KO ‘EKISOTO 28

Ko e ngaahi Teunga ‘o e Kau Taula‘eikí

(‘Eki 39.1-7)

1PEA ko eni te ke fakaofi mai mei he lotolotonga ‘o ha‘a ‘Isileli ‘a ‘Ēlone ko ho tokoua, ‘a ia mo hono ngaahi foha, koe‘uhi ke ne fai kiate au ‘a e ngāue fakataula‘eiki; ‘a ‘Ēlone, ‘a Nātapi mo ‘Āpiu, ‘a ‘Eliesa mo ‘Ītama, ‘a ia ko e ngaahi foha ‘o ‘Ēlone. 2Pea te ke ngaohi kofu tapu ki ho tokoua ko ‘Ēlone koe‘uhi ke hā lāngilangi‘ia mo masani. 3Pea ko eni te ke lea ki he kau ‘atamai poto, ‘a kinautolu kuo u taumalingi ki ai ‘a e laumālie fakapoto, ke nau ngaohi ‘a e ngaahi kofu ‘o ‘Ēlone mōno fakatāpui, ke ne fai ‘a e ngāue fakataula‘eiki kiate au. 4Pea ko eni ‘a e ngaahi kofu te nau ngaohi; ko e sifa, mo e ‘ēfoti, mo e kofu tōtōlofa, mo e sote pulepule, mo e tatā, mo e no‘o: ‘io, te nau ngaohi kofu tapu kia ‘Ēlone ko ho tokoua, pea ki hono ngaahi foha, koe‘uhi ke ne fai ‘a e ngāue fakataula‘eiki kiate au. 5Pea ko e fa‘ahinga ko ē te nau to‘o ‘a e koula mo e me‘a lanu langi, mo e me‘a kula-po‘upo‘uli, mo e me‘a kula-‘aho‘aho, mo e tupenu hina.

6Pea te nau ngaohi ‘a e ‘ēfoti ‘aki ‘a e koula, me‘a lanu langi, mo e kula-po‘upo‘uli, ko e me‘a kula-‘aho‘aho mo e vavae hinehina kuo filo; ‘e fai ‘e he tangata lalanga-me‘a-pulepule. 7Pea ‘e ‘ai ki ai ha ongo fakauma ki hono ongo potu, ke fakahoko ‘aki. 8Pea ko e No‘o-pulepule ‘o e faka‘ēfoti, ‘a ia ‘oku fakaheka ‘i tu‘a, ‘e tatau hono ngaohi mo e ‘ēfoti, pea ‘e sino taha mo ia; ko e koula, lanu langi, mo e kula-po‘upo‘uli, mo e kula-‘aho‘aho, pea mo e vavae hinehina kuo filo. 9Pea te ke to‘o ha ongo maka-‘ōnike, pea te ke tongi ai ‘a e ngaahi hingoa ‘o e ngaahi foha ‘o ‘Isileli: 10ko honau hingoa ‘e ono ‘e tu‘u mei he maka ‘e taha, pea ko e toe hingoa ‘e ono ‘e tu‘u ‘i he maka ‘e taha, ‘o fakatatau ki he‘enau hokohoko. 11Ko ho‘o tongitongi ‘a e ongo maka ke hā ai ‘a e ngaahi hingoa ‘o e fānau ‘a ‘Isileli ‘e fai ki ke ngāue ‘a e tufunga maka tongitongi sila: ‘e takai mōno ‘ai‘anga ‘a e filo koula kuo fai. 12Pea te ke ‘ai ‘a e ongo maka ‘i he funga fakauma ‘o e ‘ēfoti mo‘o maka fakamanatu ki ha‘a ‘Isileli; pea ‘e fua ‘e ‘Ēlone honau hingoa ‘i hono ongo uma ‘i he ‘ao ‘o e ‘Eiki mo fakamanatu. 13Pea te ke ngaohi ‘ainga koula: 14pea mo ha ongo ki‘i tau: te ke ngaohi ia ‘aki ‘a e koula haohaoa kuo filo, ‘o hangē ko e fai ‘o ha afo; pea te ke ‘ai ‘a e ongo ki‘i afo tau ki he ‘ainga.

