KO TEUTALŌNOME 23
23
Ko Hono Motuhi ha Taha mei he Kakaí
1‘E ‘ikai hū ki he fakataha ‘a e ‘Eiki ‘a e toko taha kuo faito‘o, pe kuo tu‘usi hono potu.
2‘E ‘ikai hū ki he fakataha ‘a e ‘Eiki ha tupu fe‘auaki; na‘a mo e hongofulu‘i to‘utangata ‘o hono hako ‘e ‘ikai hū ki he fakataha ‘a e ‘Eiki.
3‘E ‘ikai hū ki he fakataha ‘a e ‘Eiki ha ‘Āmoni pe ha Moape; na‘a mo e hongofulu‘i to‘utangata ‘o hono hako ‘e ‘ikai hū ha taha ki he fakataha ‘a e ‘Eiki, ‘o ta‘engata:#Nehe 13.1-2 4koe‘uhiā na‘e ‘ikai te nau tali koe ‘i he hala ‘aki ha me‘akai mo e vai, ‘i ho‘omou omi mei ‘Isipite; pea koe‘uhi na‘a nau nō ‘a Pēlami foha ‘o Peoli mei Pētoli ‘i Mesopotēmia, ke ta‘ofi koe mo tukitala‘i.#Nōm 22.1-6 5Ka na‘e ‘ikai finangalo ‘a e ‘Eiki ko ho ‘Otua ke tokanga kia Pēlami; ka ka liliu ‘e Sihova ko ho ‘Otua ‘a e mala ko ha monū, koe‘uhiā na‘e ‘ofa kiate koe ‘e Sihova ko ho ‘Otua.#Nōm 23.7–24.9 6‘E ‘ikai te ke feinga‘i ha‘anau lelei pe tu‘umālie lolotonga ho‘o mo‘ui, ‘o ta‘engata.
7‘E ‘ikai te ke fakalili‘a ki he ‘Ītomi, he ko ho kāinga: ‘e ‘ikai te ke fakalili‘a ki he ‘Isipite, he na‘a ke nofo ko e muli ‘i hono fonua. 8Ko hono tolu ‘o e to‘utangata ‘o hono hako te nau hū ki he fakataha ‘a e ‘Eiki.
Ko Hono Tauhi ke Ma‘a ‘o e ‘Apitanga Taú
9Ka ke ka ‘alu atu ‘o nofo ‘apitanga tau he fai mo ho ngaahi fili, te ke tauhi koe mei he me‘a kovi fua pē. 10Ka ‘i ai hao tangata ‘oku ta‘ema‘a, ko e tu‘utāmaki kuo hoko kiate ia ‘i he po‘uli, pea te ne ‘alu atu ki tu‘a ‘apitanga, ‘o ‘ikai te ne hū mai ki he ‘apitanga: 11ka ‘oka faifai pea efiafi hifo, te ne kaukau ‘i ha vai: pea ka tō ‘a e la‘ā te ne toki hū mai ki he ‘apitanga.
12Pea ‘e ‘i ai hao potu faka‘ilonga‘i ‘i tu‘a ‘apitanga, pea ‘e fai ai ha‘o ‘alu ki tua‘ā. 13Pea ‘i ho‘o ‘ū nāunau ‘e ‘i ai hao ki‘i fohe, pea ka ‘i ai ha‘o tu‘usike ‘i tua‘ā, te ke fai‘aki ha keli, pea te ke foki ‘o ‘ufi‘ufi ‘a e me‘a kuo tō meiate koe. 14He ‘oku hā‘ele ‘a Sihova ko ho ‘Otua ‘i ho loto ‘apitanga ke fakahaofi koe, pea ke tuku atu ho ngaahi fili ‘i ho ‘ao; ko ia ‘e tāpuhā ho ‘apitanga, ke ‘oua te ne ‘afio‘i ‘i ho lotolotonga ha me‘a ‘oku kau ki ha telefua, na‘a ne sītakafalu kiate koe.
Ko e ngaahi Lao Kehekehe
15‘Ē, ‘ikai te ke tukuange ha pōpula ki he‘ene ‘eiki, ka kuo ne hola mai kiate koe: 16ka te ne nofo kiate koe ‘i ho lotolotonga, ‘i ha potu te ne fili ki ai ‘i hao kolo ‘e taha, ‘a ia ‘oku ne lata ai: ‘e ‘ikai te ke fakamālohia ia.
17‘E ‘ikai ha ta‘ahine ‘Isileli ‘e pa‘umutu, pea ‘e ‘ikai ha tama ‘Isileli ‘e nofo ki he fai fakasōtoma.#Lev 19.29 18‘E ‘ikai te ke fakahū ki he fale ‘o Sihova ko ho ‘Otua ‘a e to‘ongapō ‘a ha fefine fe‘auaki, pe ko e totongi ‘a ha kulī, neongo pe ko e hā ‘a e tukumo‘ui na‘e fai: he ‘oku fakalielia‘ia ‘a Sihova ko ho ‘Otua ‘i hē mo ē fakatou‘osi.
19‘E ‘ikai te ke ‘eke toloi ki ho kāinga ‘i ho‘o tali ha nō pa‘anga, ha toloi pa‘anga, pe ha toloi me‘akai, mo e hā fua ha me‘a ‘oku fa‘a ‘eke toloi ai.#‘Eki 22.25; Lev 25.36-37; Teu 15.7-11 20Ka ko ha taha ‘i ha kakai kehe, ‘e ngofua ha‘o ‘eke toloi ki ai, ka ‘e ‘ikai te ke ‘eke toloi ki ho kāinga: kae tāpuaki koe ‘e Sihova ko ho ‘Otua ‘i he me‘a kotoa ‘oku ke ala ki ai ke fai ‘i he fonua ‘oku ke ‘alu ki ai ke ma‘u.
21Ka kuo ke fai ha‘o tukumo‘ui kia Sihova ko ho ‘Otua, ‘e ‘ikai te ke fakatotoka ‘i hono fakaai: he kuo pau ke ‘eke ia kiate koe ‘e Sihova ko ho ‘Otua, kae‘uma‘ā te ke hia ai.#Nōm 30.1-16; Māt 5.33 22Ka ‘o kapau te ke faka‘ehi‘ehi mei he fai ‘o ha tukumo‘ui, tala‘ehai te ke angahala ai. 23Ko e me‘a kuo ‘alu atu mei ho ngutu te ke tokanga ki ai ke fai; pe ko e hā ho‘o tukumo‘ui kuo ke fai kia Sihova ko ho ‘Otua, ‘a e me‘a‘ofa kuo ke lea ki ai ‘aki ho ngutu.
24Ka ke ka hū ki he ngoue vaine ‘a ho kaungā‘api, te ke fa‘iteliha ha‘o kai kālepi ai, ‘o a‘u ki ha‘o mākona, kae ‘ikai te ke ‘ai ha me‘a ki ho‘o kato. 25Ka ke ka hū ki he ngoue uite ‘a ho kaungā‘api kuo motu‘u, ‘e ngofua ha‘o toli ‘a e ngaahi fo‘i uite ‘aki ho nima; ka ‘e ‘ikai te ke apo ha hele ki he uite ‘a ho kaungā‘api.
Currently Selected:
KO TEUTALŌNOME 23: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
