KO ‘ISIKELI 22
22
Ko e ngaahi Hia ‘a Selusalema
1PEA na‘e hoko ‘a e folofola ‘a Sihova kiate au, ‘o pehē, 2Siini, Hako‘i-tangata, te ke fakamaau, ‘inē? Te ke fakamaau ‘a e kolo toto‘ia, ‘ō? Pe‘i faka‘ilo ki ai ‘ene ngaahi fu‘u fakalielia. 3Pea te ke pehē: Ko e folofola ‘eni ‘a ‘Ātonai Sihova: ‘a e kolo ‘oku lingi toto, ‘o fai ‘i loto kolo, ko e fakaa‘u mai hono taimi; pea ‘oku ke ngaohi ‘aitoli ke tu‘una ko e fai hono ‘uli‘i! 4Kuo ke hoko ko e halaia koe mei he toto kuo ke lilingi, pea ko e me‘a ‘i ho‘o ngaahi ‘aitoli kuo ke ngaohi kuo ke ‘uli‘i koe; pea kuo ke ‘unuaki mai ho ngaahi ‘aho, ‘io, kuo ke a‘u ki ho ta‘u: ko ia kuo u ngaohi ai koe ko e manukia‘anga ‘o e ngaahi pule‘anga, ko e me‘a ke taukae‘i ‘e he ngaahi fonua kotoa. 5‘E taukae‘i koe ‘e he nofo ofi mai, mo e nofo mama‘o atu, tokua ko e kolo kuo namukū hono hingoa, ko e kolo mohu maveuveu. 6Vakai, ‘oku nofo ‘iate koe ‘a e hou‘eiki nōpele ‘o ‘Isileli, takitaha mo e lahi ‘oku ne lava, koe‘uhi ke lilingi toto. 7‘Oku fai ‘iate koe ‘a e va‘inga‘aki ‘a e tamai mo e fa‘ē; ‘i ho lotolotonga ‘oku nau fai fakamālohi ki he ‘āunofo: ko koe ‘oku nau fakamālohia ai ‘a e tamai mate mo e uitou.#‘Eki 20.12; 22.21-22; Teu 5.16; 24.17 8‘Oku ma‘ama‘a kiate koe ‘eku ngaahi me‘a tapu, pea ‘oku ke maumau ‘a e tapu ‘o ‘eku ngaahi Sāpate.#Lev 19.30; 26.2 9‘Oku nofo ‘iate koe ha kau tangata tukuaki ke lilingi toto: pea ‘oku fai ‘iate koe ‘a e kai ‘i he ngaahi mo‘unga: ‘oku fai ‘i ho lotolotonga ‘a e me‘a mousa‘a. 10‘Oku fai ‘iate koe ‘a e fakatelefua‘i ‘o e tamai: ‘oku fai ‘iate koe ‘a e tohotoho‘i ‘o e fefine ‘oku mavahe ko ‘ene fakakelekele.#Lev 18.7-20 11Pea ko Me‘a kuo ne fai fakalielia mo e uaifi ‘o ha taha kehe; pea ko Me‘a kuo ne ‘uli‘i ‘a e uaifi ‘o hono foha ‘aki ‘ene mousa‘a; pea ko Me‘a kuo ne tohotoho‘i ‘a hono tuofefine, ko e ‘ōfefine ‘o ‘ene tamai, ko e fai ‘iate koe. 12‘Oku fai ‘iate koe ‘a e tali me‘a lavaki ke lilingi toto; ‘oku ke ‘eke hulu mo e toloi, pea ‘oku ke fa‘ao me‘a mei ho kaungā‘api ‘i he fai fakamālohi, ka ko au ‘oku ke fakangalongalo‘i–ko ‘Ātonai Sihova ia mei he Ta‘ehāmai.#‘Eki 22.25; 23.8; Lev 25.36-37; Teu 16.19; 23.19
13Ko ia, vakai, ‘oku ou pasi nima ‘i he fa‘ao me‘a kuo ke fai, pea koe‘uhi ko ho‘o halaia toto ‘a ia ‘oku tekefili ‘i he kolo. 14‘E matu‘uaki ‘e ho loto ‘a e ‘aho ‘o ‘eku fai mo koe? pe mālohi ho nima ki ai? Ko au Sihova kuo u lea, pea te u fai. 15Pea te u veteki koe ‘i he ngaahi pule‘anga, pea te u tūtuu‘i koe ‘i he ngaahi fonua; pea te u mātu‘aki tafi meiate koe ho‘o ta‘ema‘a. 16Pea ‘e mole ho tāpuhā na‘e ma‘u ‘i he vakai ‘a e ngaahi pule‘anga; pea te ke ‘ilo ko Sihova au.
