KO TEUTALŌNOME 24
24
1KA mali ha tangata mo ha fefine, ‘o na nonofo, pea ka faifai pea ‘ikai te ne kei matamatalelei‘ia ai, koe‘uhi tokua ko ‘ene ‘ilo ‘i he fefine ha me‘a fakalielia,#24.1 ha me‘a fakalielia; pe ha me‘a ‘oku ‘ikai ke hoa mo hono lotó. pea ke ne fai ha tohi vete ‘o ‘ange ki hono nima, ‘o tuku atu ia mei hono ‘api.#Māt 5.31; 19.7; Ma‘ake 10.4 2Pea ‘i he‘ene hiki atu mei hono ‘api, ‘e ngofua ‘ene ‘alu ‘o nonofo mo ha tangata kehe. 3Pea kapau ‘e fehi‘a kiate ia ‘e he husepāniti kimui, ‘o ne fai ha‘ane tohi vete, ‘o ‘ange ki hono nima, ‘o tuku atu mei hono ‘api; pe ‘o kapau ‘e pekia ‘a e husepāniti kimui, ‘a ia na‘e mali mo e fefine ‘o na nonofo: 4‘e ‘ikai ngofua ke toe mali mo ia ‘e hono husepāniti mu‘a na‘a ne tukuange ia; ‘osi, kuo ‘uli‘i ‘a e fefine; he ko e me‘a fakalielia ia ‘i he ‘ao ‘o e ‘Eiki: ‘o ‘oua te ke fakaangahala‘i ‘a e fonua ‘a ia ‘oku foaki kiate koe ‘e Sihova ko ho ‘Otua mo‘o tofi‘a.
5Ka kuo ma‘u ‘e ha tangata ha uaifi fo‘ou, ‘e ‘ikai te ne ‘alu atu ‘i he tau, pea ‘e ‘ikai hilifaki kiate ia ha fatongia: te ne ‘ata‘atā pē ke nofo ‘api, ‘o ta‘u kātoa, pea te ne fakafiemālie ‘a e uaifi kuo ne ma‘u.#24.5 te ne… ma‘u; pe fiemālie he uaifi kuó ne ma‘ú.
6‘E ‘ikai to‘o mo‘o talifaki ‘a e me‘a momosi, pe ko e maka ‘olunga; he ko e talifaki ‘aki ‘ene mo‘ui ia.
7Ka ‘ilo ha tangata kuo ne kaiha‘asi ha taha ‘o hono kāinga ko ha‘a ‘Isileli, ‘o ne ngaohi hangē ha pōpula, pe kuo ne fakatau ia; pea ‘e mate ‘a e kaiha‘a ko ia: ka ke ‘ave ‘a e kovi mei ho lotolotonga.#‘Eki 21.16
8Tokanga ‘i he mala ko e kilia ke ke mātu‘aki tauhi mo fai ‘a e me‘a kotoa ‘e ako kiate kimoutolu ‘e he kau Līvai taula‘eiki: hangē ko ‘eku tu‘utu‘uni kiate kinautolu ‘e pehē ho‘omou tokanga ke fai.#Lev 13.1–14.54 9Manatu ki he me‘a na‘e fai ‘e Sihova ko ho ‘Otua kia Meliame ‘i he hala, ‘i ho‘omou omi mei ‘Isipite.#Nōm 12.10
10Ka kuo ke tali ‘a e nō ‘a ho kaungā‘api, neongo pe ko e hā ka ‘e ‘ikai te ke hū ki hono fale ke ‘omi ‘ene me‘a talifaki.#‘Eki 22.26-27 11Te ke tu‘u pē ‘i tu‘a, pea ko e tangata ‘oku ke tali ‘ene nō te ne ‘omi ki tu‘a kiate koe ‘a e me‘a talifaki. 12Pea kapau ko e masiva, ‘e ‘ikai te ke mohe mo e me‘a talifaki. 13Kuo pau ke ke ‘ange ki ai ‘ene me‘a talifaki ‘i he ‘alu hifo ‘a e la‘ā, ke ne kafu ‘aki mo tāpuaki‘i koe: pea ‘e tu‘u ia ma‘ao mā‘oni‘oni ‘i he ‘ao ‘o Sihova ko ho ‘Otua.
14‘E ‘ikai te ke fakamālohia ha ngāue unga ‘oku ‘efihia mo masiva, pe ko e taha ‘o ho kāinga, pe ko ha taha ‘o e kakai muli ‘o ho fonua ‘oku ‘i ho kolo:#Lev 19.13 15te ke ‘ange ‘ene totongi ‘i hono ‘aho pē; ‘e ‘ikai ‘alu hifo ‘a e la‘ā ‘oku kei ‘iate koe; he ko si‘i ‘efihia, pea ko e me‘a ko ia ‘oku holi ki ai ‘ene mo‘ui: na‘a tangi ia kia Sihova koe‘uhi ko koe, pea ke hia ai.
16‘E ‘ikai mate ‘a e mātu‘a koe‘uhi ko e fānau, pea ‘e ‘ikai mate ‘a e fānau koe‘uhi ko e mātu‘a: ‘e mate takitaha koe‘uhi ko ‘ene angahala ‘a‘ana.#2 Tu‘i 14.6; 2 Kal 25.4; ‘Isi 18.20
17‘E ‘ikai te ke piko‘i ‘a e fakamaau ‘o e muli, ‘a e tamai mate; pea ‘e ‘ikai te ke to‘o mo‘o talifaki ‘a e kofu ‘o e uitou:#‘Eki 23.9; Lev 19.33-34; Teu 27.19 18ka te ke manatu na‘a ke pōpula koe ‘i ‘Isipite, pea na‘e huhu‘i koe mei ai ‘e Sihova ko ho ‘Otua: ko hono ‘uhinga ia ‘oku ou kouna ai koe ke fai ‘a e me‘a ni.
19‘Oka ke ka utu ‘a e ta‘u ‘i ho‘o ngoue, pea kuo ngalo ha ‘ū uite ‘e taha, ‘e ‘ikai te ke foki ke ‘omai: ‘e tuku ia ki he muli, ki he tamai mate mo e uitou: koe‘uhiā ke tāpuaki‘i koe ‘e Sihova ko ho ‘Otua ‘i he ngāue kotoa pē ‘a ho nima.#Lev 19.9-10; 23.22 20‘Oka ke ka lulu ho fu‘u ‘ōlive, ‘e ‘ikai te ke lulu ‘angaua ‘a e ngaahi va‘a: ‘e tuku ia ki he muli, ki he tamai mate mo e uitou. 21‘Oka ke ka toli ho‘o ngoue vaine, ‘e ‘ikai te ke toe tufi: ‘e tuku ia ki he muli, ki he tamai mate mo e uitou. 22Pea te ke manatu na‘a ke pōpula koe ‘i he fonua ko ‘Isipite: ko hono ‘uhinga ia ‘oku ou kouna ai koe ke fai ‘a e me‘a ni.
Currently Selected:
KO TEUTALŌNOME 24: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
