KO ‘ISIKELI 12
12
Ko e Kumi Hūfanga ‘a e Palōfitá
1PEA hoko ‘a e folofola ‘a Sihova kiate au, ‘o pehē, 2Hako‘i-tangata, ko ho‘o nofo ‘oku fai ‘i he lotolotonga ‘o e fāmili pau‘u, ‘a ia ‘oku nau ma‘u mata ke sio ‘aki, ka ‘oku ‘ikai te nau sio, ‘oku nau ma‘u telinga ke fanongo ‘aki, ka ‘oku ‘ikai te nau ongo‘i; he ko e fāmili pau‘u ena.#‘Ais 6.9-10; Sel 5.21; Ma‘ake 8.18
3Siini, Hako‘i-tangata, ke ke tokonaki ma‘au ‘a e me‘a ki he ‘alu ‘i he fakahē, pea ke fai ‘aho ho‘o tuku atu hangē ha fakahē, ke nau sio ki ai; ‘io, ke ke hiki mei ho potu na ki ha potu kehe, ‘oku nau sio ki ai: hei‘ilo te nau tokanga nai, he ko e fāmili pau‘u ‘ena.#12.3 hei‘ilo… ‘ena; pe hei‘ilo te nau ‘ilo‘i ai ko e kau angatu‘u kinautolu. 4‘Io, ‘ave ki tu‘a ho‘o tokonaki, ‘aho, ke nau sio ki ai, ko e tokonaki tofu pē ‘o ha ‘alu pōpula: ka ke toki ‘alu pē koe, efiafi, ka ‘oku nau sio ki ai, ko e hū kitu‘a tofu pē ‘a ha ‘alu pōpula. 5Lolotonga ‘enau sio ki ai, ke ke foa hao ava ‘i he holisi, pea ke ‘ave me‘a kitu‘a ai. 6Lolotonga ‘enau sio ki ai, ke ke hili ia ki ho uma, ‘ave kitu‘a ‘i he kaupō‘uli; fakapūlou ho mata ke ‘oua te ke sio ki he kelekele; he kuo u tuku koe ko e taipe ki he fale ‘o ‘Isileli.
7Pea u fai tatau mo hoku fekau: na‘a ku ‘ave nāunau kitu‘a, ‘aho, ko e tokonaki tofu pē ‘o ha ‘alu pōpula; pea efiafi na‘a ku hanga ‘o foa ha ava ‘i he holisi; na‘a ku ‘ave me‘a kitu‘a ‘i he kaupō‘uli; na‘a ku hilifaki ki hoku uma ‘oku nau sio ki ai.
8Pea pongipongi hake na‘e hoko ‘a e folofola ‘a Sihova kiate au, ‘o pehē, 9Hako‘i-tangata, ‘ikai kuo fehu‘i kiate koe ‘e he fale ‘o ‘Isileli, ‘a e fāmili pau‘u na, ‘o pehē, Ko e hā ‘a e me‘a ‘oku ke fai? 10Te ke tala kiate kinautolu, Ko e folofola eni ‘a ‘Ātonai Sihova: Ko e kavenga ‘eni ‘a e ‘eiki ‘i Selusalema, pea mo e fale kotoa ‘o ‘Isileli, ‘a ia ‘oku kau ki ai ‘a e fa‘ahinga ko ē. 11Ke ke lea ‘o pehē, Ko homou taipe au: hangē ko ‘eku fai, ‘e pehē ‘a e fai kiate kinautolu: te nau ‘alu ‘i he fakahē, ‘i he taki pōpula. 12Pea ko e ‘eiki ‘oku nofo ‘i honau lotolotonga te ne hili ki hono uma ‘i he kaupō‘uli, pea te ne ‘alu kitu‘a: te nau foa ha ava ‘i he holisi ke ‘ave ‘a e me‘a kitu‘a: te ne fakapūlou hono mata, koe‘uhi ke ‘oua te ne sio ‘e ia ki he fonua ‘aki ha fo‘i mata. 13Pea te u fola hoku kupenga kiate ia, pea ‘e pō ia ‘i he‘eku hele: pea te u ‘omi ia ki Pāpilone, ki he fonua ‘o e kau Kalitia; kae ‘ikai te ne sio ki ai, pea te ne pekia ‘i he potu ko ia.#2 Tu‘i 25.7; Sel 52.11 14Pea ko kinautolu ‘oku takatakai kiate ia, ‘a e tākanga mo ‘ene ngaahi vāhenga tau kotoa, te u punakaki ki he matangi kotoa pē; pea te u tafi ki tu‘a niu ‘aki ‘a e heletā.
