KO TEUTALŌNOME 34
34
Ko e Pēkai ‘a Mōsesé
1PEA ‘alu hake ‘a Mōsese mei he ‘Alapā ‘o Moape ki he mo‘unga ko Nipo, ko e tumu‘aki ‘o Pīsika, ‘a ia ‘oku ‘i he hāngai ki Sielikō. 2Pea fakahā kiate ia ‘e he ‘Eiki ‘a e fonua kotoa ‘o Kiliati, ‘o a‘u ki Tani; mo Nafitalai kātoa, mo e fonua ‘o ‘Ifalemi mo Manase, mo e fonua kotoa ‘o Siuta, ‘o a‘u ki he tahi lulunga: 3mo e feitu‘u ko Tonga, mo e Seakale ‘o e tele‘a ‘o Sielikō ko e kolo paame, ‘o a‘u ki Soa. 4Pea folofola ‘a e ‘Eiki kiate ia, Ko e fonua eni na‘a ku fuakava ai kia ‘Epalahame, kia ‘Aisake, pea kia Sēkope, ‘o pehē, Ko ho hako te u foaki ki ai; kuo u tuku ke ke sio ki ai ‘aki ho mata, kae ‘ikai te ke ‘alu ki ai.#Sēn 12.7; 26.3; 28.13
5Ko ia na‘e pekia ‘i he potu ko ia ‘a Mōsese ko e Sevāniti ‘a Sihova, ‘i he fonua ‘o Moape, ‘i he funga ‘o e folofola tonu ‘a Sihova. 6Pea na‘a Ne tanu ia ‘i he tele‘a, ‘i he fonua ‘o Moape, ‘o hanga ki Pete-Peoli: ka ‘oku ‘ikai ‘ilo ha taha ki hono fa‘itoka ‘o a‘u ki he ‘aho ni. 7Pea kuo teau mā uofulu ta‘u ‘a Mōsese ‘i he‘ene pekia, kuo ‘ikai nenefu hono mata, pe taumatala hono ivi. 8Pea na‘e tēngihia ‘a Mōsese ‘e ha‘a ‘Isileli ‘i he ‘Ālana ‘o Moape ‘o ‘aho tolungofulu: pea toki ‘osi ‘a e ngaahi ‘aho tēngihia ‘i he me‘a faka‘eiki ‘o Mōsese.
9Pea ko Siosiua ko e foha ‘o Nuni na‘a ne fonu ‘i he laumālie ‘o e poto; he kuo hilifaki nima ki ai ‘a Mōsese: pea na‘e fakaongo kiate ia ‘e ha‘a ‘Isileli, ‘o nau fai ‘o hangē ko e tu‘utu‘uni ‘a Sihova kia Mōsese.
10Pea talu ai kuo ‘ikai tupu ‘i ‘Isileli ha palōfita hangē ko Mōsese, ‘a ia ko ‘ena fe‘iloaki mo Sihova ko e femātaaki;#‘Eki 33.11 11‘i he ngaahi faka‘ilonga mo mana na‘e fekau ia ‘e Sihova ke fai ‘i ‘Isipite kia Felo, pea ki he‘ene kau tamaio‘eiki, pea ki hono fonua kotoa: 12pea ‘i he ngaahi tā mālohi mo e fu‘u fakangeingei, ‘a ia na‘e feia ‘e Mōsese ‘i he ‘ao ‘o ‘Isileli kātoa.
Currently Selected:
KO TEUTALŌNOME 34: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
