KO ‘ISIKELI 19
19
Ko e Hiva Loto Mamahi
1SIINI, hua ha tangilāulau koe‘uhi ko e hou‘eiki ‘Isileli. 2Pea te ke pehē, Ko e hā na‘e tokoto ai ho‘o fa‘ē ko e laione fefine ‘i he lotolotonga ‘o e fanga laione fefine, ‘ene tauhi hono fānganga fakataha moni manu hau? 3Pea ne potongi ha taha ‘i hono fānganga, ‘o ne hoko ko e manu hau: pea ne ako ia ke ma‘u ‘ene a‘alu; na‘a ne kai tangata. 4Pea fanongo kiate ia ‘e he ngaahi pule‘anga; na‘e pō ia ‘i honau luotō, ‘o nau taki ia ki ‘Isipite ‘aki ‘a e ngaahi mama ihu. 5Pea ‘i he‘ene vakai kuo noa ‘ene ‘amanaki, kuo ka‘anga, na‘a ne to‘o ha taha ‘o hono fānganga; na‘a ne ngaohi ia ko e manu hau. 6Pea hā‘ele holo ia ‘i he lotolotonga ‘o e fanga laione fefine; na‘a ne hoko ko e manu hau: na‘a ne ako ke ma‘u ‘ene a‘alu; na‘a ne kai tangata. 7Pea ne laiki hono ngaahi palasi,#19.7 ‘Oku fihi. Ko hono hiki ‘e taha: na‘a ne tohotoho‘i hono kau uitou, pea ko hono fakalea ‘i he hiki fuoloa ‘e taha: Peá ne laiki hono ngaahi kolo taú. pea ne have‘i honau ngaahi kolo; ‘io, na‘e hoko ‘a e fonua mo hono mahu ko e lala ‘i he ongoonga‘a mai ‘ene kālou. 8Pea nofo mai ke fai mo ia ha ngaahi fa‘ahinga takatakai ‘i he ngaahi vahefonua, ‘o nau fola ki ai honau kupenga; na‘e pō ia ‘i honau luotō. 9Pea nau ‘ai fīnaki ia, moni mama ihu, ‘o nau ‘omi ia ki he Tu‘i Pāpilone: nau ‘omi ia ki he ngaahi talitau‘anga, koe‘uhi ke ‘oua na‘a toe ongo mai hono le‘o ‘i he ngaahi mo‘unga ‘o ‘Isileli, 10Ko ho‘o fa‘ē na‘e hangē ko e vaine#19.10 ‘Oku toe ‘i ai e fo‘i lea ‘e taha ‘oku tu‘u ‘i he kupu ko ‘ení ‘a ia ‘oku ‘ikai ke mahino ‘a hono ‘uhingá. na‘e tō ki he ve‘e vai ‘i ho‘o mālōlō; na‘e hoko ko e mohu fua mo va‘ava‘a ko ‘ene ofi ki he ngaahi vai lahi. 11Pea na‘e ‘iate ia ‘ani va‘a hangē ha mātā mo e sēpita ‘o e kau pule, pea na‘e ‘alu hake hono mā‘olunga, ‘o puli ‘i he ngaahi ‘ao na, pea na‘e ‘ilonga hono mā‘olunga ko ia ko e lahi hono ngaahi va‘a. 12Na‘e toki ta‘aki ia ‘i he ‘ita; na‘e lī ki he kelekele; pea na‘e fakamae hono fua ‘e he matangi hahake, na‘e mapaki hono ngaahi va‘a mālohi, ‘o mae; na‘e keina ‘e he afi. 13Pea ko e taimi ni kuo hunuki ia ‘i he toafa ‘i he fonua mōmoa mo honge vai. 14Pea ‘oku ‘alu atu ha afi mei hono va‘a hangē ha mātā; ‘oku ne keina hono fua ko ia; ‘oku ‘ikai kei ‘iate ia ha va‘a hangē ha mātā ke sēpita ‘aki ha pule. Ko e tangilāulau ia, pea ‘e faifai pea tangilāulau ‘aki.
Currently Selected:
KO ‘ISIKELI 19: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
