KO TEUTALŌNOME 26
26
Ko e Tukumo‘ui he Ututa‘ú
1PEA ka faifai pea ke hū ki he fonua, ‘a ia kuo foaki kiate koe ‘e Sihova ko ho ‘Otua mo‘ao tofi‘a, pea kuo ke ma‘u ia ‘o nofo ai; 2te ke to‘o ha me‘a mei he polopolo ‘o e ngaahi fua kotoa pē ‘o e kelekele, ‘a ia te ke utu mei he fonua kuo foaki kiate koe ‘e Sihova ko ho ‘Otua; pea te ke ‘ai ia ki ha kato, pea te ke ‘alu ki he potu ‘e fili ki ai ‘e Sihova ko ho ‘Otua ke ‘afio ai hono huafa.#‘Eki 23.19 3Pea te ke a‘u ki he taula‘eiki ‘o e taimi ko ia, pea te ke pehē kiate ia, ‘Oku ou fakamo‘oni he ‘aho ni kia Sihova ko ho ‘Otua, kuo u hū ki he fonua na‘e fuakava ai ‘e Sihova ki he‘etau ngaahi kui te ne ‘omi mo‘otautolu.
4Pea ‘e to‘o ‘e he taula‘eiki ‘a e kato mei hono nima, pea te ne tuku ‘i he ‘ao ‘o e ‘ōlita ‘a Sihova ko ho ‘Otua. 5Pea te ke fokotu‘u atu ho‘o lea ‘i he ‘ao ‘o Sihova ko ho ‘Otua, ‘o pehē, Ko e motu‘a Sīlia tuēnoa ‘a hoku tupu‘anga, pea ne ‘alu hifo ki ‘Isipite, pea ne nofo muli ai ko e momo‘i kakai; pea ne hoko ai ko e pule‘anga lahi, mo kaukaua, mo kakai: 6pea ngaohikovi‘i kimautolu ‘e he kau ‘Isipite, mo nau fakamamahi‘i, mo nau hilifaki mai ha fatongia faingata‘a. 7Pea na‘a mau tautapa kia Sihova ko e ‘Otua ‘o homau tupu‘anga, pea na‘e ongo‘i ‘e Sihova homau le‘o, ‘o ne ‘afio‘i ‘emau mamahi, mo ‘emau ongosia, mo homau fakamo‘ulaloa‘i: 8pea na‘e fakahao mai kimautolu ‘e Sihova mei ‘Isipite, ‘aki ha tā mamafa, mo e nima kuo hiki tā, mo e fakangeingei lahi, mo e ngaahi faka‘ilonga, mo e ngaahi mana; 9pea kuo ne ‘omi kimautolu ki he potu ni, pea kuo ne foaki mai ‘a e fonua ni, ko e fonua ‘oku mahutafea ‘i he hu‘akau mo e honi. 10Pea ko ia, ko au eni kuo u ha‘u mo au ‘a e polopolo ‘o e fua ‘o e kelekele, ‘a ia ne foaki kiate au ‘e he ‘Afiona. Pea te ke tuku hifo ia ‘i he ‘ao ‘o Sihova ko ho ‘Otua, pea te ke fai ho‘o lotu ‘i he ‘ao ‘o Sihova ko ho ‘Otua:
11pea te ke fakafiefia ‘i he ngaahi lelei kehekehe kuo ‘omi ‘e Sihova ko ho ‘Otua kiate koe, pea ki ho fale, ‘e koe, mo e Līvai, mo e muli ‘oku nofo ‘i ho lotolotonga.
12Ka ‘osi leva ho‘o vahe ‘a e tukuhau-hongofulu ‘o ho fua kotoa pē ‘oku tukuhau, ‘i hono tolu ‘o e ta‘u, ‘a ia ko e ta‘u ‘o e tukuhau-hongofulu, pea te ke toki ‘ange ia ki he Līvai, ki he muli, ki he tamai mate mo e uitou, ke nau kai ia ‘i ho kolo ke nau mākona.#Teu 14.28-29 13Pea te ke lea ‘i he ‘ao ‘o Sihova ko ho ‘Otua, ‘o pehē, Kuo ‘osi‘osingamālie ‘eku fetuku ‘a e ngaahi me‘a tapu mei hoku fale, pea kuo u foaki ia foki ki he Līvai, mo e muli, ki he tamai mate mo e uitou, ‘o tatau mātē mo e tu‘utu‘uni na‘a ke fai kiate au: kuo ‘ikai te u laka kehe mei ho‘o tu‘utu‘uni, 14pea kuo ‘ikai ngalo ha me‘a: kuo ‘ikai te u kai mei ai kuo u tauanga‘a, pea kuo ‘ikai te u fetuku ha me‘a kuo u ta‘ema‘a, pea kuo ‘ikai te u foaki hano me‘a ki ha pekia:#26.14 ki ha pekia; pe ma‘á ha pekiá. kuo u fakaongo ki he le‘o ‘o Sihova ko hoku ‘Otua, kuo u fai ‘o tatau mate mo ho‘o tu‘utu‘uni mai. 15Hāngai fofonga hifo mai mei ho ‘afio‘anga tapu na, ‘io, mei langi, pea ke tāpuaki ho kakai ‘Isileli, mo e kelekele kuo ke foaki kiate kimautolu, ‘o hangē ko ho‘o fuakava ki he‘emau ngaahi kui, ko e fonua ‘oku mahutafea ‘i he hu‘akau mo e honi.
Ko e Kakai Tonu ‘a e ‘Eikí
16Ko e ‘aho ni ‘oku kouna koe ‘e Sihova ko ho ‘Otua, ke tauhi ‘a e ngaahi fekau ni mo konisitūtone: ko ia ke ke tokanga ke fai ki ai ‘aki ‘a e kotoa ‘o ho loto mo e kotoa ‘o ho laumālie. 17Kuo ke fakapapau he ‘aho ni ko Sihova ko ho ‘Otua ia, pea te ke fou ‘i hono ngaahi hala, pea te ke tauhi ‘ene ngaahi fekau mo tu‘utu‘uni mo konisitūtone, pea te ke fakaongo ki hono le‘o: 18pea kuo fakapapau ‘e Sihova he ‘aho ni ko si‘ene kakai kānokato koe, ‘o hangē ko ‘ene folofola kiate koe, ka ke tauhi ‘ene ngaahi tu‘utu‘uni kotoa pē:#‘Eki 19.5; Teu 4.20; 7.6; 14.2; Tait 2.14; 1 Pit 2.9 19pea ke ne ‘ai koe ke mā‘olunga taha ‘i he kakai kotoa pē kuo ne ngaohi, ‘i he fakamālō‘ia, mo e ongoongoa, mo e lāngilangi‘ia;#26.19 pea ke ne ‘ai koe ke mā‘olunga… lāngilangi; pe pea te ne… mo lāngilangi‘ia ‘iate koe. pea koe‘uhiā ke ke hoko ko e kakai tāpuhā kia Sihova ko ho ‘Otua, ‘o hangē ko ‘ene folofola.
Currently Selected:
KO TEUTALŌNOME 26: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
