KO ‘ISIKELI 18
18
Takitaha Fua ‘ene Hia
1PEA hoko ‘a e folofola ‘a Sihova kiate au, ‘o pehē, 2Sī, ko ho‘omou ha ‘oku fai, ho‘omou ngāue‘aki ‘a e paloveepi ko eni ‘i he kelekele ‘o ‘Isileli?#Sel 31.29 Tokua Mātu‘a ‘oku kai kālepi mahi, Ka ko e nifo ‘o e fānau ‘oku maninia.
3Tangi ‘eku mo‘ui–ko ‘Ātonai Sihova ia mei he Ta‘ehāmai–ha‘amou toe ngāue‘aki ‘a e paloveepi ko ia ‘i ‘Isileli. 4Vakai, ‘oku, ‘o‘oku ‘a e laumālie fuli pe; ‘o‘oku tatau ‘a e laumālie ‘o e tamai mo e laumālie ‘o e foha: ko e laumālie ‘oku fai angahala ko ia ia ‘e mate.
5Ka ko e tangata ‘oku mā‘oni‘oni, pea ‘oku ne fai ‘a e fakalao mo e totonu; 6‘oku ‘ikai te ne kai ‘i he ngaahi funga. mo‘unga na, pe tāngaki hono mata ki he ngaahi ‘aitoli ‘o e fale ‘o ‘Isileli, pea kuo ‘ikai te ne ‘uli‘i ‘a e uaifi ‘o ha taha kehe, pea ‘oku ‘ikai te ne ‘unu‘unu ki hono uaifi ‘o‘ona lolotonga ‘ene fakakelekele: 7pea ‘oku ‘ikai te ne fakaehaua ha taha; ‘oku ne fakafoki ‘a e talifaki mo‘ua; ‘oku ‘ikai te ne momo‘i fa‘ao ha me‘a; ‘oku ne ‘ange ‘ene me‘akai ki he fiekaia, pea ‘oku ne fakakofu ‘a e telefua; 8kuo ‘ikai te ne tali ha nō ke totongi hulu, pea ‘oku ‘ikai te ne ‘eke toloi; ‘oku ne ta‘ofi hono nima mei he kovi; ‘oku ne fai ‘a e fakamaau totonu ‘i he vaha‘a ‘o e tangata mo e tangata; 9‘oku ne fou ‘i he‘eku ngaahi tu‘utu‘uni, pea ‘oku ne tauhi ‘eku ngaahi kupu‘i konisitūtone he fai mo‘oni; ko e mā‘oni‘oni ia, te ne mo‘ui pē–ko ‘Ātonai Sihova ia mei he Ta‘ehāmai.#Lev 18.5
10Ka ‘o kapau ‘oku ne ma‘u ha foha anga mālohi, ha taha ‘oku lingi toto, ‘io, ‘oku ne fai ha taha pē#18.10 ha taha pē; ‘Oku pehē hono fakalea ‘i he ngaahi hiki fuoloa ‘e ni‘ihi, ka ‘oku ‘ikai ke mahino ‘a hono faka-Hepeluú. ‘o e ngaahi me‘a ko ia 11(Ka ko e tangata‘eiki na‘e ‘atā ‘aupito mei he ngaahi me‘a ko ia), ka ‘o kapau foki kuo ne kai ‘i he ngaahi mo‘unga na, mo ‘uli‘i ‘a e uaifi ‘o ha taha kehe; 12‘oku ne fakaehaua ‘a e tu‘utāmaki mo e masiva; ‘oku ne fa‘ao me‘a; ‘oku ‘ikai te ne fakafoki ‘a e talifaki, pea ‘oku ne tāngaki hono mata ki he ngaahi ‘aitoli; ‘oku ne fai me‘a fakalielia; 13‘oku ne tali nō ke totongi hulu, pea ‘oku ne ‘eke toloi: pea ‘oku totonu ke ne mo‘ui koā? ‘E ‘ikai te ne mo‘ui: kuo ne fai ‘a e ngaahi fakalielia ko ē, kuo pau ke tāmate‘i ia: ‘e ‘i hono tumu‘aki hono toto ‘o‘ona.
14Kae vakai ‘oku ma‘u ha foha ‘e he tangata ko ē, ‘a ia ‘oku ne sio ki he ngaahi fu‘u angahala ‘oku fai ‘e he‘ene tamai; ‘io, ‘oku ne sio, ki ai, ka ‘oku ‘ikai te ne fai hangē ko ia: 15‘oku ‘ikai te ne kai ‘i he ngaahi funga mo‘unga na, pea ‘oku ‘ikai te ne tāngaki hake hono mata ki he ngaahi ‘aitoli ‘o e fale ‘o ‘Isileli; 16‘oku ‘ikai te ne ‘uli‘i ‘a e uaifi ‘o ha taha kehe, pea ‘oku ‘ikai te ne fakaehaua ha taha; ‘oku ‘ikai te ne ta‘ofi ‘a e talifaki, ‘oku ‘ikai te ne fa‘ao ha me‘a; ‘oku ne ‘ange ‘ene me‘akai ki he fiekaia, pea ‘oku ne fakakofu ‘a e telefua; 17‘oku ne ta‘ofi hono nima mei si‘i tu‘utāmaki;#18.17 si‘i tu‘utāmaki; Ko hono faka-Hepeluú ia, ka ‘oku ngali tonu hono hiki ‘o: he kovi (vakai ai pē ki he veesi 8). ‘oku ‘ikai te ne ‘eke ‘a e hulu mo e toloi; ‘oku ne fai ‘eku ngaahi kupu‘i konisitūtone, ‘oku ne fou ‘i he‘eku ngaahi tu‘utu‘uni: ko e toko taha ko ia ‘e ‘ikai te ne mate koe‘uhi ko e kovi ‘a ‘ene tamai: ‘e mo‘ui pē ia. 18Ko ‘ene tamai, ko e me‘a ‘i he‘ene fai fakamālohi, ‘ene fa‘ao me‘a mei hono kāinga,#18.18 ‘ene fa‘ao… kāinga; Ko hono fakalea ia ‘i he ngaahi hiki fuoloa ‘e ni‘ihi, ka ‘oku ‘ikai ke mahino ‘a hono faka-Hepeluú. mo fai me‘a ‘oku ‘ikai lelei ‘i he lotolotonga ‘o hono kakai, vakai, ‘e mate ia koe‘uhi ko ‘ene kovi.
