KO ‘ISIKELI 21

Ko e heletā ‘a Sihova

1PEA na‘e hoko ‘a e folofola ‘a Sihova kiate au, ‘o pehē, 2Hako‘i-tangata, ‘ai ho mata ke hanga ki Selusalema, pea ke mokulu ha‘o lea ki he ngaahi potu tapu, pea ke fai ha‘o palofisai ki he kelekele ‘o ‘Isileli. 3Pea te ke pehē ki he kelekele ‘o ‘Isileli, Ko e folofola ‘eni ‘a Sihova, Ko au ē ‘oku ou teu fai mo koe, pea te u unuhi ‘eku heletā mei hono ‘ai‘anga, pea te u tu‘usi meiate koe ‘a e faitotonu mo e faihala. 4Ko e me‘a ‘i he‘eku tu‘usi meiate koe ‘a e faitotonu mo e faihala, ko hono ‘uhinga ia ‘e ‘alu atu ai ‘eku heletā mei hono ‘ai‘anga ki he kakano kotoa, mei he tonga ki he tokelau. 5Pea ‘e ‘ilo ‘a e kakano kotoa, ko au Sihova kuo u unuhi ‘eku heletā mei hono ‘ai‘anga: ‘e ‘ikai toe foki ki ai.

6Ko ia, Hako‘i-tangata, ko ho‘o me‘a ke fai, ke ke ‘ai ho‘o fu‘u to‘e; ‘io, ke ke to‘e ‘i honau ‘ao ke motu ho kongaloto, pea ke fai ha fu‘u mamahi. 7Pea ka nau ka pehē kiate koe, Ko e hā ‘oku ke to‘e ai? pea ke ke tali, Koe‘uhi ko e ongoongo ‘oku ha‘u ‘a e me‘a: pea ‘e vai ‘a e loto kotoa, pea tāupe ‘a e nima fua pē, pea fakapo‘uli ‘a e laumālie kotoa, pea mo e tui kotoa ‘e fetafei ‘i he vai; vakai ‘oku ha‘u, ‘io, ‘e hoko–ko ‘Ātonai Sihova ia mei he Ta‘ehāmai.

8Pea hoko ‘a e folofola ‘a Sihova kiate au, ‘o pehē, 9Hako‘i-tangata, ke ke palofisai mo ke pehē,

Ko e folofola ‘eni ‘a ‘Ātonai;

Lea, ‘o pehē,

Ko e heletā ē,

Ko e heletā!

Kuo faka‘alo,

Pea kuo fakangingila foki:

10Kuo faka‘alo,

Koe‘uhi ke ne fai ha fu‘u tāmate;

Kuo fakangingila,

Koe‘uhi ke tapa hangē ko e ‘uhila.

Pea te tau fiefia koā?

‘Oku ta‘etoka‘i ‘e ia ‘a e sēpita ‘o hoku foha,

‘Io, ‘a e ‘akau kotoa.#21.10 ‘Oku fihi ‘aupito ‘a e vēsí ni, pea lahi hono ngaahi hikí.

11‘Io, kuo tuku ia ke fakangingila,

Koe‘uhi ke puke ‘e he nima:

‘Āua, kuo faka‘alo ‘a e heletā,

Pea kuo fakangingila,

Koe‘uhi ke tuku ki he nima ‘o e tama tāmate.

12Hako‘i-tangata, ‘ioho mo ‘oiauē: he kuo hoko ia ki hoku kakai, kuo hoko ia ki he hou‘eiki ‘Isileli kotoa: kuo li‘aki kinautolu ki he heletā fakataha mo hoku kakai: ko ia ke ke sī tenga. 13He ko e sivi ‘oku fai, pea huanoa ‘o kapau foki ‘oku ne ta‘etoka‘i ‘a e sēpita: ‘e ‘ikai kei ‘i ai#21.13 ‘Oku fihi ‘aupito, pea lahi hono ngaahi hikí. –ko ‘Ātonai Sihova ia mei he Ta‘ehāmai.

14Ko ia, Hako‘i-tangata, hanga koe, ‘o palofisai, pea ke pasi nima.

Pea ke hoko ‘a e heletā ‘o lōtolu;

‘A e heletā na‘e veloi ‘aki ‘a e kau tāmatea na;

‘A e heletā na‘e veloi ‘aki ‘a e tāmatea#21.14 tāmatea; ‘Oku ‘ikai ke mahino ‘a hono faka-Hepeluú ka ‘oku pehē ‘i he ngaahi hiki fuoloa ‘e ni‘ihi: fakailifia. na;

‘A e taha lahi ko ia:

‘Isa, ‘oku ne ‘ākilotoa kinautolu;

15Kuo u ‘ai ‘a e heletā faka‘auha#21.15 faka‘auha; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: fakamanamana.

Ki honau ngaahi matanikolo kotoa,

Koe‘uhi ke vai ‘a e loto,

Pea ke fakalahi ai ‘enau ngaahi humu:

Uē! kuo ngaohi ke hangē ko e ‘uhila,

Kuo fakamata ke tāmate‘i;

16Ke ke tūkuingata, Heletā, ki he to‘omata‘u,

‘Ai ho mata ki he to‘ohema;

Ha potu pe kuo tu‘utu‘uni ke sio ho mata ki ai.#21.16 ‘Oku ‘ikai ke mahino ‘a hono faka-Hepelū ‘o e vēsí ni.

17Pea ko au foki te u pasipasi hoku nima, pea te u fakamatematē ‘eku kakaha: ko au Sihova kuo u lea.

