KO ‘ISIKELI 11
11
Ko Hono Fakamāu‘i ‘o Selusalema
1PEA hiki au ‘e he laumālie, ‘o ne ‘ave au ki he matapā ‘o e fale ‘o Sihova, ‘a e matapā hahake, ‘a ia ‘oku hanga ki hahake: pea tā ‘i he hū‘anga ‘o e matapā na‘e ai ha tu‘unga tangata ‘e toko uofulu mā toko nima; pea u vakai ‘oku lotolotoi ai ‘a Siasanaia foha ‘o ‘Āsuli, mo Pelataia foha ‘o Penaia, ko e hou‘eiki ‘o e kakai.
2Pea ne folofola kiate au, Hako‘i-tangata, ko eni ia ‘a e kau tangata ‘oku fakakaukau ‘a e faikovi, mo fai ‘a e fale‘i kovi ‘i he kolo ni. 3‘A kinautolu ‘oku pehē, ‘Oku ‘ikai ofi ‘a e taimi ke langa fale:#11.3 ‘Oku ‘ikai… fale; pe ‘E vavé ni ha‘amau toe langa fale. ko e kulo ‘a e kolo ia, pea ko kitautolu ‘a e kanomate. 4Ko ia ke ke fai palofisai kiate kinautolu, Hako‘i-tangata, ke ke palofisai.
5Pea tō kiate au ‘a e laumālie ‘o Sihova, ‘o ne folofola mai, Lea: Ko e folofola ‘eni ‘a Sihova, Ko e anga ia ‘o ho‘omou lau, ‘e fale ‘o ‘Isileli; he ko e me‘a ‘oku hake ‘i homou loto, ‘oku ou ‘ilo ia. 6Kuo mou fakatokolahi ‘a e kakai ‘omoutolu kuo tāmate‘i ‘i he kolo ni, pea kuo mou fakafonu ‘anga‘anga hono ngaahi hala.
7Ko ia, ko e folofola ‘eni ‘a ‘Ātonai Sihova: Ko homou kakai kuo tāmate‘i, ‘a ia kuo mou ‘ai ‘i he loto kolo, ko eni ia ‘a e kanomate, pea ko e kulo ai pē ia; ka ‘e ‘omi kimoutolu kitu‘a mei ai. 8Ko e heletā ia kuo mou manavahē ki ai? Lelei, te u ‘omi ‘a e heletā kiate kimoutolu–ko ‘Ātonai Sihova ia mei he Ta‘ehāmai. 9Pea te u fakahū kitu‘a ‘a kimoutolu mei ai, pea te u tuku kimoutolu ki he nima ‘o e kau muli, ‘io, te u fakaai ‘a e ngaahi tautea kiate kimoutolu. 10Ko e heletā te mou tō ai; ‘i he tafafonua ‘o ‘Isileli te u fakaai ai homou tautea; pea te mou ‘ilo ko Sihova au. 11‘E ‘ikai hangē ko e kulo ‘a e kolo ni kiate kimoutolu, mo kimoutolu ‘a e kanomate; ‘ikai; ko e tafafonua ‘o ‘Isileli te u fakaai ai homou tautea. 12Pea te mou ‘ilo ko Sihova au, ‘a au ‘oku ‘ikai te mou foua ‘eku ngaahi tu‘utu‘uni, pea ko ‘eku ngaahi me‘a fakalao kuo ‘ikai te mou fai, ka kuo mou fai ‘o tatau mo e me‘a fakalao ‘a e ngaahi pule‘anga ‘oku takatakai kiate kimoutolu.
13Pea lolotonga ‘eku fai palofisai, ‘iloange na‘e pekia ‘a Pelataia foha ‘o Penaia. Pea u tō fo‘ohifo, ‘o u tautapa hake le‘o lahi, ‘o pehē, ‘Oiauē ‘Ātonai Sihova ē! Ko ho‘o ‘ai ke ‘osi ‘aupito ‘a e toenga ‘o ‘Isileli?
