KO TEUTALŌNOME 22
22
1‘E ‘ikai te ke sio ki he pulu pe sipi ‘a ho kāinga ‘oku ‘alu hē, ka ke hanga kehe mei ai: kuo pau te ke fakafoki ia ki ho kāinga.#‘Eki 23.4-5 2Pea kapau ‘oku ‘ikai ofi mai ‘a ho kāinga, pe ‘oku ‘ikai te ke ‘ilo ia, pea te ke ‘ave ki ho ‘api, pea ‘e ‘iate koe ‘a e manu kae‘oua ke kumi ki ai ‘e ho kāinga, pea te ke toki fakafoki ia ki ai. 3Pea ‘e pehē mo ho‘o fai ki he‘ene ‘asi, pea pehē ki hono kofu: ‘io, te ke fai pehē, neongo pe ko e hā ‘a e me‘a ‘a ho kāinga kuo mole, ha me‘a kuo mole meiate ia ka kuo ke ‘ilo: ‘e ‘ikai ngofua ha‘o hanga kehe.
4‘E ‘ikai te ke sio ki he ‘asi ‘a ho kāinga, pe ko ‘ene pulu, kuo tō ki lalo ‘i he hala, ka ke hanga kehe mei ai: kuo pau te ke tokoni kiate ia ke toe fokotu‘u.
5‘E ‘ikai ‘ai ki ha fefine ‘a e teunga ‘o ha tangata, pea ‘e ‘ikai tui ‘e ha tangata ‘a e kofu fakafefine; he ‘oku fakalielia‘ia ‘e Sihova ko ho ‘Otua ‘i ha taha ‘oku fai pehē.
6Ka ‘iloange te ke a‘u ‘i he hala ki he pununga ‘o ha manupuna, ‘i ha ‘akau, pe ‘i he kelekele, kuo ‘i ai ha fānganga, pe ha fo‘i manu, pea ko e motu‘a manu ‘oku ne ‘ō‘ōfaki ‘a e fānganga, pe ko e fo‘i manu, ‘e ‘ikai te ke ‘ave ‘a e motu‘a manu fakataha mo e fānau: 7kuo pau ke ke tukuange ‘a e motu‘a manu, kae ngofua ke ke to‘o ‘a e fānau ma‘au; koe‘uhiā ka ke tu‘umālie, pea ke fakalahi ho ngaahi ‘aho.
8Ka ke ka langa ha fale fo‘ou, pea te ke ngaohi ha ‘ā ki ho tu‘a fale, ke ‘oua na‘a ke fakapiki ha toto ki ho fale ‘i he tō ha tangata mei ai.
9‘E ‘ikai te ke tōkaki ‘i ho‘o ngoue-vaine ha fa‘ahinga tenga ‘e ua, na‘a fakatāpui ‘a e to‘ukai kotoa, ‘a e me‘a kuo ke tō, pea mo e fua ‘o e ngoue vaine.#Lev 19.19
10‘E ‘ikai te ke no‘otaki ki he palau ha pulu mo ha ‘asi fakataha.
11‘E ‘ikai te ke ‘ai ha kofu ‘oku fefiofi ai ha fa‘ahinga filo ‘e ua, ko e sipi mo e līneni, ko e fakakākā.#22.11 ko e fakakākā; ‘Oku ‘ikai ‘ilo lelei ‘a e lea ‘oku tu‘u.
12Te ke ngaohi hao pao ‘i he kapa ‘e fā ‘o e pulupulu ‘oku ke pulupulu ‘aki.
Ko e ngaahi Lao ‘o Kau ki he Mali Tāupo‘oú mo e Fe‘auakí
13Ka mali ha tangata mo ha fefine, ‘o ne ‘alu ki ai, ‘o ne toki fehi‘a kiate ia, 14‘o ne fakatupu lau ki he fefine, ‘o ne fakaongokovi ia he‘ene pehē, Na‘a ku mali mo e fefine ni, ka ‘i he‘eku ‘alu ki ai, na‘e ‘ikai te u ‘ilo ‘iate ia ‘a e ngaahi faka‘ilonga tāupo‘ou.
