KO TEUTALŌNOME 32

1FOKOTU‘U telinga mai, ‘a langi ka u lea atu;

Pea fakafanongo ‘a māmani, ki he ngaahi lea ‘a hoku ngutu:

2‘E tō ‘eku akonaki hangē ko e ‘uha,

Pea mokulu hangē ko e hahau ‘eku lea;

Hangē ko e taumosi ki he musie toki tupu,

Mo e lōvai ki he mohuku:

3He te u fanongonongo ‘a e huafa ‘o Sihova:

Mou tuku ‘a e mā‘olunga ‘o hotau ‘Otua.

4Ko Makatu‘u ia–‘oku haohaoa ‘ene ngāue;

Ko ‘ene ngaahi founga kotoa ‘oku fakakonisitūtone:

Ko e ‘Otua ‘o e Mo‘oni, pea ta‘eha‘ane hala,

5Kuo nau fai kākā ki ai

(tala‘ehai ko ‘ene fānau, ko honau mele pē);#32.5 Kuo nau fai kākā… ko honau mele pē; ‘Oku ‘ikai ke mahino ‘a hono faka-Hepeluú. Ngalingali ko hono ‘uhingá Ka ko e kakai kākā kimoutolu, ‘oku ‘ikai ke mou taau ke hoko ko hono kakaí.

Ko e to‘utangata fāsi‘a mo angakehe.

6‘Oku pehē koā ho‘omou totongi ‘a e ‘Eiki,

‘A e kakai vale mo ta‘e‘atamai?

‘Ikai ko ho‘o tamai ia na‘e ma‘u koe?

Kuo ne ngaohi koe, mo fokotu‘u koe?

7Manatu‘i ‘a e ngaahi ‘aho mu‘a,

Fakakaukau ki he ta‘u ‘o e ngaahi to‘utangata:

Fehu‘i ki ho‘o tamai, pea te ne tala kiate koe;

Ki ho kau mātu‘a, pea te nau lea kiate koe.

8‘I he vahe tofi‘a ‘e ‘Elioni ki he ngaahi pule‘anga,

‘I he‘ene tufaki ‘a e hako‘i tangata,#Ngā 17.26

Na‘a ne hunuki ‘a e kau‘ā ‘o e ngaahi kakai,

‘O fakatatau ki he lau ‘o ha‘a ‘Isileli.

9He ko hono kakai ‘a e ‘inasi ‘o Sihova;

Ko Sēkope ko e kinikini ‘o hono tofi‘a.

10Na‘a ne ‘ilo ia he fonua toafa,

‘I he fonua mamate mo ‘u‘ulu mo lālāfua‘a;

Na‘a ne kāpui ia, na‘a ne nofo‘aki lama,

Na‘a ne tauhi ia hangē hono tama‘imata.

11Hangē ha ‘īkale ‘oku ue‘i hono pununga,

‘O ne puna mo hono fānganga mei ‘olunga,#32.11 ‘O ne… ‘olunga; pe ‘O ne ako‘i hono fāngangá ke puna; pe ‘O ne tokanga‘i hono fāngangá.

Pehē ‘ene folahi hono kapakau, ‘o kilala ia,

‘I hono funga fulufulu ‘oku ne fua:

12Na‘e taki ia ‘e Sihova toko taha pē,

Pea na‘e ‘ikai ō mo ia ha ‘otua kehe

13Na‘a ne tuku ke ne fakateka ‘ene sāliote

‘I he ngaahi potu mā‘olunga ‘o e fonua,

Pea ne kai ‘a e tupu ‘o e ngoue‘anga;

Pea ne tuku ke ne misi honi mei he makatu‘u,

Mo e lolo mei he maka hangē ha makahunu;

14‘a e pota ‘o e pulu, mo e huhu‘a ‘o e sipi,

Mo e ngako ‘o e fanga lami,

Mo e sipi tangata faka-Pēsani, mo e fanga kosi,

Mo e ‘elito‘i uite;

Pea mei he toto ‘o e kālepi na‘a ke inu uaine.

15Ka ‘i he sino leva ‘a Sesuluni, pea ne ‘aka–

Kuo ke sino, kuo ke nga‘eke, kuo ke putoputa!–

Pea ne toki li‘aki ‘a e ‘Otua na‘e ngaohi ia,

‘O ne va‘inga‘aki hono makatu‘u fakamo‘ui‘anga.

16Na‘a nau fakafua‘a‘i ia ‘aki hani kehe,

Na‘a nau fakatupu ‘ene houhau ‘aki ha koto fakalielia pē.