Ko e Heletā ‘a e Tu‘i Pāpilone

18Pea hoko ‘a e folofola ‘a Sihova kiate au, ‘o pehē, 19Siini, Hako‘i-tangata, tā ma‘au ha fakatātā, ha ongo hala ki he ha‘u ‘a e heletā ‘a e Tu‘i Pāpilone; ‘e hu‘u ‘a e ongo hala mei ha fonua pē taha: pea te ke tā ha tuhu; te ke tā ‘i he tuliki ‘o e hala ki he kolo. 20Te ke tā ha hala ke fou ai ‘a e heletā ki Lapa Ha‘a ‘Āmoni, pea ki Siuta, ki Selusalema talitau‘anga.#21.20 Te ke… talitau‘anga; ‘Oku ‘ikai ke mahino ‘a hono faka-Hepeluú. 21He ‘oku tu‘u ‘a e Tu‘i Pāpilone ‘i he tefito‘i hala, ‘i he tuliki ‘o e ongo hala, ke fai ‘a e tongafisi: ‘oku ne lulu ‘a e hōfangahau, ‘oku ne huhū ki he telāfimi, ‘oku ne fakasio ki he ‘ate.#21.21 ‘okú ne lulu… ‘ate; Ka teu fai ‘e he kakai ‘e ni‘ihi ‘o ono‘ahó ha tu‘utu‘uni, na‘a nau to‘o ha ‘ū ngahau ‘o laku ki lalo, pea toki vakai ki he anga ‘o e tokoto ‘a e ngahau takitaha ke ‘ilo ai tokua ‘a e me‘a ke fai. 22‘Oku tō ‘a e fakatafe ki Selusalema ‘i hono to‘omata‘u; ko Selusalema ia, ke fokotu‘u ai ‘a e ngaahi sipi tangata, ke foa atu ha ava, ke ofa‘aki ‘a e kaila tau, ke ‘ai sipi tangata ki he ngaahi matanikolo, ke tanu puke, ke langa taua. 23Pea ‘e hā kiate kinautolu ko e nge‘esi tongafisi; tokua na‘e fai kiate kinautolu ‘a e ngaahi fuakava toputapu: ka ‘e fakamanatu ‘e he ‘afio ‘a e kovi ke pō ai kinautolu. 24Ko ia, ko e folofola ‘eni ‘a ‘Ātonai Sihova: Ko e me‘a ‘i ho‘omou ‘ai ke manatua ho‘omou kovi, ‘o tatala ho‘omou ngaahi talangata‘a, ‘o hā ho‘omou ngaahi angahala ‘i ho‘omou ngaahi fai anga fua pē; ‘io, ‘i homou manatua pehē, ‘e pō kimoutolu ‘e he nima.

25Pea ko koe, ‘eiki ‘o ‘Isileli, ‘a e taha kuo kafo, ‘a e taha pau‘u, ‘a ia kuo hoko hono ‘aho ‘i he taimi ‘o e kovi ‘o e faka‘osi; 26ko e folofola ‘eni ‘a ‘Ātonai Sihova: ‘E ‘ave ‘a e tatā, ‘e hiki ‘a e kalauni: ‘e ‘ikai kei peheni ‘a e peheni: ‘e ‘ai ke mā‘olunga ‘a e mā‘ulalo, pea ‘e ‘ai ke mā‘ulalo ‘a e mā‘olunga. 27Te u ngaohi ia ko e koto mafuli-mafuli-MAFULI: na‘a mo e pehē na‘e ‘ikai tu‘u, kae‘oua ke ha‘u ‘a e Toko Taha ‘oku ‘o‘ona totonu,#21.27 pe ‘O‘ona mei he konisitūtoné. pea te u foaki ia ki ai.

Ko ha Heletā mo e Kakai ‘Āmoní

28Siini, Hako‘i-tangata, ke ke fai ha‘o palofisai, mo ke pehē, Ko e folofola ‘eni ‘a ‘Ātonai Sihova ki ha‘a ‘Āmoni, mo ‘enau manuki na‘e fai. ‘Io, te ke pehē,#Sel 49.1-6; ‘Isi 25.1-7; ‘Ēmosi 1.13-15; Sef 2.8-11

Ko e heletā ē!

Ko e heletā kuo unuhi

Ke fai ha tāmate:

Kuo fakangingila

Ke a‘u ki hono ngata‘anga,

Koe‘uhi ke ne hangē ko e ‘uhila.#21.28 pe ke ha‘aki ‘a e kaila tau.

29Lolotonga ‘enau fai ‘a e ngaahi vīsone loi kiate koe, lolotonga ‘oku nau fai atu ‘enau tongafisi kākā, te ne ‘ai ko e fakataha mo e ngaahi kia ‘o e kakai kuo tāmate‘i, ‘a e kau angahala kuo hoko honau ‘aho ‘i he taimi ‘o e kovi ‘o e faka‘osi.

30Fakafoki ki hono ‘ai‘anga. ‘I he potu na‘e fakatupu ai koe, ‘i he fonua na‘e fanau‘i ai koe, ko e potu ko ia te u fakamāu‘i ai koe. 31Pea te u lilingi kiate koe ‘eku houhau; te u ifi ‘a e afi ‘o ‘eku ‘ita kiate koe; pea te u tuku koe ki he nima ‘o e kakai fakamanu, ko e kau tufunga ‘o e faka‘auha. 32Te ke hoko ko e me‘akai ‘a e afi; ‘e faliki ‘aki ‘a e fonua ho toto; ‘e ‘ikai toe manatua koe; he ko au Sihova kuo u lea.

Currently Selected:

KO ‘ISIKELI 21: TMB

Highlight

Copy

Compare