KO ‘ISIKELI 13
13
Ko ha Fakahā ko hono Valoki‘i ‘o Kau Palōfita Tangata
1PEA hoko, ‘a e folofola ‘a Sihova kiate au, ‘o pehē, 2Hako‘i-tangata, fai ha palofisai ki he kau palōfita ‘o ‘Isileli, ‘a kinautolu ‘oku lavaki palofisai; ‘io, ke ke lea ki he fa‘ahinga ‘oku palofisai mei honau loto, Mou fanongo ki he folofola ‘a Sihova.
3Ko e folofola ‘eni ‘a ‘Ātonai Sihova, ‘Oiauē ‘a e kau palōfita vale, ‘a ia ‘oku nau muimui ki he laumālie ‘onautolu, mo e me‘a kuo ‘ikai te nau māta‘ia! 4‘E ‘Isileli, kuo hoko ho‘o kau palōfita ‘o hangē ko e fanga fōkisi ‘i he ngaahi potu ‘oku lusa. 5Tala‘ehai kuo mou ‘alu hake ke tu‘u ‘i he ngaahi potu ‘oku ava, pea tala‘ehai kuo mou fakamā‘opo‘opo hake ‘a e ‘ā ki he fale ‘o ‘Isileli, ke tu‘u ‘i he tau ‘i he ‘ao ‘o Sihova. 6‘Oku nau mata vīsone loi, pea ‘oku nau fai ‘a e tongafisi kākā, ‘a kinautolu ‘oku lau, “Ko Sihova ‘eni mei he Ta‘ehāmai;” ‘osi kuo ‘ikai fekau kinautolu ‘e Sihova, ke nau ‘amanaki ‘e tu‘u ‘enau lea. 7‘Ikai ko e vīsone loi ‘oku mou māta‘i? ‘ikai ko e tongafisi kākā, ‘oku mou lea‘aki, ho‘omou pehē, “Ko Sihova ‘eni mei he Ta‘ehāmai;” ‘osi, kuo ‘ikai te u lea au?
8Ko ia, ko e folofola ‘eni ‘a ‘Ātonai Sihova, Ko e me‘a ‘i ho‘omou lea‘aki ‘a e loi, mo palofisai ‘aki ‘a e kākā, ko ia, ko au ‘eni te u fai kiate kimoutolu–ko ‘Ātonai Sihova ia mei he Ta‘ehāmai. 9‘Io, ko hoku nima ni ‘e ala ki he kau palōfita mata vīsone loi, mo fai tongafisi kākā: ‘e ‘ikai te nau kau ki he kāpineti ‘a hoku kakai, pea ‘i he tohi kakai ‘a ‘Isileli ‘e ‘ikai tu‘u honau hingoa, pea ko e kelekele ‘o ‘Isileli ‘e ‘ikai te nau a‘u ki ai; pea te mou ‘ilo ko ‘Ātonai Sihova au.
10Koe‘uhi ā, ‘io, koe‘uhiā kuo nau taki hē hoku kakai, he‘enau pehē, “Ko e tu‘umālie;” ‘osi, ‘oku ‘ikai ha tu‘umālie, pea ka langa ‘e ha kakai ha ‘ā, pea vakai ‘oku nau vali lahe ia.#Sel 6.14; 8.11 11Tala ki he kau vali lahe na, ‘e tō ia: ‘oku hoko mai ha lōvai. “Pea ko kimoutolu, ‘a e ngaahi ‘Uhamaka, mou tō; pea ko koe, Matangi afā, hae mai.” 12Pea vakai, ‘oku holo ‘a e ‘ā: ‘ikai koā ‘e ‘eke atu, Kofa‘ā ‘a e lahe na‘a mou vali ‘aki?
13Ko ia, ko e folofola ‘eni ‘a ‘Ātonai Sihova; Te u tuku ke hae mai ha matangi afā ‘i he‘eku kakaha; pea ‘e hoko ha lōvai ‘i he‘eku ‘ita, mo e ngaahi ‘uha maka ‘i he houhau ke faka‘auha. 14Pea te u holoki ‘a e ‘ā kuo mou vali lahe; ‘io, te u tulaki ia ki he kelekele ke hā hono tu‘unga: ‘io, ‘e tō ia, pea te mou ‘auha fakataha mo ia, pea te mou ‘ilo ko Sihova au.