Ko ha Tala‘ofa ki he Kau Nofo Fakaheé
14Pea hoko ‘a e folofola ‘a Sihova kiate au, ‘o pehē, 15Hako‘i-tangata, ko ho kāinga, ko ho kāinga mo‘oni, ‘a e tu‘unga me‘a ‘oku ke koeli ki ai, ‘io, ‘a e kotoa ‘o e fu‘u fale ‘o ‘Isileli, ko kinautolu ia ‘oku lau ki ai ‘e he nofo Selusalema, Nofo mama‘o meia Sihova; ko kimautolu pē kuo tuku ki ai ‘a e fonua ni moomau tofi‘a.
16Ko ia ke ke lea ‘o pehē, Ko e folofola ‘eni ‘a ‘Ātonai Sihova: ‘Oku mo‘oni kuo u ‘ave kinautolu ke mama‘o ke nofo ‘i he ngaahi pule‘anga, pea kuo u veteki kinautolu ‘i he ngaahi fonua; ka te u nofo kiate kinautolu, ‘o fuoloa si‘i, mo nau Potu Tapu, ‘i he ngaahi fonua kuo nau a‘u ki ai.
17Ko ia ke ke lea, ‘o pehē, Ko eni ‘a e folofola ‘a ‘Ātonai Sihova, Te u tānaki foki kimoutolu mei he ngaahi kakai, pea te u fakatefua mai kimoutolu mei he ngaahi fonua, ‘a ia na‘e vetekina kimoutolu ki ai, pea te u ‘atu kiate kimoutolu ‘a e kelekele ‘o ‘Isileli. 18Pea te nau a‘u ki he potu ko ia, pea te nau ‘ave mei ai hono ngaahi me‘a mousa‘a, mo hono ngaahi fu‘u fakalielia. 19Pea te u ‘atu kiate kinautolu ha taha‘i loto; ‘io, te u ‘ai ki homou loto ha laumālie fo‘ou, pea te u to‘o ‘a e loto maka mei honau kakano, pea te u ‘ange kiate kinautolu ha loto kakano:#‘Isi 36.26-28 20koe‘uhiā ke nau fou ‘i he‘eku ngaahi tu‘utu‘uni, ‘o tauhi ‘eku ngaahi kupu‘i konisitūtone, ‘o fai ki ai: pea te nau nofo kiate au ko hoku kakai, pea te u nofo au ko honau ‘Otua. 21Ka ko kinautolu ‘oku hu‘ufataha honau loto mo e loto ‘o ‘enau ngaahi me‘a mousa‘a mo ‘enau ngaahi me‘a fakalielia, ko honau ‘alunga te u ‘ai ki honau tumu‘aki–ko ‘Ātonai Sihova ia mei he Ta‘ehāmai.
Ko e hiki ‘a e Lāngilangi ‘o e ‘Otuá mei Selusalema
22Na‘e toki fola ‘e he kau Selupimi honau kapakau, pea na‘e ō ‘a e ngaahi fakasāliote mo kinautolu; pea ko e Sikaina ‘o e ‘Otua ‘o ‘Isileli na‘e taupotu ki ‘olunga ‘iate kinautolu.#‘Isi 43.2-5 23Pea hā‘ele hake ‘a e Sikaina ‘o Sihova mei he‘ene taka ‘olunga ‘i he loto kolo, ‘o ne tu‘u ‘i he mo‘unga ‘a ia ‘oku ‘i he potu hahake ‘o e kolo. 24Toki hiki au ‘e he laumālie, ‘o ne ‘ave au fakataha mo e vīsone mo e Laumālie ‘o ‘Elohimi ki he fonua ‘o e kau Kalitia, ki he fakahē. Na‘e toki hā‘ele hake meiate au ‘a e vīsone na‘a ku mamata ki ai. 25Pea u toki fakamatala ki he fakahē ‘a e ngaahi fu‘u me‘a ‘a Sihova, ‘a ia kuo ne tuku ke u sio ki ai.
Currently Selected:
KO ‘ISIKELI 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
