KO TEUTALŌNOME 33
33
1PEA ko eni ‘a e tāpuaki, ‘a ia na‘e tāpuaki ‘aki ‘a ha‘a ‘Isileli ‘e Mōsese ko e tangata ‘o ‘Elohimi, ‘i he te‘eki ke ne pekia. 2Pea ne pehē,
Na‘e hā‘ele mei Sainai ‘a Sihova,
‘O ne hopo hake kiate kinautolu mei Seia;
Na‘a ne ulo mei Mo‘unga Pēlana,
Pea ne tu‘u mai mei he mano‘i toputapu:
Mei hono to‘omata‘u na‘e tapa ‘a e afi kiate kinautolu.#33.2 Pea ne tu‘u… kinautolu. ‘Oku ‘ikai ke mahino ‘a hono faka-epeluú. ‘Oku ngali tonu hono hiki ‘o: Na‘e tu‘u fakataha mo ia ha kau ‘āngelo ‘e toko laui mano, ko e afi kakaha mei hono nima to‘omata‘ú.
3‘Io, ko e taha koe ‘oku ke ‘ofa ki he ngaahi fa‘ahinga;#33.3 ki he… fa‘ahinga; Ko hono faka-Hepeluú ia, ka ‘oku pehē he hiki fuoloa ‘e taha ki hono kakaí.
Ko hono kau tapu kātoa ‘oku ‘i ho nima:
Pea nofo ‘a kinautolu ‘i ho va‘e na;#33.3 nofo… va‘é na; ‘Oku ‘ikai ke mahino ‘a hono faka-Hepeluú, ka ngali tonu hono hiki ‘o: Pea mau punou kimautolu ki hono va‘é.
Tali takitaha ho‘o ngaahi lea.
4Na‘e fokotu‘u mai ha lao ‘e Mōsese,
Ko e koloa ‘o e fakataha ‘o Sēkope.
5Pea na‘e tu‘i ia ‘i Sesuluni,
‘Oka fakataha ‘a e hou‘eiki ‘o e kakai,
Fakatefua ‘a e ngaahi matakali ‘o ‘Isileli,
6Ke mo‘ui ‘a Lūpeni, ‘o ‘oua ‘e mate;
Pe hoko hono kakai ko e toko si‘i pē.#33.6 Pe… si‘i pē; ‘Oku hiki ‘e he ni‘ihi: Kae hoko hono kakai ko e toko si‘i pē.
7Pea ko eni ‘a e me‘a ‘a Siuta, pea ne pehē,
Fanongo ki he le‘o ‘o Siuta, ‘Eiki,
Pea ‘omi ia ki hono kakai:
Ke lahi mo‘ona hono ivi,
Pea ke hoko koe ko hono tokoni.#33.7 Ke lahi… ko hono tokoni. ‘Oku ngali tonu hono hiki ‘o: Tau ma‘anautolu, ‘e Sihova, peá ke tokoni‘i ‘enau tau mo honau ngaahi filí; ka ko hono faka-Hepeluú ‘E tau pē ‘a e matakali Siutá ‘iate ia, pea ‘e tokoni ki ai ‘a Sihova.
8Pea ne pehē ‘ia Līvai,#‘Eki 17.7; 28.30; Nōm 20.13
Ke ‘i ho tangata lotu mo‘oni
‘A ho‘o Tūmemi mo ‘Ūlimi,#33.8 ‘Ūlimi mo e Tūmemi; Ko e ongo nāunau na‘e fai ‘aki e fekumi pe ko e hā e finangalo ‘o e ‘Otuá. ‘Oku ‘ikai ‘ilo pau ‘a e anga hono ngāue‘akí.
‘A ia na‘a ke sivi ‘i Masa,
Na‘a mo fetakai ‘i Vai-Mēlipa;
9‘A ia na‘a ne pehē ki he‘ene tamai mo fa‘ē,
‘Oku ‘ikai te u sioa;
Pea na‘e ‘ikai te ne tokanga‘i hono kāinga,
Pe ‘ilo ‘ene fānau ‘a‘ana;
He kuo nau tauhi ho‘o folofola,
Mo fai ki ho‘o fuakava.
10Te nau ako ho‘o konisitūtone kia Sēkope,
Mo ho lao ki ‘Isileli:
Te nau ‘omi ‘inisēnisi ki ho fofonga,
Mo feilaulau-mōifua ki ho‘o ‘ōlita.
11Tāpuaki, ‘Eiki, ‘ene koloa,
Pea tali ‘a e ngāue ‘a hono nima:
Taa‘i ‘a e tenga ‘o e kakai ‘oku tu‘u ki ai,
Mo kinautolu ‘oku fehi‘a kiate ia,
Ke ‘oua te nau tu‘u hake mai.
12Pea ‘ia Penisimani na‘a ne pehē,
Ko e pele ‘a Sihova
Te ne nofo ‘iate ia, ‘o loto nonga;
‘Oku ne fakapūlou ia ‘i he ‘aho kotoa,
Pea ne nofo ‘i hono vaha‘a uma.#33.12 Peá ne… uma; pe Peá ne nofo ‘i honau lotolotongá (‘o ha‘a Penisiamaní). Pe Pea nau nofo ‘i he malumalu ‘o ‘ene malu‘i kinautolu.