15Pea te nau ‘ilo ko Sihova au, ‘oka u ka veteki kinautolu ‘i he ngaahi pule‘anga, mo punakaki ki he ngaahi fonua. 16Ka te u fakahaofi hanau toenga mei he heletā mo e honge mo e mate faka‘auha, ko e tu‘unga me‘a toko si‘i; koe‘uhi ke nau ‘a‘au ‘enau ngaahi fu‘u fakalielia ‘i he ngaahi pule‘anga te nau hoko ki ai; ke nau ‘ilo ko Sihova au.
Ko e Faka‘ilonga ‘o e Palōfita Tetetete
17Pea na‘e hoko ‘a e folofola ‘a Sihova kiate au, ‘o pehē, 18Hako‘i-tangata, te ke kai tete pē ho‘o me‘akai, pea te ke fai ho‘o inu mo e hoha‘a mo e fakamamahi. 19Pea te ke pehē ki he kakai ‘o e fonua, Ko e folofola ‘eni ‘a ‘Ātonai Sihova ki he nofo Selusalema, ‘I he kelekele ‘o ‘Isileli te nau kai ‘enau me‘akai mo e hoha‘a, pea te nau fai ‘enau inu mo e ofoofo, koe‘uhi kuo mole hono mahu, pea kuo lala hono fonua, koe‘uhi ko e fakamālohi ‘a e kau nofo ai. 20‘Io, fakalala ‘a e ngaahi kolo kakai, pea ‘e ka‘anga ‘a e fonua; ke mou ‘ilo ko Sihova au.
Ko ha Palōvepi Manakoa mo ha Fakahā Ta‘emanakoa
21Pea hoko ‘a e folofola ‘a Sihova kiate au, ‘o pehē, 22Hako‘i-tangata, ko e hā ‘a e lea ni ‘oku fakatokotokanaki ‘aki ‘iate kimoutolu, ‘o kau ki he fonua ‘o ‘Isileli, ‘o pehē;
‘Oku fakalōloa taimi,
Pea kuo ikunoa ‘a e vīsone kotoa?
23Ko ia ke ke tala kiate kinautolu, ‘o pehē, Ko e folofola ‘eni ‘a ‘Ātonai Sihova: Te u ‘ai ke mate ‘a e lea ko ia, pea ‘e ‘ikai toe fakatokotokanaki ‘aki ia ‘i ‘Isileli: ka ke tala kiate kinautolu,
‘Oku ofi ‘a e taimi
Mo e tala ‘a e vīsone kotoa.
24He ‘ikai toe ai ha vīsone loi, mo e tongafisi fakaoleole, ‘i he lotolotonga ‘o e fale ‘o ‘Isileli. 25He ko Sihova au; ko au ‘e lea: ko e lea ‘oku ou fai ‘e hoko ia; ‘e ‘ikai toe toloi: he ‘i homou taimi, ‘a e fāmili pau‘u na, te u lea‘aki ha me‘a ‘o fai–ko ‘Ātonai Sihova ia mei he Ta‘ehāmai.
26Pea na‘e hoko ‘a e folofola ‘a Sihova kiate au, ‘o pehē, 27Hako‘i-tangata, vakai ‘oku lau ‘e he fale ‘o ‘Isileli, Tokua ko e vīsone ‘oku ne sio ki ai ko e me‘a ki ha taimi fuoloa; ‘io, ‘oku palofisai ‘a e siana ni ki he ngaahi taimi mama‘o. 28Ko ia ke ke lea kiate kinautolu, ‘o pehē, Ko e folofola ‘eni ‘a ‘Ātonai Sihova, ‘E ‘ikai toe toloi ‘eku ngaahi lea; ko e lea te u fai ‘e hoko–ko ‘Ātonai Sihova ia mei he Ta‘ehāmai.
Currently Selected:
KO ‘ISIKELI 12: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