Ko e Sifa

(‘Eki 39.8-21)

15Pea te ke ngaohi ha sifa fakamaau, ko e fai ‘e he tangata lalanga me‘a-pulepule; te ke fai ‘o hangē ko e ngaohi ‘o e ‘ēfoti, ‘aki ‘a e koula, me‘a lanu langi, me‘a kula-po‘upo‘uli mo kula-aho‘aho, mo e vavae hinehina kuo filo. 16‘E tapafā ia ‘oka pelu ua; ko e hanga hono lōloa mo e hanga hono māukupu. 17Pea te ke fonofono maka koloa ia, ko e ‘otu maka ‘e fā. Ko ha ‘otu–ko ha sātio, ha tōpasi, mo ha ‘emalata; ko e ‘uluaki ‘otu ia. 18Pea ko hono ua ‘o e ‘otu ko ha kapukeli, ha sāfaia, mo ha pelili. 19Pea ko hono tolu ‘o e ‘otu ko ha siasini, ha ‘ākete, pea mo ha ‘ametisi. 20Pea ko hono fā ‘o e ‘otu ko ha kalisolaite, mo ha maka-‘ōnike, pea mo ha siasipa: pea ko honau fonofononga ko e filo koula kuo fai. 21Pea ko e ngaahi maka ko ē ‘e fakatatau ki he ngaahi hingoa ‘o e fānau ‘a ‘Isileli, ko e hongofulu mā ua, ‘o fakatatau ki he hingoa ‘onautolu; te nau tu‘u ma‘a e matakali ‘e hongofulu mā ua, ‘o takitaha hono hingoa kuo tongitongi hangē ha sila. 22Pea te ke ngaohi ki he potu ‘olunga ‘o e sifa ha ongo ki‘i tau, kuo fai hangē ha afo ‘aki ‘a e koula haohaoa. 23Pea te ke ngaohi ki he potu ‘olunga ‘o e sifa ha ongo maama koula; pea te ke ‘ai ‘a e ongo maama ki he ongo taupotu ‘o e sifa. 24Pea te ke tau ‘a e ongo afo koula ki he ongo maama ‘i he ongo taupotu ‘o e sifa. 25Pea ko e ongo potu ko ē ‘o e ongo afo te ke tau ki he ongo ‘ainga, pea te ke ‘ai ia ki he ongo fakauma ‘o e ‘ēfoti, ‘i hono potu ki mu‘a. 26Pea te ke ngaohi ha ongo mama koula, ‘o ‘ai ki he ongo taupotu ‘o e sifa, ‘i hono tapa ki loto ki he ‘ēfoti. 27Pea te ke ngaohi ha ongo mama koula, ‘o ‘ai ki he ongo fakauma ‘o e ‘ēfoti, ‘i hono potu ki ‘ao, kae ‘i lalo, pea ofi ki hono fakahoko, pea ‘i ‘olunga ‘i he No‘o-pulepule ‘o e ‘ēfoti. 28Pea te nau fakama‘u ‘a e sifa ‘aki hono ongo mama ki he ongo mama ‘o e ‘ēfoti ‘aki ha loufau lanu langi; koe‘uhi ke tu‘u ‘a e sifa ‘i he funga No‘o-pulepule, ‘o ‘oua ‘e mavahe mei he ‘ēfoti.

29Ko ia, ‘e fua ‘e ‘Ēlone ‘a e ngaahi hingoa ‘o e fānau ‘a ‘Isileli ‘i he Sifa Fakamāu‘anga ‘i hono funga fatafata, ‘oka ne ka hū ki he Potu Toputapu, mo‘o fakamanatu tu‘u ma‘u ‘i he ‘ao ‘o e ‘Eiki. 30Pea te ke tuku ki he Sifa Fakamāu‘anga ‘a e ‘Ūlimi mo e Tūmemi;#28.30 ‘Ūlimi mo e Tūmemi; Ko e ongo nāunau na‘e fai ‘aki e fekumi pe ko e hā e finangalo ‘o e ‘Otuá. ‘Oku ‘ikai ‘ilo pau ‘a e anga hono ngāue‘akí. pea te na ‘i he funga fatafata ‘o ‘Ēlone ‘i he‘ene hū ki he ‘ao ‘o e ‘Eiki; pea ‘e fua ‘e ‘Ēlone ‘a e fakamāu‘anga ‘o ha‘a ‘Isileli ‘i he ‘ao ‘o e ‘Eiki ma‘u ai pē.#Nōm 27.21; Teu 33.8; ‘Ēsela 2.63; Nehe 7.65