13Pea ‘ia Siosifa na‘a ne pehē,
Ke fai tāpuekina meia Sihova ‘a hono fonua;
‘I he koloa ‘o langi ko e hahau na,
Pea ‘o e moana ‘oku toka ‘i lolofonua.
14Mo e koloa ko e fua ‘o e la‘ā.
Mo e koloa tupu mei he ngaahi māhina,
15Mo e ngaahi me‘a fungani ‘o e ‘otu mo‘unga mu‘a,
Mo e koloa ‘o e ngaahi mo‘unga tuputupu‘a.
16Mo e koloa ‘o e kelekele, mo hono mahu ‘ona,
Mo e ‘ofa ‘A‘ana na‘e ‘afio ‘i he Talatala‘āmoa:
Ke hoko ia ki he ‘ulu ‘o Siosifa,
‘Io, ki he tumu‘aki ‘o ia na‘e makehe mo hono ngaahi tokoua.
17Ko e ‘olopo‘ou ‘o ‘ene pulu–‘oku ‘ona ‘a e lāngilangi ē,
Pea ko hono nifo ko e nifo‘i pufaloe:
Te ne tui‘i ‘aki ‘a e ngaahi kakai fakataha,
‘Io, ‘a e ngaahi ngata‘anga ‘o e fonua;
‘Io, ko e toko‘i mano ‘o ‘Ifalemi ena,
Mo e ngaahi toko afe ‘o Manase ia.
18Pea ‘ia Sepulone na‘a ne pehē,
Hākahaka ‘a Sepulone ‘i ho‘o ‘alu ki tu‘a
Pea ‘i ho‘o nofo tēniti, ‘e ‘Īsaka.
19Te na ui ‘ani kakai ki he mo‘unga;
Te nau feia ai feilaulau-fakatonuhia:
He te nau misi ‘a e mahu ‘o e ngaahi tahi ē,
Mo e koloa kuo fufū ‘i he ‘one‘one.
20Pea ‘ia Kata na‘a ne pehē,
Fakafeta‘i kiate ia ‘oku ne fakalaulahi ‘a Kata;
‘Oku ne nofo hangē ha laione toutama,
21Pea ne toka ‘a e tu‘unga mu‘a mo‘ona,
He na‘e ta‘ofi ai ‘a e ‘inasi ‘o e tāimu‘a;
Pea ne ha‘u mo e hou‘eiki ‘o e kakai,
Na‘a ne fakaai ‘a e faitotonu ‘a e ‘Eiki,
Mo ‘ene ngaahi fakamaau, fakataha mo ‘Isileli.#33.21 Mo ‘ene… ‘Isileli; ‘Oku ‘ikai ke mahino ‘a hono faka-Hepeluú, ka ‘oku pehē he hiki fuoloa ‘e taha ‘I he haha‘o fakataha ‘a e kau taki ‘o ‘Isilelí.
22Pea ‘ia Tani na‘a ne pehē,
Ko e laione mui ‘a Tani,
‘Oku hopo mai mei Pēsani.
23Pea ‘ia Nafitalai na‘a ne pehē,
Nafitalai ē, ngoto ‘i he ‘ofa,
Pea fonu ‘i he tāpuaki ‘a Sihova,
Ma‘u koe ‘a e tahi mo e tonga.
24Pea ‘ia ‘Āseli na‘a ne pehē,
Ke tāpuekina lahi ‘a ‘Āseli ‘i he fānau na;
Ke ne ‘ofeina ‘i hono ngaahi tokoua,
Pea unu ‘i he lolo hono va‘e na.
25‘E ‘aione mo kapa ho sū,
Pea ‘e fe‘unga mo ho ngaahi ‘aho ‘a ho ngū.
26‘Oku ‘ikai ha taha ‘oku tatau mo e ‘Otua ‘o Sesuluni,
‘Oku ne hekasi he langi ‘i ho tokoni,
Mo e ‘atā, kuo pehē hono lāngilangi.
27Ko e ‘Otua mei tuai ‘a ho nofo‘anga,
Pea ‘oku kilala koe ‘e he nima ta‘engata:
Pea ‘oku ne folofola, Faka‘auha mu‘a.
28Pea ko ‘Isileli ‘oku nofo nonga,
‘A e matavai ‘a Sēkope toko taha
‘I ha fonua uite‘ia mo uaine‘ia,
‘Io, ‘oku to‘i hahau hono langi na.
29Monū‘ia ā ka ko koe, ‘Isileli:
Ko hai ‘oku hangē ko koe, ko e kakai fakamo‘ui ‘e he ‘Eiki,
‘A ia ko e pā ‘o ho tokoni,
Pea ko koe te ke malaki honau ngaahi potu mā‘olunga.
Currently Selected:
KO TEUTALŌNOME 33: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
