KO TEUTALŌNOME 16
16
Ko e Pāsová
(‘Eki 12.1-20)
1TAUHI ‘a e māhina ko ‘Āpipi, mo fai ‘a e Pāsova kia Sihova ko ho ‘Otua: he ‘i he māhina ko ‘Āpipi na‘e fakahao mai koe ‘e Sihova ko ho ‘Otua mei ‘Isipite, po‘uli.#Lev 23.5-8; Nōm 28.16-25 2Pea te ke tāmate‘i ‘a e Pāsova kia Sihova ko ho ‘Otua, ha me‘a mei ho‘o monumanu, ‘i he potu ‘e fili ki ai ‘e Sihova ke ‘afio ki ai hono huafa. 3Tapu ho‘o kiki ‘aki ha me‘a fakalēvani: ko ha fitu‘i ‘aho te ke kiki ‘aki ‘a e mā ta‘elēvani, ko e mā ‘a e mamahi, he na‘e hangē ha hola ho‘o hū mei ‘Isipite; koe‘uhiā ke ke manatua ‘a e ‘aho ‘o ho‘o hū mai mei ‘Isipite ‘i he ‘aho kotoa pē ‘o ho‘o mo‘ui. 4Pea ‘e ‘ikai ‘ilo ‘iate koe ha momo‘i lēvani ‘i ho ngaahi feitu‘u ‘o ‘aho fitu; pea ‘e ‘ikai ‘ahoia ha kakano ‘o e manu na‘a ke feilaulau ‘aki ‘i he efiafi ‘o e ‘uluaki ‘aho.
5‘Oku tapu ho‘o tāmate‘i ‘a e Pāsova ‘i ha taha pē ‘o e ngaahi. kolo ‘oku ‘atu ‘e Sihova ko ho ‘Otua: 6ngata pē ‘i he potu ‘e fili ‘e Sihova ko ho ‘Otua ke ‘afio ai hono huafa, ko e potu ko ia te ke tāmate‘i ai ‘a e Pāsova, efiafi, ‘i he ‘alu hifo ‘a e la‘ā, ‘i he fa‘ahita‘u na‘a ke ha‘u ai mei ‘Isipite. 7Pea te ke ngaohi ia ‘o kai ‘i he potu ‘e fili ki ai ‘e Sihova ko ho ‘Otua: pea te ke foki pongipongi, ‘o ‘alu ki ho ngaahi tēniti. 8Ko e ‘aho ‘e ono te ke kai mā ta‘elēvani, pea ‘i hono ‘aho fitu ‘e fai ‘a e faka‘osi, ko e fakataha kia Sihova ko ho ‘Otua; tapu ha‘o fai ai ha ngāue.
Ko e Kātoanga Ututa‘u
(‘Eki 34.22; Lev 23.15-21)
9Te ke lau hao uike ‘e fitu: te ke kamata ke lau ‘a e uike ‘e fitu mei ho‘o fua ‘ai ‘a e hele ki he ta‘u uite.#Nōm 28.26-31 10Pea te ke fai ‘a e Kātoanga Lau-uike kia Sihova ko ho ‘Otua, ‘o fakatatau ki he lahi ‘o e me‘a‘ofa ‘a ho nima, ‘a ia te ke foaki, ‘o taau mo ho tāpuekina ‘e Sihova ko ho ‘Otua: 11pea te ke fakafiefia ‘i he ‘ao ‘o Sihova ko ho ‘Otua, ‘e koe, mo ho foha, mo ho ‘ōfefine, mo ho‘o tamaio‘eiki, mo ho‘o kaunanga, mo e Līvai ‘oku ‘i ho kolo, pea mo e muli mo e tamai mate mo e fine uitou ‘oku ‘i ho lotolotonga, ‘i he potu ‘e fili ‘e Sihova ko ho ‘Otua ke ‘afio ai hono huafa. 12Pea te ke manatu na‘a ke pōpula mo koe ‘i ‘Isipite: pea te ke tokanga mo fai ‘a e ngaahi tu‘utu‘uni ko eni.
Ko e Kātoanga Fale Lou‘akaú
(Lev 23.33-43)
13Te ke fai hao Kātoanga Fale-lou‘akau ‘o ‘aho fitu, hili ho‘o utu ho‘o haha‘anga mo ho‘o tata‘o‘anga uaine:#Nōm 29.12-38 14pea te ke fakafiefia ‘i ho‘o kātoanga na, ‘a koe, mo ho foha, mo ho ‘ōfefine, mo ho‘o tamaio‘eiki, mo ho‘o kaunanga, pea mo e Līvai mo e muli mo e tamai mate mo e uitou ‘oku ‘i ho kolo. 15Ko e fitu‘i ‘aho te ke fai kātoanga ai kia Sihova ko ho ‘Otua, ‘i he potu te ne fili ki ai: koe‘uhi ‘e tāpuaki‘i koe ‘e Sihova ko ho ‘Otua ‘i ho‘o fua kehekehe, pea mo e ngāue kehekehe ‘a ho nima, pea te ke fiefia pē.
16Ko e tu‘o tolu mālō ‘i he ta‘u ‘e hā ho‘o kau tangata kotoa pē ‘i he ‘ao ‘o Sihova ko ho ‘Otua ‘i he potu te ne fili ki ai; ‘i he Kātoanga Tapu-lēvani, pea ‘i he Kātoanga Lau-uike, pea ‘i he Kātoanga Fale-lou‘akau: pea ‘e ‘ikai te nau tu‘u mola pē ‘i he ‘ao ‘o Sihova: 17‘e takitaha ‘ene me‘a‘ofa ‘i he me‘a ‘oku ne ma‘u, ‘o taau mo e tāpuaki ‘a Sihova ko ho ‘Otua kuo ‘atu kiate koe.
Ko e Fakanofonofo ‘o e Kau Fakamāú
18Te ke fokotu‘u hao kau fakamaau mo hao kau ‘ōfisa ‘i he ngaahi kolo kotoa pē ‘oku ‘atu ‘e Sihova ko ho ‘Otua, ‘o fakamatakali: pea te nau fakamaau ‘a e kakai ‘aki ‘a e fakamaau totonu. 19‘E ‘ikai te ke le‘ei ‘a e fakamaau; ‘e ‘ikai te ke filifilimānako: pea ‘e ‘ikai te ke tali ha me‘a‘ofa; he ko e me‘a‘ofa, ‘oku ne fakakui ‘a e mata ‘o e kau poto, mo piko‘i ‘a e me‘a ‘a e totonu.#‘Eki 23.6-8; Lev 19.15 20Ko e totonu, ko e totonu te ke muimui ki ai, koe‘uhi ka ke mo‘ui, ‘o tofi‘a ‘aki ‘a e fonua ‘oku foaki kiate koe ‘e Sihova ko ho ‘Otua.
21‘E ‘ikai te ke tō mo‘ao ‘Āsela ha momo‘i ‘akau ‘i he tafa‘aki ‘o e ‘ōlita ‘o Sihova ko ho ‘Otua, ‘a ia te ke ngaohi ma‘au.#‘Eki 34.13 22Pea ‘e ‘ikai te ke fokotu‘u ha‘o pou tapu; ‘a ia ko e me‘a ‘oku fehi‘a ki ai ‘e Sihova ko ho ‘Otua.#Lev 26.1
Currently Selected:
KO TEUTALŌNOME 16: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