Ko e ngaahi Teunga Fakataula‘eiki Kehe

(‘Eki 39.22-31)

31Pea te ke ngaohi ‘a e Kofu-tōtōlofa ‘o e ‘ēfoti ‘aki ‘a e me‘a lanu-langi pē, hono kotoa. 32Pea ko hono ava ki he ‘ulu ‘e tu‘u loto; pea ‘e ‘ai ha tepi takatakai ki he ava, ko e fai ‘e he tangata lalanga, ‘o hangē ko e ava ‘o ha kofu tau, na‘a mahae. 33Pea ‘i hono tapa ‘i lalo te ke tā ha ngaahi pomikānite ‘aki ‘a e lanu-langi, kula-po‘upo‘uli, mo e kula-‘aho‘aho, ke ‘osi ‘a e tapa takatakai; ‘o vahavaha‘i ‘aki ha ngaahi fafangu koula takatakai: 34ko ha fafangu koula mo ha pomikānite, ha fafangu koula mo ha pomikānite, ‘o takatakai ki he tapa‘i kofu ‘i lalo. 35Pea ‘e ‘ai kia ‘Ēlone ke fai‘aki ‘ene ngāue fakalotu: pea ‘e ongona hono le‘o ‘i he‘ene hū atu ki he Potu Tapu ki he ‘ao ‘o e ‘Eiki, pea ‘i he‘ene hū mai, ke ‘oua te ne mate.

36Pea te ke ngaohi ha lau‘i koula haohaoa; pea te ke tongi ai hangē ko e tongi ‘o ha sila, ‘o pehē, TĀPUHĀ KIA SIHOVA. 37Pea te ke ‘ai ki ha loufau lanu langi, pea ‘e tu‘u ia ‘i he tatā; ko e potu ki mu‘a ‘o e tatā ‘e tu‘u ai. 38‘Io, ‘e tu‘u ‘i he la‘e ‘o ‘Ēlone koe‘uhi ke fua ‘e ‘Ēlone ‘a e hia ‘a e ngaahi me‘a tapu, ‘a ia ka fakatāpui ‘e ha‘a ‘Isileli ‘i he fai ‘o ‘enau ngaahi me‘a‘ofa tapu kehekehe; pea ‘e tu‘u ia ki hono la‘e ma‘u pē ke hōifua ‘i he‘enau ngaahi me‘a ‘a e finangalo ‘o Sihova.

39Pea te ke lalanga pulepule‘i ‘a e sote ‘aki ‘a e vavae hinehina; pea te ke ngaohi ‘a e tatā ‘aki ‘a e tupenu hinehina; pea te ke ngaohi ha no‘o, ko e fai ia ‘e ha tuitui poto.

40Te ke ngaohi sote foki ki he ngaahi foha ‘o ‘Ēlone, pea te ke ngaohi mo hanau no‘o; te ke ngaohi mo hanau tatā fakamatala‘i‘akau ke nau hā lāngilangi‘ia mo masani. 41Pea te ke ‘ai ia ki ho tokoua ko ‘Ēlone, pea mo hono ngaahi foha fakataha; pea te ke pani kinautolu, pea te ke fakanofo kinautolu, mo fakatāpui, ke nau fai ‘a e ngāue fakataula‘eiki kiate au. 42Pea te ke ngaohi hanau talausese tupenu ke kofu ‘aki ‘enau telefua; ‘o fai mei he kongaloto ki he tenga: 43pea ‘e ‘ai kia ‘Ēlone, pea ki hono ngaahi foha, ‘oka nau ka hū ki he Tēniti Fe‘iloaki‘anga, pe ‘oka nau ka ‘unu‘unu ki he ‘ōlita ke fai ‘enau ngāue fakalotu ‘i he Potu Tapu; ke ‘oua na‘a hilifaki ha hia, ‘o nau mate ai. Ko e tu‘utu‘uni ta‘engata kiate ia mo hono hako ‘amui.

Currently Selected:

KO ‘EKISOTO 28: TMB

Highlight

Copy