KO TEUTALŌNOME 7
7
Ko e Kakai Tonu ‘a e ‘Otuá
(‘Eki 34.11-16)
1KA fakahū koe ‘e Sihova ko ho ‘Otua ki he fonua ‘oku ke ‘alu ki ai ke ma‘u, pea kuo ne hu‘ihu‘i ha ngaahi kakai mei ho ‘ao, ‘a e Heti, mo e Keakesa, mo e ‘Āmoli, mo e Kēnani, mo e Pēlisi, mo Hevi, mo e Siepusi, ko e kakai ‘e fitu ‘oku lahi mo kaukaua ‘iate koe;#Ngā 13.19 2‘io, ka tuku atu kinautolu ‘i he ‘ao ‘e Sihova ko ho ‘Otua, ‘o ke taa‘i kinautolu; pea te ke taa‘i kinautolu ke ‘osi; ‘e ‘ikai te ke fai talite mo kinautolu, pe fai ha ‘ofa ki ai: 3pea ‘e ‘ikai te ke femali‘aki mo kinautolu; ‘e ‘ikai te ke ‘atu ho ‘ōfefine ki ho‘ona foha, pea ‘e ‘ikai te ke to‘o hano ‘ōfefine ma‘a ho foha. 4He te ne fakaafe ho foha mei he muimui kiate au ke nau tauhi ‘otua kehe: pea ‘e langa‘i ai ‘a e houhau ‘a Sihova kiate kimoutolu, ‘o ke ‘auha vave ai. 5Ka ko e anga eni ho‘o fai kiate kinautolu; te mou holoki honau ngaahi ‘ōlita, mo laiki honau ngaahi pou tapu, mo tā ‘enau ngaahi ‘āsela, mo tutu ‘enau ngaahi tamapua.#Teu 12.3 6He ko e kakai koe ‘oku tapu kia Sihova ko ho ‘Otua: kuo fili koe ‘e Sihova ko ho ‘Otua ke mou hoko ko ‘ene koloa kānokato ‘i he kakai kotoa ‘oku ‘i he funga ‘o māmani.#‘Eki 19.5; Teu 4.20; 14.2; 26.18; Tait 2.14; 1 Pit 2.9
7Na‘e ‘ikai hau‘alofa‘ia ‘a e ‘Eiki kiate kimoutolu, pe fili kimoutolu, koe‘uhi ko hamou tokolahi ‘i he ngaahi kakai; he ko e momo‘i me‘a koe, ‘o si‘i ‘i he kakai kotoa pē: 8ka koe‘uhiā na‘e ‘ofa kiate koe ‘e Sihova, pea koe‘uhi foki ko si‘ene fie tauhi ‘a e fuakava na‘a ne fakapapau ki ho‘omou ngaahi kui, ko hono ‘uhinga ia kuo fakahao mai ai koe ‘e Sihova ‘aki ha nima māfimafi, mo huhu‘i koe mei he fale pōpula, mei he nima ‘o Felo ko e Tu‘i ‘Isipite. 9Ko ia, ke ke ‘ilo ko Sihova ko ho ‘Otua ko ‘Elohimi pē ia; ko e ‘Otua Falala‘anga, ‘a ia ‘oku ne fakaai ‘ene fuakava mo ‘ene meesi kiate kinautolu ‘oku ‘ofa kiate ia, mo kinautolu ‘oku tauhi ‘ene ngaahi tu‘utu‘uni, ‘o fai atu ki he afe‘i to‘utangata:#‘Eki 20.5-6; 34.6-7; Nōm 14.18; Teu 5.9-10 10ka ko kinautolu ‘oku fehi‘a kiate ia ‘oku ne totongi ki honau mata, ‘o faka‘auha kinautolu; ‘e ‘ikai te ne faifaimālie ki ha taha ‘oku fehi‘a kiate ia, te ne totongi pē ki hono mata. 11Ko ia, te ke tauhi ‘a e fekau, mo e ngaahi lao mo konisitūtone, ‘a ia ‘oku ou kouna atu he ‘aho ni, ‘o mou fai ki ai.