19Pea ‘oku mou pehē koā, Ko e hā ‘oku ‘ikai ke kau ai ‘a e foha ke fua ‘a e kovi ‘a ‘ene tamai? Ka ko e foha kuo ne fai ‘a e fakalao mo e totonu, kuo ne tauhi ‘eku ngaahi tu‘utu‘uni mo fai ki ai, ‘e mo‘ui pē ia. 20Ko e laumālie ‘oku angahala ko ia ia ‘e mate; ‘e ‘ikai kau ‘a e foha ‘i he fua ‘a e kovi ‘a ‘ene tamai, pea ‘e ‘ikai kau ‘a e tamai ‘i he fua ‘a e kovi ‘a hono foha: ko e mā‘oni‘oni ‘a si‘i mā‘oni‘oni ‘e hoko kiate ia, pea ko e pau‘u ‘a e pau‘u ‘e hoko kiate ia.#Teu 24.16
21‘Oka tafoki ‘a e angakovi mei he angakovi kehekehe kuo ne feia, ‘o ne tauhi ‘eku ngaahi tu‘utu‘uni, ‘o ne fai ki he lao mo e totonu, ‘e mo‘ui pē ‘a e toko taha ko ia, ‘o ‘ikai mate. 22Ko e ngaahi angahala kehekehe kuo ne fai, ‘e ‘ikai lau kiate ia: te ne mo‘ui koe‘uhi ko e totonu kuo ne fai. 23He ‘oku ou momo‘i manako ki he pekia ‘a e angahala?–ko ‘Ātonai Sihova ia mei he Ta‘ehāmai–kaekehe ke ne tafoki mei hono ngaahi ‘alunga, ‘o mo‘ui.
24Ka ‘o kapau ‘e foki ‘a e mā‘oni‘oni mei he‘ene faitotonu, ‘o ne fai kovi, ‘o ne feia ‘a e ngaahi fakalielia kuo fai ‘e he angahala na, pea te ne mo‘ui? Ko e me‘a totonu kuo ne fai ‘e ‘ikai ha lau ki ai; ko e kākā kuo ne fai, mo e angahala kuo ne angahala ‘aki ko e ngaahi me‘a ko ia te ne mate ai.
25Ka ‘oku mou pehē, ‘Oku ‘ikai fakafuofua ‘a e ‘alunga ‘o ‘Ātonai. ‘A e fale ‘o ‘Isileli, mou fanongo mu‘a, ko ho‘oku ia ‘alunga koā ‘oku ‘ikai ke fakafuofua? ‘ikai ko ho‘omoutolu pē ‘alunga ‘oku ‘ikai ke fakafuofua? 26Ka foki ‘a e mā‘oni‘oni mei he‘ene mā‘oni‘oni, ‘o ne faikovi, ‘o mate ai; koe‘uhi pē ko e kovi ‘oku ne fai ‘a ia ‘oku ne mate ai. 27Pea ‘oka tafoki ‘a e angakovi mei he angakovi kuo ne feia, ‘o ne fai ki he lao mo e totonu, ‘e fakamo‘ui hono laumālie ‘e he toko taha ko ia. 28Kapau te ne sio ki he ngaahi fu‘u angahala kuo ne fai, ‘o ne tafoki mei ai, te ne mo‘ui pē, ‘e ‘ikai te ne mate. 29Ka ‘oku lau ‘e he fale ‘o ‘Isileli, tokua ‘oku ‘ikai fakafuofua ‘a e ‘alunga ‘o ‘Ātonai. ‘Io, ko ia! ‘oku ‘ikai fakafuofua hoku ngaahi ‘alunga, fale ‘o ‘Isileli ē! Na‘a ko ho‘omoutolu ngaahi ‘alunga ‘a ia ‘oku ‘ikai totonu?
30Ko ia, ‘e fale ‘o ‘Isileli, te u fakamaau kimoutolu ‘o fakatatau ki homou ‘alunga takitaha–ko ‘Ātonai Sihova ia mei he Ta‘ehāmai. Mou tafoki, ‘o liliu mei ho‘omou ngaahi fu‘u angahala na, ke ‘oua na‘a hoko ia ko e tūkia‘anga ke mou kovi ai. 31Li‘aki atu ‘a e ngaahi angahala kuo mou hia ai, ‘o ngaohi mo‘omoutolu ha loto fo‘ou mo ha laumālie fo‘ou: he koe‘uma‘ā ho‘omou mate, si‘i fale ‘o ‘Isileli? 32He tala‘ehai ‘oku ou hōhō‘ia ‘i he pekia ‘a e pekia–ko ‘Ātonai Sihova ia mei he Ta‘ehāmai–ko ia mou tafoki ka mou mo‘ui.
Currently Selected:
KO ‘ISIKELI 18: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
