo e hou‘eiki mo e nōpele. omi mo ha‘a ‘Āsilia kotoa, ko e kau mānumanumelie, ko e hou‘eiki kōvana mo e kau pule, honau kotoa, ko e kau laulōtaha, mo e kau fakafofonga, ‘oku nau heka hoosi kotoa pē. 24Pea te nau ha‘u kiate koe#23.24 kiate koe: ‘Oku ‘ikai ke mahino ‘a hono faka-Hepeluú, ka ‘oku pehē ‘i hono hiki fuoloa ‘e taha: mei he tokelaú. mo e toki, mo e sāliote, mo e me‘a teka, pea mo e fu‘ufu‘unga kakai; te nau ‘ākilotoa koe ‘aki ‘a e fakaū, mo e pā, mo e tatā tau: pea te u tuku kiate kinautolu ‘a e fakamaau, pea te nau fakamaau koe ‘o taau mo ‘enau lao. 25Pea te u tuku atu ‘eku fua‘a kiate koe, pea te nau fai kakaha kiate koe; te nau hu‘i ho ihu mo ho telinga; pea ko ho toenga ‘e tō ‘i he heletā: ‘e ‘ave ‘e he fa‘ahinga ko ia ho‘o fānau tangata mo fānau fefine, pea ko ho toenga ‘e keina ‘e he afi. 26Pea te nau to‘o ho kofu meiate koe, pea te nau ‘ave ‘a e nāunau na‘a ke teu ‘aki. 27Pea te u ‘ai ke ‘osi ho‘o fai fakamousa‘a, mo ho‘o fai fe‘auaki na‘e kamata ‘i ‘Isipite: ko ia, ‘e ‘ikai te ke tāngaki hake ho mata kiate kinautolu, pea ‘e ‘ikai te ke manatua ‘a ‘Isipite.
28He ko e folofola ‘eni ‘a ‘Ātonai Sihova: Ko au ‘eni ‘oku ou tuku koe ki he nima ‘o e kakai ‘oku ke fehi‘a ki ai, ki he nima ‘o e kakai kuo fakatalatala mei ai ho‘o tokanga: 29pea te nau fai kiate koe mo e fehi‘a, pea te nau ‘ave ‘a e me‘a kotoa kuo ke ma‘u ‘i ho‘o ngāue, pea te nau tuku li‘aki koe ‘oku ke telefua mo molemole: pea ‘e fakae‘a ‘a e fakalielia ‘o ho‘o fe‘auaki, mo ho anga mousa‘a, mo ho‘o fai pa‘umutu. 30‘E fai ‘eni kiate koe, koe‘uhi ko ho‘o tuli ki he ngaahi pule‘anga, ke fe‘auaki mo kinautolu, koe‘uhi kuo ke ‘uli‘i koe ‘aki ‘enau ngaahi ‘aitoli. 31Ko e ‘alunga ‘o ho tokoua kuo ke fou ai; ko ia ‘oku ou ‘atu ki ho nima ‘a e ipu na‘a ne inu ai ‘e ia.
32Ko e folofola ‘eni ‘a ‘Ātonai Sihova: Te ke inu ‘i he ipu ‘a ho tokoua, ‘a e ipu takulokulo mo laulahi; ‘e hoko ia ko e me‘a ke luma‘aki mo taukae‘i, ko e lahi ‘o e me‘a ‘oku ne fakataetae. 33‘E fakafonu koe ‘aki ‘a e kona mo e fakamamahi, ko e ipu ‘a ho tokoua ko Samēlia, ko e ipu fakaka‘anga mo fakalala. 34Pea te ke inumia ia, ‘o mihi ke maha; pea te ke ngau ‘a e ngaahi mafoa‘i ipu, pea te ke hae ‘aki ho ongo huhu: he ko au ia kuo u lea–ko ‘Ātonai Sihova ia mei he Ta‘ehāmai.
35Ko ia, ko e folofola ‘eni ‘a ‘Ātonai Sihova: Ko e me‘a ‘i ho‘o fakangalo‘i au, mo ke sī au ki ho tu‘a, ko ia ko koe foki te ke fua ho mousa‘a mo ho‘o fai pa‘umutu.