Ko e ngaahi Tāpuaki ‘o e Talangofuá
(Teu 28.1-14)
12Pea ko e hoa ‘o ho‘omou tokanga‘i ‘a e ngaahi kupu‘i konisitūtone ko eni, mo ho‘omou tauhi ia ‘o fai ki ai, ko ia ‘e faifai pea fakaai ‘e Sihova ko ho ‘Otua ‘a ‘ene kovinānite mo koe, mo e ‘ofa na‘a ne fakapapau ki ho‘o ngaahi kui.#Teu 11.13-17 13Pea te ne ‘ofa‘i koe, mo tāpuaki‘i koe, ‘o fakatokolahi‘i koe: te ne tāpuaki‘i foki ‘a e tupu ‘o ho sino, mo e tupu ‘o ho kelekele, ‘a ho‘o koane mo ho‘o uaine mo ho‘o lolo, ‘a e fānau ‘a ho‘o fanga pulu, ‘a e fakahoa ‘a ho‘o fanga sipi mo kosi, ‘i he kelekele na‘a ne fuakava ai ki ho‘o ngaahi kui te ne ‘atu mo‘ou. 14Te ke hulu atu ‘i he kakai kotoa pē ‘i he fai tāpuekina: ‘e ‘ikai hao tangata pe fefine ‘e pa‘a, pea ‘e pehē mo ho‘o fanga manu. 15Pea ‘e ‘ave ‘e Sihova meiate koe ‘a e mahaki kotoa, pea mo e ngaahi mahaki kovi ‘a ‘Isipite, ‘a ia ‘oku ke maheni ai, ‘e ‘ikai te ne ‘ai kiate koe, ka te ne tuku kiate kinautolu ‘oku fehi‘a kiate koe. 16Pea te ke faka‘osi ‘a e ngaahi kakai kātoa, ‘a ia ‘e tuku atu kiate koe ‘e Sihova ko ho ‘Otua: ‘e ‘ikai te ke matamamae kiate kinautolu; pea ‘e ‘ikai te ke tauhi honau ngaahi ‘otua, he ko e tauhele ia kiate koe.
17Kapau ‘oku ke pehē ‘i ho loto, ‘Oku tokolahi ange ‘a e ngaahi pule‘anga ni ‘iate au; ‘o u lava fēfē ke kapusi kinautolu? 18‘a, ‘e ‘ikai te ke manavahē kiate kinautolu; te ke manatu ma‘u ki he ngaahi me‘a na‘e fai ‘e Sihova ko ho ‘Otua kia Felo, pea ki ‘Isipite kātoa; 19‘a e ngaahi fu‘u ‘ahi‘ahi na‘e sio ki ai ho mata, mo e ngaahi faka‘ilonga, mo e ngaahi mana, mo e nima māfimafi, mo e nima kuo hiki tā, ‘a ia na‘e ‘omi ‘aki koe ki tu‘a ‘e Sihova ko ho ‘Otua: ‘e pehē mo e fai ‘e Sihova ko ho ‘Otua ki he ngaahi kakai kotoa ‘oku ke manavahē ki ai. 20Kae‘uma‘ā foki, ko Sihova ko ho ‘Otua te ne fekau atu kiate kinautolu ‘a e langomū-hōneti, kae‘oua ke ‘osi mei homou ‘ao ‘a e toe kakai ‘oku toe.#7.20 te ne fekau… langomū-hōneti; pe te ne fekau atu kiate kinautolu ha ngaahi mahaki faka‘auha pe ‘ai ke lelea honau lotó. 21‘Oua te ke teki kiate kinautolu; he ko Sihova ko ho ‘Otua ‘oku ‘i ho lotolotonga, ko e ‘Otua lahi mo fakailifia. 22Pea ‘e faifaimālie ‘e Sihova ko ho ‘Otua ‘ene kapusi ‘a e ngaahi pule‘anga ko ē mei ho ‘ao: ‘e ‘ikai te ne faka‘osi kotoa leva, na‘a tupu mai ‘a e manu kaivao. 23Ka ‘e tuku li‘aki atu pē kinautolu ‘e Sihova ko ho ‘Otua, ‘o ne te‘ia kinautolu ‘aki ha tā lahi, kae‘oua ke nau ‘auha. 24Pea te ne tuku honau ngaahi tu‘i ki ho nima, pea te ke tāmate‘i honau hingoa mei he lalo langi: ‘e ‘ikai matu‘u ha toko taha ‘i ho ‘ao, kae‘oua ke ke faka‘auha kinautolu. 25Ko e ngaahi tamapua ‘o honau ngaahi ‘otua te ke tutu ‘i he afi: ‘e ‘ikai te ke mānumanu ki he koula mo e siliva ‘oku teu ‘aki, pe to‘o ia ma‘au, na‘a tauhele‘i ai koe: he ko e me‘a fakalielia ia kia Sihova ko ho ‘Otua. 26Pea ‘e ‘ikai te ke ‘omi ha fakalielia ki ho fale, na‘a ke hoko ko e mala‘ia ‘o hangē ko ia: te ke mātu‘aki fehi‘a ki ai, he ko e mala‘ia.
Currently Selected:
KO TEUTALŌNOME 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