15‘Io, te u ‘osiki ‘eku ‘ita ki he ‘ā, mo kinautolu ‘oku vali lahe ia; pea te u lea kiate kimoutolu, ‘o pehē, Kuo ngata ‘a e ‘ā, pea ngata mo kinautolu na‘e vali ia: 16‘io, ‘a e kau palōfita ‘Isileli, ‘a kinautolu na‘e fai palofisai ki Selusalema, ‘o mata vīsone melino ma‘ana; ‘osi, ‘oku ‘ikai ha melino–ko ‘Ātonai Sihova ia mei he Ta‘ehāmai.
Ko ha Kikite ki Hano Fakamāu‘i ‘o e Kau Palōfita Fefiné
17Sini, Hako‘i-tangata, ‘ai ho mata ki he fānau fefine ‘a ho kakai, ‘oku fai palofisai mei honau loto, ‘io, ke ke palofisai kiate kinautolu. 18Pea ke pehē, Ko e folofola ‘eni ‘a ‘Ātonai Sihova. ‘Oiauē ‘a e kau fefine ‘oku nau tuitui ‘ufi‘ufi#13.18 pe me‘a fakamolū; pe sausau. ki he hokotanga kehekehe ‘o e ongo nima,#13.18 pe hoku ongo nima. pea ‘oku nau ngaohi pūlou#13.18 pe konga holo; pe tatā. ki he ‘ulu ‘o e fōtunga kehekehe, ko ‘enau pō laumālie! Te mou pō koā ‘a e laumālie ‘o hoku kakai, ‘o fakahaofi ‘a e laumālie ‘omoutolu?
19Pea te mou va‘inga‘aki au ki hoku kakai koe‘uhi ko e falukunga pa‘ale mo e ngaahi konga mā, ke tāmate‘i ‘a e ngaahi laumālie na‘e mei mo‘ui, pea ke fakamo‘ui ‘a e ngaahi laumālie na‘e ‘ikai totonu ke mo‘ui, ‘o fai‘aki ho‘omou ngaahi loi ki hoku kakai, ‘a ia ‘oku nau ongongofua ki he loi?
20Ko ia, ko e folofola ‘eni ‘a ‘Ātonai Sihova, Ko au ‘eni te u ngāue ki homou ngaahi ‘ufi‘ufi na, ‘a ia kuo mou ‘ai ke tauhele ‘aki; te u ‘ai ‘a e ngaahi laumālie ke nau ‘atā, ‘io, te u hae kinautolu mei homou nima; pea te u tukuange ‘a e ngaahi laumālie, ‘a ia ‘oku mou nofo hono pō, ko e ngaahi laumālie ke puna.#13.20 ‘Oku ‘i ai e fo‘i lea ‘oku ‘asi tu‘oua ‘i he faka-Hepeluú ‘a ia ‘oku ‘ikai ke mahino ‘a hono ‘uhingá. 21Te u hae foki homou ngaahi pūlou, pea hamusi hoku kakai mei homou nima; pea ‘e ‘ikai te nau toe hoko ko e me‘a ke mou pō; pea te mou ‘ilo ko Sihova au.
22Koe‘uhi ā na‘a mou fakamamahi ‘a e loto ‘o si‘i faitotonu ‘aki ‘a e loi; ‘osi, ‘oku ‘ikai hano fakamamahi ‘oku fie fai ‘e au; pea na‘a mou poupou ‘a e nima ‘o e angahala, ko ia ‘oku ‘ikai ai te ne foki mei hono hala kovi ke ma‘u mo‘ui. 23Ko ia ‘e ‘ikai te mou toe mata vīsone loi, mo fai ‘a e tongafisi: Pea te u hamusi hoku kakai mei homou nima; pea te mou ‘ilo ko Sihova au.
Currently Selected:
KO ‘ISIKELI 13: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
