KO ‘EKISOTO 26

Ko e Tāpanekale ‘Afio‘anga ‘o Sihova#26.1-37 Vakai ki he “Ngaahi Huluhulu”.

(‘Eki 36.8-38)

1PEA te ke ngaohi ‘a e Tāpanekale ‘aki ‘a e tupenu ‘e hongofulu; ‘a ia te ke ngaohi ‘aki ‘a e vavae hinehina kuo filo, pea ‘ai fakataha mo e lanu langi mo e kula-po‘upo‘uli mo e kula-‘aho‘aho, ke hā ai ha ngaahi selupimi: ko e fai ‘e he tangata lalanga. 2Ko e lōloa ‘o e tupenu takitaha ko e kiupite ‘e uofulu mā valu, pea ko e māukupu ‘o e tupenu takitaha ko e kiupite ‘e fā: ‘e fua tatau pē ‘a e tupenu kotoa pē. 3Ko e tupenu ko ē ‘e nima ‘e hokohoko ke taha, pea ko e tupenu ko ē ‘e nima ‘e hokohoko ke taha. 4Pea te ke ngaohi ‘a e ngaahi kavei lanu langi ‘i he tapa ‘o e tupenu ‘e taha, ‘i he taupotu ‘o e hoko; pea te ke ngaohi pehē foki ‘i he tapa ‘o e tupenu taupotu ‘i he matai-nima ‘e taha. 5Te ke ngaohi ha ngaahi kavei ‘e nimangofulu ‘i he tupenu ‘e taha, pea te ke ngaohi ha kavei ‘e nimangofulu ‘i he taupotu ‘o e tupenu ‘oku ‘i he matai-nima ‘e taha; ‘e fakafeu‘utaki ‘a e ngaahi kavei. 6Pea te ke ngaohi ha fakama‘u koula ‘e nimangofulu, pea te ke fakahoko ‘a e tupenu ko ē mo ē ‘aki ‘a e ngaahi fakama‘u, kae hoko ko e Tāpanekale pē taha.

7Pea te ke ngaohi tupenu fulufulu‘i kosi ki ha tēniti ke pulonga ‘aki ‘a e Tāpanekale: te ke ngaohi ia ko e tupenu ‘e hongofulu mā taha. 8Ko e lōloa ‘o e tupenu ‘e taha ko e kiupite ‘e tolungofulu, pea ko e māukupu ‘o e tupenu ‘e taha ko e kiupite ‘e fā; ‘e fua tatau pē ‘a e tupenu ‘e hongofulu mā taha. 9Pea te ke hoko ‘a e ngaahi tupenu ke matai-nima ē, matai-ono ē; pea te ke vaeua ‘a hono ono ‘o e tupenu ‘i he mata tēniti. 10Pea te ke ngaohi ha kavei ‘e nimangofulu ‘i he tapa ‘o e tupenu taupotu ‘i he matai-nima, mo e kavei ‘e nimangofulu ‘i he tapa ‘o e tupenu ‘i he matai-ono. 11Pea te ke ngaohi ha fakama‘u kapa ‘e nimangofulu, pea te ke fakahū ‘a e ngaahi fakama‘u ki he ngaahi kavei, ‘o fakahoko ‘a e tēniti ke taha pē. 12Pea ko e potu ‘oku tāupe, ‘a e me‘a ‘oku toe ‘i he ngaahi tupenu ‘o e tēniti, ‘io, ‘a e toe vaeua ‘o e tupenu, ‘e tāupe ia ‘i he taa‘i Tāpanekale ki kō. 13Pea ko e kiupite ‘oku toe ‘i he lōloa ‘o e ngaahi tupenu ‘o e tēniti, ‘i hē mo ē, ‘e tāupe ia ‘i he tafa‘aki ko ē mo ē ‘o e Tāpanekale.

14Pea te ke ngaohi ha ‘u‘ufi ki he matahoko ‘o e tēniti ‘aki ‘a e ngaahi kili‘i sipi tangata kuo fakalanukula; pea mo ha fakatefisi ‘aki ‘a e kili‘i tukongi.