17Na‘a nau feilaulau ki hani fa‘ahikehe ‘ata‘i ‘otua,#1 Kol 10.20

Koni ‘otua na‘e ‘ikai te nau ‘iloa,

Koni fo‘ou toki tupu ni,

Na‘e ‘ikai vavana ai ho‘omou ngaahi kui.

18Kuo ngalo ‘a e Makatu‘u na‘e fakatupu koe,

Pea kuo ke fakatukutuku‘i ‘a e ‘Otua na‘e fā‘ele‘i koe.

19Pea ‘afio‘i ‘e Sihova, ‘o ne fakalili‘a ki ai,

He ko ‘ene fānau tangata mo fānau fefine kuo nau fai fakamamahi.

20Pea ne folofola,

Te u hanga kehe pē,

Ka u vakai pe te nau iku fēfē:

He ko e to‘utangata fulikivanu ena,

21Kuo nau fakafua‘a‘i au ‘aki ha ‘ata‘i ‘Otua;#1 Kol 10.22; Lom 10.19

Kuo nau fakamamahi au ‘aki ‘enau ngaahi muna:

Ko ia ko au te u fakafua‘a‘i kinautolu ‘aki ha ‘ata‘i kakai;

Ko e pule‘anga vale te u fakamamahi ‘aki.

22He kuo tupu ha afi ‘i he‘eku tuputāmaki,

Pea ‘oku vela ‘o a‘u ki he takele ‘o Hētesi,

Pea ‘oku ne keina ‘a māmani mo hono fua,

Pea ‘oku tutu ai ‘a e tefito ‘o e ngaahi mo‘unga.

23Te u pae atu ‘a e kovi kiate kinautolu:

Te u faka‘osi ki ai ‘eku ngaahi ngahau.

24Ka vaivai ‘i he honge, pea ‘osi‘osi ‘i he mofi,

Mo e faka‘auha kona‘ī‘ī,

Te u toki fekau atu ‘a e nifo ‘o e fanga manu,

Mo e huhu‘a kona ‘o e ngaahi me‘a ‘oku totolo ‘i he efu.

25‘I tu‘a, ‘e fakaeve ‘e he heletā,

Pea fai ‘i loki ‘e he ilifia;

Ko e fatutangata mo e tāupo‘ou fakataha,

Ko e kei huhu mo e ‘ulu hinā.

26Na‘a ku pehē, Te u ifi‘i kinautolu,

Te u fakangata mei he kakai honau manatu:

27Ka ne ‘oua ‘eku manavahē ki he manuki ‘a e fili,

Na‘a ma‘u hala ‘e honau kau fakamamahi;

Na‘a nau pehē, Ko hotau nima ne mālohi,

Pea ‘oku ‘ikai ko Sihova kuo fai ‘a e fu‘u me‘a ni.

28He ko e pule‘anga ia ta‘eha taha ke fale‘i,

‘Oku ‘ikai ‘iate kinautolu ha ‘atamai.

29Taumaiā ke nau poto, ke nau ‘ilo ki he me‘a ko ē,

Ke nau fakakaukau ki honau mole!

30‘O tuli fēfē ha afe ‘e ha toko taha, pe langa‘i ha mano ‘e ha toko ua,

Ka ne ‘ikai fakatau kinautolu ‘e honau Makatu‘u,

Pea ko Sihova kuo ne li‘aki atu?

31He ‘oku ‘ikai tatau honau makatu‘u mo ho‘otautolu ni,

Na‘a mo hotau ngaahi fili te nau fakamo‘oni ki ai.

32He ko ‘enau vaine ‘oku mei he vaine ‘o Sōtoma,

Pea mei he ngaahi ngoue ‘a Komola;

Ko e kālepi ‘ahu ‘a ‘enau kālepi na,

Ko e ngaahi fuhinga ifo kona.

33Ko ‘enau uaine ko e me‘a kona ‘a e fanga ata.

34‘Ikai ‘oku fufū ia mo kita,

‘O sila‘i ‘i hoku ngaahi falekoloa?

35‘Oku ‘a‘aku ‘a e sauni, mo e ‘atu hono tuha,#Lom 12.19; Hep 10.30

‘I he taimi ‘oku heke ‘a e va‘e ‘onautolu na:

He kuo ofi ‘a e ‘aho ‘o honau mala,

Pea ‘oku fakato‘oto‘o mai honau nunu‘a.

36He ‘e fai ‘e he ‘Eiki ‘a e fakamaau ‘o hono kakai,#Saame 135.14

Pea te ne lolou telia ‘ene kau tamaio‘eiki;

Pea ‘oku ‘ikai kei toe ha mo‘ua pe ha tau‘atāina.