Ko e Kulo Haka Siliva ‘a e ‘Otuá
17Pea hoko ‘a e folofola ‘a Sihova kiate au, ‘o pehē, 18Hako‘i-tangata, kuo hoko kiate au ‘a e fale ‘o ‘Isileli ko e koto efe pē: ko kinautolu kotoa ‘i he loto kulo na ko e koto kapa pē mo e tini mo e ‘aione mo e pulu; kuo nau hoko ko e efe‘i siliva. 19Ko ia, ko e folofola ‘eni ‘a ‘Ātonai Sihova: Ko e me‘a ‘i ho‘omou hoko kotoa ko e efe, ko ia ko au ‘eni ‘oku ou tānaki kimoutolu ‘i loto Selusalema. 20Hangē ko e tānaki ha siliva mo e kapa mo e ‘aione mo e pulu mo e tini, ‘o tuku ‘i he loto kulo ke ifi ‘a e afi ki ai ke fakavai; ‘e pehē ‘eku tānaki kimoutolu ‘i he‘eku ‘ita mo ‘eku kakaha, pea te u tuku kimoutolu ki ai, ‘o fakavai. 21‘Io, te u fakatefua mai kimoutolu, pea te u ifi kiate kimoutolu ‘aki ‘a e afi ‘o ‘eku houhau, pea ‘e fakavai kimoutolu ‘i loto kolo. 22Hangē ‘oku fakavai ha siliva ‘i ha kulo, ‘e pehē ‘a e fakavai kimoutolu ‘i loto kolo; pea te mou ‘ilo ko au Sihova kuo u lilingi ‘eku houhau kiate kimoutolu.
Ko e Fai Angahalá ‘a e Kau Taki ‘o ‘Isilelí
23Pea hoko ‘a e folofola ‘a Sihova kiate au, ‘o pehē, 24Hako‘i-tangata, lea ki he fonua na, Ko e fonua koe ‘oku ‘ikai fakamāmā ki ai, ‘oku ‘ikai ha ‘uha ki ai ‘i he ‘aho ‘o e houhau. 25‘Oku ai ha puleaki ‘a ‘ene kau palōfita#22.25 ‘Oku ai… palōfita: Ko hono faka-Hepeluú ia, ka ‘oku pehē ‘i he hiki fuoloa ‘e taha: Ko e kau taki. ‘i loto fonua, hangē ha laione ‘oku kālou, ‘a ia ‘oku ne hae ‘ene a‘alu: pehē ‘oku nau keina laumālie; ‘oku nau to‘o koloa mo e me‘a mahu‘inga; kuo nau fakatokolahi ‘a e kau uitou ‘i he fonua. 26Ko hono kau taula‘eiki ‘oku nau hae ‘eku lao, pea ‘oku nau va‘inga‘aki ‘eku ngaahi me‘a tapu; ‘oku ‘ikai te nau faikehekehe ki he me‘a ‘oku tapu mo e me‘a ‘oku ngofua, pea kuo ‘ikai te nau tuku ke mahino ki he kakai ‘a e me‘a ‘oku ta‘ema‘a mo ha me‘a ‘oku ma‘a, pea kuo nau hanga kehe mei he‘eku ngaahi Sāpate, pea ‘oku va‘inga‘aki au ‘i honau lotolotonga.#Lev 10.10 27Ko hono hou‘eiki ‘oku nofo holo ai ‘oku nau hangē ha fanga ulofi ‘oku hae ‘enau a‘alu; ko e fai ke lingi toto, ke maumau mo‘ui koe‘uhi ke nau ma‘u koloa ta‘etotonu. 28Pea ko hono kau palōfita ‘oku nau vali lahe kinautolu, ‘enau mata vīsone nge‘esi ma‘anautolu, mo fai ‘a e tongafisi loi; ‘o nau pehē, Ko e folofola ‘eni ‘a ‘Ātonai Sihova; ‘osi, na‘e ‘ikai ha folofola ‘a Sihova ‘e fai.
29Ko e kainanga ‘o e fonua ‘oku nau fai fakamālohi mo kaiha‘a; pea ‘oku nau fakaehaua ‘a e tu‘utāmaki mo e masiva; pea ko si‘i ‘āunofo ‘oku nau fai fakamālohi ki ai, ‘o ta‘etaau mo e konisitūtone. 30Pea kuo u kumi meiate kinautolu ha tangata te ne lava ke fakamā‘opo‘opo ‘a e ‘ā, pe ke tu‘u ‘i he ava ‘o e ‘ā kiate au, ke aofaki ‘a e fonua, ke ta‘ofi ‘eku faka‘auha ia; ka na‘e ‘ikai te u ‘ilo ha taha. 31Ko ia, ‘oku ou lilingi kiate kinautolu ‘eku houhau; ‘oku ou faka‘osi kinautolu ‘i he afi ‘o ‘eku mamahi: ‘oku ou tuku honau ‘alunga ke tō ki honau tumu‘aki–ko ‘Ātonai Sihova ia mei he Ta‘ehāmai.
Currently Selected:
KO ‘ISIKELI 22: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