Ko Hono Fakamāu‘i ‘e he ‘Otuá ‘a e Ongo Tautehiná Lōua
36Na‘e folofola foki ‘a Sihova kiate au, ‘o pehē, Hako‘i-tangata, ke ke fakamaau ‘a ‘Ōhola mo ‘Oholipa, ‘inē? pe‘i fakahā kiate kinaua ‘ena ngaahi fakalielia. 37He kuo na afe mei he‘ena alafianga, pea ‘oku toto‘ia hona nima, pea kuo na fe‘auaki mo ‘ena ngaahi ‘aitoli; pea ko e fānau na‘a na fā‘ele‘i kiate au kuo na fakalaka atu kiate kinautolu ke keina. 38Mo eni foki kuo nau fai kiate au; na‘a nau ‘uli‘i hoku potu tapu ‘i he ‘aho pē ko ia, pea nau maumau ‘a e tapu ‘o ‘eku ngaahi Sāpate. 39‘Io, na‘a nau tāmate‘i ‘enau fānau ma‘a ‘enau ngaahi ‘aitoli, ka nau ha‘u leva ‘i he ‘aho ko ia ki hoku potu tapu ko e ngaohi ia ko e me‘a noa: ‘io, tala atu, kuo nau fai pehē ‘i hoku loto fale!
40Kae‘uma‘ā, ‘a e me‘a tēpū ni, na‘e ‘alu ‘ena fekau ki he kau tangata ‘oku omi mei he mama‘o; ‘io, na‘e tuku atu ha talafekau ki ai, pea ‘iloange na‘a nau omi; pea ke fai ai ho‘o kaukau, koe‘uhi ko kinautolu; 41na‘a ke polo ho mata, pea ke ‘ai ho teunga; pea ke nofo ki ha sofa lāngilangi‘ia, pea teu ha tēpile ‘i he ‘ao ‘o e sofa, pea ke hilifaki ki ai ‘a e ‘inisēnisi ‘a‘aku, mo e lolo ‘a‘aku. 42Pea ko e ongoonga‘a ‘o e uōuōtu‘u na‘e nonga ai;#23.42 ‘Oku fihi. pea na‘e fakalahi ‘aki ‘a e kau tangata lāuvale, ha kau Sapa#23.42 pe kau inu kava. mei he toafa, ‘a ia na‘a nau ‘ai vesa ‘i honau nima, mo e kalauni lāngilangi ‘i honau ‘ulu. 43Pea u fakakaukau ki he fefine kuo ‘osi hono ivi ki he tango, ko e taimi ni ‘e pa‘umutu ‘a hono pa‘umutu‘anga ‘iate ia; pea te nau ‘alu kiate ia ‘o hangē ko e ‘alu ki ha fefine pa‘umutu:#23.43 ‘Oku ‘ikai ke mahino ‘a e faka-Hepelū ‘o e veesi 42 mo e 43. 44pea na‘e pehē ‘enau ‘alu kia ‘Ōhola mo ‘Oholipa, kuo na fefine pa‘umutu. 45Pea ko ha tu‘unga me‘a faitotonu ko kinautolu ia te nau fakamaau kinaua, ‘o fai ki he tautea ‘o e fefine maumau alafianga, mo e tautea ‘o e fefine lingi toto; he ko e ongo fefine maumau alafianga kinaua, pea ‘oku toto‘ia hona nima.
46He ko e folofola ‘eni ‘a ‘Ātonai Sihova: Te u ‘omi ha fakataha ke fai mo kinaua, pea ‘e tukuange kinaua ke tekatali ‘aki, pea ke vetea. 47Pea ‘e tolomaka‘i kinaua ‘e he fakataha, pea te nau havehave kinaua ‘aki ‘enau heletā; te nau tāmate‘i ‘ena fānau tangata mo fānau fefine, pea te nau tutu hona ngaahi fale ‘aki ‘a e afi. 48Ko ia, te u fakangata ‘a e mousa‘a mei he fonua, ke valokia ai ‘a e fefine kotoa pē, ‘o ‘oua te nau fa‘ifa‘itaki ki ho‘omo mousa‘a na. 49Pea te nau tuku ho‘omo mousa‘a ke tō kiate kimoua, pea te mo fua ‘a e ngaahi hia ‘a ho‘omo ngaahi ‘aitoli: pea te mo ‘ilo ko ‘Ātonai Sihova au.
Currently Selected:
KO ‘ISIKELI 23: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