15Pea te ke ngaohi ‘a e holisi ‘o e Tāpanekale ‘aki ‘a e papa sitimi ‘o fokotutu‘u. 16Ko e lōloa ‘o e papa ‘e taha ko e kiupite ‘e hongofulu, pea ko e kiupite mo e haafe ‘a e māukupu ‘o e papa. 17‘E ai ha ongo ‘elelo ‘e ua ‘i he papa ‘e taha, ‘o fakahoko ‘a e taha mo e taha:#26.17 ‘o fakahoko… taha; ‘Oku hiki he Sepituakiní: ‘o fakatokehekehe. ‘e pehē ho‘o fai ki he ngaahi laupapa kotoa pē ‘o e Tāpanekale. 18Pea ‘i ho‘o ngaohi holisi ki he Tāpanekale, te ke ngaohi ha papa ‘e uofulu ki he fa‘ahi ki he Tonga (‘a e fakato‘omata‘u). 19Pea te ke ngaohi ha tu‘unga siliva ‘e fāngofulu ke tu‘u ‘i he lalo uofulu‘i papa; ko e tu‘unga ‘e ua ki he lalo papa ko ē, ki hono ongo ‘elelo ‘o‘ona, mo e tu‘unga ‘e ua ki he lalo papa ko ē ki he ongo ‘elelo ‘o‘ona. 20Pea ki he tafa‘aki ko ē ‘o e Tāpanekale, ‘a e fa‘ahi ki tokelau, ‘e ngaohi ha papa ‘e uofulu; 21mo honau tu‘unga siliva ‘e fāngofulu, ko e tu‘unga ‘e ua ‘i he lalo papa ko ē, mo e tu‘unga ‘e ua ‘i he lalo papa ko ē. 22Pea ki he tā ‘o e Tāpanekale ki lulunga te ke ngaohi ha papa ‘e ono. 23Pea te ke ngaohi ha ongo papa ki he ngaahi tuliki ‘o e Tāpanekale ‘i he ongo tā. 24Pea te na pikiua ‘i lalo, pea fakataha kinaua mei ‘olunga ‘i he ‘uluaki kavei; ‘e fai pehē ki he ua ko ē foki; ko e me‘a ia ki he ongo tuliki. 25Pea ‘e valu ‘a e ngaahi papa, pea ko honau ngaahi tu‘unga siliva ko e tu‘unga ‘e hongofulu mā ono; ko e tu‘unga ‘e ua ki he lalo papa ko ē, mo e tu‘unga ‘e ua ki he lalo papa ko ē.

26Pea te ke ngaohi kiato ‘aki ‘a e ‘akau sitimi; ko e nima ki he ‘ū papa ‘o e fa‘ahi Tāpanekale ko ē, 27pea mo e kiato ‘e nima ki he ‘ū papa ‘o e fa‘ahi Tāpanekale ko ē; mo e kiato ‘e nima ki he ‘ū papa ‘o e tā ‘o e Tāpanekale ki lulunga. 28Pea ko e kiato loto ‘i he loto holisi ‘e tau mei potu ki potu. 29Pea te ke ‘u‘ufi ‘a e ngaahi laupapa ‘aki ‘a e koula, pea ko honau ngaahi kavei te ke ngaohi koula pē ke velo ai ‘a e ngaahi kiato; pea te ke ‘ufi‘ufi koula ‘a e ngaahi kiato. 30Pea te ke fokotu‘u ‘a e Tāpanekale ‘o fakatatau ki hono konisitūtone, ‘a ia na‘e tuku ke ke mamata ki ai ‘i he mo‘unga.

31Pea te ke ngaohi ha tatau ‘aki ‘a e lanu langi, mo e kula-po‘upo‘uli mo e kula-aho‘aho, mo e vavae hinehina kuo filo: te ke ngaohi ia ke hā ha ngaahi selupimi ‘i he lalanga: 32pea te ke tautau ia ‘i ha pou sitimi ‘e fā, kuo ‘u‘ufi koula, pea koula honau ngaahi tautau‘anga, ‘o nau tu‘u ‘i ha tu‘unga siliva ‘e fā. 33Pea te ke ‘ai ‘a e tatau fe‘unga mo e ngaahi fakama‘u ko ē, kae ‘i lalo; pea te ke fakahū ki hē, ki he loto tatau, ‘a e ‘a‘ake fakamo‘oni‘anga: pea ko homou ‘āvahevahe ia ‘o e Potu Tapu mo e Potu Toputapu.#Hep 6.19; 9.3-5 34Pea te ke ‘ai ‘a e hōifua‘anga ki he funga ‘a‘ake fakamo‘oni‘anga ‘i he Potu Toputapu. 35Pea te ke tuku ‘a e tēpile mei he tu‘a tatau, pea ko e tu‘unga maama ‘e fehangahangai mo e tēpile, ‘o tu‘u ‘i he fa‘ahi Tāpanekale ki he Tonga: pea ko e tēpile te ke ‘ai ki he fa‘ahi tokelau.

36Pea te ke ngaohi ha puipui ki he mata tēniti ‘aki ‘a e lanu langi, mo e kula-po‘upo‘uli, mo e kula-‘aho‘aho, mo e vavae hinehina kuo filo; ‘e fai ai ha ngāue ‘a e tuitui poto. 37Pea te ke ngaohi ki he puipui ko ia ha pou sitimi ‘e nima, pea te ke ‘u‘ufi koula ia, pea ‘e koula honau ngaahi tautau‘anga: pea te ke haka ki ai ha tu‘unga kapa ‘e nima.

Currently Selected:

KO ‘EKISOTO 26: TMB

Highlight

Copy