KO ‘EKISOTO 27

Ko e ‘Ōlitá

(‘Eki 38.1-7)

1PEA te ke ngaohi ‘a e ‘ōlita ‘aki ‘a e papa sitimi; ko hono lōloa ko e kiupite ‘e nima, pea ko hono māukupu ko e kiupite ‘e nima; ‘e tapafā ‘a e ‘ōlita: pea ko hono mā‘olunga ko e kiupite ‘e tolu. 2Pea te ke ngaohi hano nifo ki hono funga tuliki ‘e fā: ‘e sino taha pē mo ia ‘a hono ngaahi nifo; pea te ke ‘aofi ‘aki ia ‘a e kapa. 3Pea te ke ngaohi ‘a hono ngaahi kane ke tali ‘a e efuefu, mo hono ngaahi huo lafalafa, mo hono ngaahi pēsoni, pea mo e ngaahi huhu, pea mo hono ngaahi ‘ainga malala: te ke ngaohi kapa hono nāunau kotoa. 4Pea te ke ngaohi ki ai ha tu‘unga vangavanga kapa hangē ko e mata ‘o e kupenga; pea te ke ‘ai ki he funga kupenga ko ia ha kavei kapa ‘e fā, ke tu‘u ‘i hono tuliki ‘e fā. 5Pea te ke ‘ai ia ki he lalo takai ‘o e ‘ōlita, pea ‘e a‘u ‘a e kupenga ki he vaeuamālie hake ‘o e ‘ōlita. 6Pea te ke ngaohi ‘akau ha‘amo ki he ‘ōlita: ko e ‘akau sitimi ‘a e ha‘amo ko ia: pea te ke ‘aofi kapa. 7Pea te ke velo ‘a e ongo ‘akau ha‘amo ‘i he ngaahi kavei, pea ‘i he‘enau ha‘amo ia, ‘e tokoto ‘a e ongo ha‘amo ‘i he ongo fa‘ahi ‘o e ‘ōlita. 8Te ke ngaohi ia ‘aki ‘a e ngaahi laupapa, ‘o ava ‘i loto: ‘o hangē ko e me‘a ‘e tuku ke ke mamata ki ai ‘i he mo‘unga, ‘e pehē ‘enau fai.

Ko e Loto‘ā ke Tu‘u ai e Tāpanekale ‘o Sihová

(‘Eki 38.9-20)

9Pea te ke ngaohi ‘a e Loto‘ā ‘o e Tāpanekale. Ko e me‘a ki hono fa‘ahi ki he Tonga (‘a e fakato‘omata‘u), ko e lulu ‘o e loto‘ā ko e tupenu kuo lalanga ‘aki ‘a e vavae hinehina kuo filo; ko hono lōloa, fua kiupite, ko e teau; ko e fa‘ahi ‘e taha ia. 10Pea ko hono ngaahi tokotu‘u ‘e uofulu, pea ko honau ngaahi tu‘unga ‘e uofulu, ko e kapa pē, kae siliva ‘a e ngaahi tautau‘anga ‘i he ngaahi tokotu‘u, mo honau ngaahi ‘akau fakakava. 11Pea ‘e pehē ‘a e lōloa ‘o e fa‘ahi ki he tokelau: ko hono tupenu lulu ko e teau hono lōloa; pea ko hono ngaahi tokotu‘u ‘e uofulu, pea uofulu honau ngaahi tu‘unga, ko e kapa; kae siliva ‘a e ngaahi tautau‘anga ‘i he ngaahi tokotu‘u, mo honau ngaahi ‘akau fakakava. 12Pea ko e me‘a ki hono māukupu ‘o e loto‘ā, ‘a hono feitu‘u ki lulunga, ko e lōloa ‘o hono tupenu lulu ko e kiupite ‘e nimangofulu: ko hono ngaahi tokotu‘u ‘e hongofulu, pea ko honau tu‘unga ‘e hongofulu. 13Pea ko e māukupu ‘o e mata ‘o e loto‘ā, ‘a ia na‘e hanga ki he hopo‘anga la‘ā, ko e kiupite ‘e nimangofulu ia. 14Pea ko e palalulu ko ē ‘e lulu tupenu, ko e kiupite ‘e hongofulu mā nima: ko hono tokotu‘u ‘e tolu, pea mo honau ngaahi tu‘unga ‘e tolu. 15Pea ko e palalulu ko ē, ko e hongofulu mā nima, ‘e lulu tupenu: ko hono tokotu‘u ‘e tolu, pea mo honau tu‘unga ‘e tolu. 16Ka ‘e ngaohi ha puipui ki he matapā ‘o e loto‘ā–ko e kiupite ‘e uofulu–ko e lanu-langi, mo e kula-po‘upo‘uli, mo e kula-‘aho‘aho, mo e vavae hinehina kuo filo; ‘e hā ai ‘a e ngāue ‘a e tuitui poto: ko hono tokotu‘u ‘e fā, mo honau tu‘unga ‘e fā. 17Ko e tokotu‘u kotoa pē ‘o e ‘ā ‘o e loto‘ā ‘e ‘akau fakalava siliva; pea ‘e siliva mo honau ngaahi tautau‘anga, kae kapa honau ngaahi tu‘unga. 18Ko e lōloa ‘o e loto‘ā, ‘i he fua kiupite, ko e teau; pea ko hono māukupu ko e nimangofulu ‘i he potu kotoa pē; pea ko e mā‘olunga ‘o e tupenu ko e kiupite ‘e nima, ‘o ngaohi ‘aki ‘a e vavae hinehina kuo filo: pea ko honau ngaahi tu‘unga ‘e kapa. 19Pea ko e me‘a ki he nāunau kotoa pē ‘o e Tāpanekale, ‘a ia na‘e fai‘aki ‘a e ngāue ki hono ngaahi me‘a kehekehe, pea mo hono ngaahi fa‘o, mo e ngaahi fa‘o ‘o e Loto‘ā–‘e kapa ia.

Ko e Tauhi ‘o e Tu‘unga Māmá

(Lev 24.1-4)

20Pea ko eni te ke fekau ki ha‘a ‘Isileli ke nau ‘omi kiate koe ha lolo ‘ōlive ma‘a, ko e lolo kuo tuki ki he maama, koe‘uhi ke ai ha maama ‘e ulo ma‘u pē. 21Ko ‘Ēlone mo hono ngaahi foha te nau tauhi ia mei he efiafi ki he pongipongi, ‘i he ‘ao ‘o e ‘Eiki, ‘i he Tēniti Fe‘iloaki‘anga, ‘i he tu‘a tatau, ‘a ia ‘oku ne puipui‘i ‘a e Fakamo‘oni‘anga: ko e fatongia ta‘engata ia ‘a ha‘a ‘Isileli ‘i honau ngaahi to‘utangata.

Currently Selected:

KO ‘EKISOTO 27: TMB

Highlight

Copy