37Pea te ne pehē, Koma‘ā honau ngaahi ‘otua,

‘A e makatu‘u na‘a nau hūfanga ki ai mu‘a.

38‘A ia na‘a nau kai ‘a e ngako ‘o ‘enau ngaahi feilaulau,

‘O inu ‘a e uaine na‘e lilingi mo‘onautolu?

Ke tu‘u mu‘a kinautolu, ‘o tokoni atu,

Ke hoko kinautolu ko honau fakamalumalu.

39Uē! vakai, ko au, ko au pē ia,

Pea ‘oku ‘ikai ha ‘otua mo kita:

Ko au ‘oku ou fai ‘a e tāmate, pea u fai mo e fakaola,

Kuo u tā, pea u faito‘o ‘a e lavea;

Pea ‘oku ‘ikai ha taha te ne fakahaofi mei hoku nima.

40He ‘oku ou hiki ki langi hoku nima,

Pea u pehē, Tangi ‘eku mo‘ui ‘o ta‘engata.

41Kapau te u faka‘alo ‘eku heletā fetapatapaki,

Pea ala ki he fakamaau hoku nima ni,

Te u toki fai sauni ki hoku ngaahi fili,

Pea u ‘atu hono tuha kiate kinautolu ‘oku fehi‘a mai.

42Te u ‘ai ke mākona ‘eku ngaahi ngahau ‘i he toto,

Pea ko ‘eku heletā te ne kai kakano–

‘a e toto ‘o e mate mo e ‘ave pōpula–

‘a e kakano mei he ‘ulu ‘o e hou‘eiki ‘o e fili na.

43Mou fiefia, ‘a e ngaahi pule‘anga, fakataha mo ho‘ona kakai:#Lom 15.10; Fkhā 19.2

He te ne sauni ‘a e toto ‘o ‘ene kau tamaio‘eiki,

Pea te ne ‘atu ‘a e tuha ki hono ngaahi fili,

Mo fai fakalalo ma‘a hono kelekele, ma‘a hono kakai.

44Pea ha‘u ‘a Mōsese, ‘o ne ‘a‘au ‘a e ngaahi lea ‘o e ta‘anga ni ‘i he telinga ‘o e kakai, ‘e ia mo Hosea ko e foha ‘o Nuni.

45Pea ‘i he ‘osi ‘e Mōsese ‘ene lea‘aki ‘a e ngaahi lea ni ki ha‘a ‘Isileli kotoa. 46Na‘a ne pehē kiate kinautolu, Mou ‘ai homou loto ki he ngaahi me‘a ‘oku ou fakapapau atu he ‘aho ni, ‘a ia te mou tu‘utu‘uni ki ho‘omou fānau, ke tauhi mo fai ‘a e ngaahi lea kotoa ‘o e lao ni. 47He tala‘ehai ko e me‘a ma‘ama‘a ia kiate kimoutolu; he ko ho‘omou mo‘ui‘anga, ‘io, ko e me‘a ni ‘e fakalahi ai homou ngaahi ‘aho ‘i he kelekele ‘oku ke ‘amanaki a‘a ‘i Soatani ke ma‘u.

48Pea folofola ‘a Sihova kia Mōsese ‘i he ‘aho pē ko ia, ‘o pehē,#Nōm 27.12-14; Teu 3.23-27 49‘Alu hake ki he mo‘unga ‘o ‘Apalemi ni ko Nipo, ‘a ia ‘oku ‘i he fonua ‘o Moape ‘o hanga ki Sielikō; pea ke mamata ai ki he fonua ko Kēnani, ‘a ia ‘oku ou ‘atu ki ha‘a ‘Isileli ke tofi‘a ‘aki: 50pea ke pekia ‘i he mo‘unga ‘oku ke ‘alu hake ki ai, ka ke ului ai ki ho kakai; ‘o hangē na‘e pekia ho ta‘okete ko ‘Ēlone ‘i mo‘unga Hoa, ‘o ne ului ai ki hono kakai. 51Koe‘uhi ā na‘a mo fai hala kiate au ‘i he lotolotonga ‘o ha‘a ‘Isileli ‘i Vai-Mēlipa ‘i Kētesi, ‘i he Toafa ‘o Sini; koe‘uhi na‘e ‘ikai te mo fakatāpuhaa‘i au ‘i he lotolotonga ‘o ha‘a ‘Isileli, 52he te ke mamata tonu ki he fonua; ka ‘e ‘ikai te ke hū ki ai, ki he fonua ‘oku ou foaki ki ha‘a ‘Isilel.

Currently Selected:

KO TEUTALŌNOME 32: TMB

Highlight

Copy

Compare