KO ‘ISIKELI 25
25
Ko ha Kikite ki Hano Fakamāu‘i ‘o ‘Āmoni
1PEA hoko ‘a e folofola ‘a Sihova kiate au, ‘o pehē,#Sel 49.1-6; ‘Isi 21.28-32; ‘Ēmosi 1.13-15; Sef 2.8-11 2Hako‘i-tangata, ‘ai ho mata ki ha‘a ‘Āmoni, pea fai ha palofisai kiate kinautolu: 3‘io, te ke pehē ki ha‘a ‘Āmoni, Mou fanongo ki he me‘a ‘oku tala ‘e ‘Ātonai Sihova: Ko e folofola ‘eni ‘a ‘Ātonai Sihova; Ko e me‘a ki ho‘o lau ki hoku potu tapu, Mālie, kuo fakapalakuu‘i! pea ke lau ki he kelekele ‘o ‘Isileli, Mālie, kuo fakalala! pea ki he fale ‘o Siuta, Mālie, kuo nau ‘alu pōpula! 4Ko ia, ko au ‘eni ‘oku ou tukuange koe ki ha‘a ‘Ālepea ke nau tofi‘a ‘aki, pea te nau fokotu‘u ‘iate koe honau ngaahi kolo, pea te nau tuku ‘iate koe honau ngaahi nofo‘anga; ko e fa‘ahinga ko ia te nau kai ho ngaahi fua, pea ko e fa‘ahinga ko ia te nau inu ho‘o hu‘akau. 5Pea te u ngaohi ‘a Lapa ko e mālōlō‘anga kāmeli, pea ko ha‘a ‘Āmoni ko e potu ke tokoto ai ‘a e sipi mo e kosi: pea te mou ‘ilo ko Sihova au.
6He ko e folofola ‘eni ‘a ‘Ātonai Sihova: Ko e me‘a ‘i ho‘o pasi nima, mo tūva‘e, pea ke fiefia ‘i he me‘a kuo hoko ki he kelekele ‘o ‘Isileli, ‘o fai‘aki ‘a e fehi‘a kotoa ‘oku ‘i ho loto; 7ko ia, ko au ‘eni ‘oku mafao atu hoku nima kiate koe, pea te u ‘atu koe ki he ngaahi pule‘anga ma‘anau vete: pea te u tu‘usi koe mei he ngaahi kakai, pea te u faka‘auha koe mei ha ngaahi fonua: te u maumau koe, ke ke ‘ilo ko Sihova au.
Ko ha Kikite ki Hano Fakamāu‘i ‘o Moape
8Ko e folofola ‘eni ‘a ‘Ātonai Sihova: Ko e me‘a ‘i he lau ‘e Moape hangē ko Seia,#25.8 ‘i he… Seiá: ‘Oku ngali tonu ‘a hono hiki ‘o e faka-Hepeluú ‘o: ‘i he lau ‘a Moape mo Seia, ka ‘oku pehē ‘i hono ngaahi hiki fuoloa ‘e ni‘ihi: Moape. ‘o pehē, ‘Uē, kuo hoko ‘a e fale ‘o Siuta ‘o hangē ko e pule‘anga kotoa pē!#‘Ais 15.1–16.14; 25.10-11; Sel 48.1-47; ‘Ēmosi 2.1-3; Sef 2.8-11 9ko ia, ko au ‘eni te u to‘o ‘a e tāpuni ‘o e tafa‘aki ‘o Moape, ke ‘atā ‘a e hala ki hono ngaahi kolo, ‘io, ‘o a‘u ki hono ngaahi kolo taupotu, ‘a e teunga ‘o e fonua, ko Pete-Sisimoti, Peali-meoni, ‘o a‘u ki Kiliataimi, 10ki ha‘a ‘Ālepea, ke ua‘aki ‘a ha‘a ‘Āmoni; ‘io, te u tuku ia ke nau tofi‘a ‘aki, koe‘uhi ke ‘oua na‘a manatua ‘a ha‘a ‘Āmoni#25.10 ‘Āmoni: Ko hono faka-Hepeluú ia, ka ‘oku pehē ‘i he hiki fuoloa ‘e taha: Moape. ‘e he ngaahi pule‘anga. 11‘I Moape foki te u fai tautea; pea te nau ‘ilo ko Sihova au.
Ko ha Kikite ki Hano Fakamāu‘i ‘o ‘Ītomi
12Ko e folofola ‘eni ‘a ‘Ātonai Sihova: Ko e me‘a ‘i he fai fakafāsifasi ‘aupito ‘a ‘Ītomi ki he fale ‘o Siuta, pea kuo nau mātu‘aki hia ‘i he fakaai ‘enau fakafāsifasi ki ai:#‘Ais 34.5-17; 63.1-6; Sel 49.7-22; ‘Isi 35.1-15; ‘Ēmosi 1.11-12; ‘Opa 1-14; Mal 1.2-5 13ko ia ko e folofola ‘eni ‘a ‘Ātonai Sihova; Te u mafao atu hoku nima ki ‘Ītomi, pea te u tu‘usi mei ai ‘a e tangata mo e manu: pea te u ngaohi ia ko e lala, mei Tīmani ‘o fai atu; pea te nau tō ‘i he heletā ‘o a‘u ki Tētani. 14‘Io, te u fakaai ‘eku fakafāsifasi ki ‘Ītomi ‘aki ‘a e nima ‘o hoku kakai ‘Isileli; pea te nau fakaai ‘i ‘Ītomi ‘eku ‘ita mo ‘eku kakaha: pea te nau ‘ilo ‘a e sauni ‘oku ou fai–ko ‘Ātonai Sihova ia mei he Ta‘ehāmai.
Ko ha Kikite ki Hano Fakamāu‘i ‘o Filisitia
15Ko e folofola ‘eni ‘a ‘Ātonai Sihova: Ko e me‘a ‘i he fai fakafāsifasi ‘a e kau Filisitia, mo nau fai sauni mo e fehi‘a ‘a honau loto, ko e fie maumau ia ‘aki ‘a e tāufehi‘a ta‘engata:#‘Ais 14.29-31; Sel 47.1-7; Sioelí 3.4-8; ‘Ēmosi 1.6-8; Sef 2.4-7; Sāk 9.5-7 16ko ia ko e folofola ‘eni ‘a ‘Ātonai Sihova: Ko au ‘eni ‘oku ou mafao atu hoku nima ki he kau Filisitia, pea te u tu‘usi ‘a e kau Kēleti, pea te u faka‘auha ‘a e toe nofo ‘i matātahi. 17Pea te u fai kiate kinautolu ha fu‘u sauni ‘aki ‘a e ngaahi tautea faka‘ita; pea te nau ‘ilo ko Sihova au, ‘oka u ka fakaai ‘eku sauni kiate kinautolu.
Currently Selected:
KO ‘ISIKELI 25: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