15Pea ‘e toki hanga ‘e he tamai ‘a e ta‘ahine, mo ‘ene fa‘ē, pea te na ‘omi ‘a e ngaahi faka‘ilonga ‘o ‘ene tāupo‘ou ‘a e ta‘ahine ki he matanikolo, ki he mātu‘a ‘o e kolo. 16Pea ‘e lea ‘a e tamai ‘a e ta‘ahine ki he mātu‘a, Ne u ‘ange hoku ‘uhiki ki he tangata ni ke na nonofo, pea kuo ne fehi‘a ki ai; 17pea vakai, ‘oku ne fakatupu lau ki ai, he‘ene pehē, Na‘e ‘ikai te u ‘ilo ‘i ho ‘ōfefine ‘a e ngaahi faka‘ilonga tāupo‘ou; ‘osi, ko eni ‘a e ngaahi faka‘ilonga tāupo‘ou ‘o hoku ‘uhiki. Pea te na folahi ‘a e kofu ‘i he ‘ao ‘o e kau mātu‘a ‘o e kolo. 18Pea ‘e puke ‘a e tangata ‘e he mātu‘a ‘o e kolo ko ia, pea te nau haha ia; 19pea te nau fakamo‘ua ia ‘i ha siliva ‘e teau, ‘o ‘ange ‘a e pa‘anga ki he tamai ‘a e ta‘ahine, koe‘uhi ko ‘ene fakaongokovi ha ta‘ahine ‘Isileli: ka te na nonofo ai pē, ‘e ‘ikai ngofua ‘ene li‘aki ia lolotonga ‘ene mo‘ui.
20Ka ‘o kapau ‘oku mo‘oni ‘a e me‘a, tokua na‘e ‘ikai ‘iloa ‘a e ngaahi faka‘ilonga tāupo‘ou ‘i he ta‘ahine: 21pea te nau toki ‘ave ki tu‘a ‘a e ta‘ahine ki he matapā ‘o e fale ‘o ‘ene tamai, pea ‘e tolomaka‘i ia ‘e he kau tangata ‘o hono kolo ke ne pekia: koe‘uhi ko ‘ene fai me‘a fakalielia ‘i ‘Isileli, he‘ene fai fe‘auaki ‘i he fale ‘o ‘ene tamai: ka mou ‘ave ai ‘a e kovi mei ho lotolotonga.
22Ka ma‘u ha tangata ‘oku ne mohe mo ha fefine alafia, te na mate pē fakatou‘osi, ‘a e tangata na‘e mohe mo e fefine, pea mo e fefine: ka ke ‘ave ai ‘a e kovi mei ‘Isileli.
23Ka ai ha fefine tāupo‘ou kuo polo‘i ki ha tangata, pea ma‘u ia ‘i he kolo ‘e ha tangata, ‘o na mohe mo ia; 24pea te mou ‘omi kinaua fakatou‘osi ki he matanikolo ko ia, pea te mou tolomaka‘i kinaua ke na pekia; ko e ta‘ahine koe‘uhi na‘e ‘ikai te ne kaila, he ‘oku ne ‘i he kolo; pea ko e tangata, koe‘uhi kuo ne fakamo‘ulaloa‘i ‘a e uaifi ‘o hono kaungā‘api: ka ke ‘ave ‘a e kovi mei ho lotolotonga.
25Ka ‘o kapau ko e vao ‘oku ma‘u ai ‘e he tangata ‘a e ta‘ahine kuo polo‘i, pea ne tohotoho‘i ia, ‘o mohe mo ia; pea ‘e toki mate ‘a e tangata pē, ‘a ia na‘a ne mohe mo e fefine: 26ka ko e ta‘ahine ‘e ‘ikai te ke fai ha me‘a ki ai; ‘oku ‘ikai ‘i he ta‘ahine ha me‘a ‘oku taau mo e mate; he ‘oku hangē ko e tu‘u ha tangata ki hono kaungā‘api ‘o fakapoongi ia. 27‘Oku pehē ‘a e me‘a ni: he na‘a ne ‘ilo ia ‘i he vao; kaila ‘a e ta‘ahine kuo polo‘i, ka na‘e ‘ikai ha taha ke fakahaofi ia.
28Ka ma‘u ‘e ha tangata ha ta‘ahine tāupo‘ou ‘a ia kuo ‘ikai polo‘i ki ha taha, ‘o ne puke ia, ‘o ne mohe mo ia, ‘o ‘iloa kinaua;#‘Eki 22.16-17 29pea ko e tangata na‘e mohe mo ia te ne ‘ange ki he tamai ‘a e ta‘ahine ha siliva ‘e nimangofulu, pea te ne hoko ko hono uaifi, koe‘uhi kuo ne fakamo‘ulaloa‘i ia, ‘e ‘ikai ngofua ke ne tukuange ia lolotonga ‘ene mo‘ui.
30‘E ‘ikai mali ha tangata mo e ‘unoho ‘o ‘ene tamai, ‘o ‘ikai te ne tatala ‘a e vala ‘o ‘ene tamai.#Lev 18.8; 20.11; Teu 27.20
Currently Selected:
KO TEUTALŌNOME 22: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
