KO TEUTALŌNOME 15
15
Ko e Ta‘u Hono Fitú
(Lev 25.1-7)
1‘I HE ‘osi ha fitu‘i ta‘u te ke fai ha tuku hifo pē. 2Pea ko eni ‘a e anga ‘o e tuku hifo ‘e fai: ‘ilonga ha taha kuo tali ha nō pa‘anga ‘a hono kaungā‘api, te ne tuku hifo ia; ‘e ‘ikai te ne ‘eke ia ki hono kaungā‘api mo tokoua; he kuo fanongonongo ‘a e tukuhifo ‘a Sihova. 3Te ke ‘eke pē ki ha kakai kehe: ka ka ‘ilonga ha‘o me‘a ‘oku ‘i ho tokoua, ‘e tuku hifo ‘e ho nima.
4Ngata pē ‘oka ‘ikai ha masiva ‘i ho‘omou nofo; he kuo pau ke tāpuaki‘i koe ‘e Sihova ‘i he fonua ‘oku foaki kiate koe ‘e Sihova ko ho ‘Otua ke ma‘u mo‘o tofi‘a; 5kehe ‘o kapau te ke mātu‘aki fakaongo ki he le‘o ‘o Sihova ko ho ‘Otua ‘o tokanga ke fai ‘a e tu‘utu‘uni ni kotoa ‘oku ou kouna atu he ‘aho ni. 6He ‘e tāpuaki‘i koe ‘e Sihova ko ho ‘Otua, ‘o hangē ko ‘ene folofola kiate koe, pea te ke tali nō talifaki ki he ngaahi kakai lahi, ka ko koe ‘e ‘ikai te ke nō; pea te ke pule ki ha ngaahi kakai lahi, ka ‘e ‘ikai te nau pule kiate koe.
7Ka ‘oka ai ha masiva ‘i ho‘omou nofo, ko e taha ‘o ho kāinga, ‘oku nofo ‘i ha taha ‘o ho ngaahi kolo ‘i he fonua ‘oku foaki kiate koe ‘e Sihova ko ho ‘Otua, ‘e ‘ikai te ke fakafefeka ho loto ki ho tokoua masiva na, pea ‘e ‘ikai te ke fakanimama‘u ki ai:#Lev 25.35 8kuo pau te ke nima homo ki ai, pea te ke tali ‘ene nō, ‘o fe‘unga mo ‘ene masiva, ‘a e masiva ‘oku ne tangi ai. 9Lamasi koe na‘a ake ha fakakaukau ‘i ho loto, ha me‘a faka-Pileali, ‘o pehē, ‘Oku panaki ‘a e fitu‘i ta‘u, ‘a e ta‘u ‘o e tukuhifo; pea ke sio kovi ki ho tokoua masiva na, ‘o ‘ikai te ke ‘ange ki ai; pea ne tangi kia Sihova ‘iate koe, pea hoko ia ko ho‘o angahala. 10Kuo pau te ke ‘ange, pea ‘e ‘ikai mamahi ho loto ‘i ho‘o ‘ange ki ai: he koe‘uhi ko e me‘a ko ia ‘e tāpuaki‘i ai koe ‘e Sihova ko ho ‘Otua ‘i ho‘o ngāue kotoa, mo e me‘a fuli pē ‘oku ke ala ki ai. 11He tala‘ehai ‘e ‘osi ‘a e masiva mei he lotolotonga ‘o e fonua ‘i ha taimi: ko hono ‘uhinga ia ‘oku ou tu‘utu‘uni atu ai, ‘o pehē, Kuo pau te ke nima homo ki ho tokoua, ki ho kakai fusimo‘omo, pea ki ho masiva ‘i ho fonua.#Māt 26.11; Ma‘ake 14.7; Sioné 12.8
Ko e ‘Ulungāanga ke Fai ki he Kau Pōpulá
(‘Eki 21.1-11)
12Kapau ‘e fakatau kiate koe hao tokoua, ko e tangata Hepelū pe fefine Hepelū,#15.12 Kapau… fefine Hepelū; pe Kapau ‘e fakatau kiate koe ‘e ha tangata pe fefine Hepelū ia. ‘o ne ngāue kiate koe ‘i he ta‘u ‘e ono, pea ‘i hono fitu ta‘u te ke tukuange tau‘atāina pē.#Lev 25.39-46 13Ka ‘i ho‘o tukuange tau‘atāina ia, ‘e ‘ikai te ke tukuange mola pē. 14Te ke mātu‘aki fakamoū ia mei ho‘o monumanu, pea mei ho haha‘anga, pea mei ho tata‘o‘anga uaine: hangē ko e tāpuaki‘i koe ‘e Sihova ko ho ‘Otua ‘e pehē ho‘o foaki kiate ia. 15Pea te ke manatu na‘a ke pōpula mo koe ‘i ‘Isipite, pea na‘e huhu‘i koe ‘e Sihova ko ho ‘Otua: ko hono ‘uhinga ia ‘oku ou kouna pehē koe he ‘aho ni.
16Ka ‘oka ‘iloange te ne pehē kiate koe, ‘E ‘ikai te u ‘alu atu meiate koe, koe‘uhi ‘oku ne ‘ofa kiate koe mo ho fale, he ‘oku ne tu‘umālie ‘ene nofo mo koe; 17pea te ke to‘o ‘a e vili, ‘o vili fakau‘u hono telinga ki he matapā, pea te ne hoko ko ho‘o tamaio‘eiki ‘o ta‘engata. Pea te ke fai pehē foki ki ho‘o kaunanga. 18Ke ‘oua ‘e hā faingata‘a kiate koe hono tukuange ‘ata‘atā pē; he ko e liunga ua ‘o e mahu‘inga ‘o ha ngāue unga ‘a ‘ene ngāue kiate koe ‘i he ta‘u ‘e ono:#15.18 ko e liunga ua; pe ko e vaeua. kae‘uma‘ā ‘e tāpuaki‘i koe ‘e Sihova ko ho ‘Otua ‘i he me‘a kotoa pē te ke fai.
Ko e ‘Uluaki ‘Uhiki ‘o e Pulú mo e Sipí
19Ko e ‘olopo‘ou ‘oku fanau‘i ‘e ho‘o monumanu, ‘a e tangata, te ke fakatāpui mo‘o Sihova ko ho ‘Otua: ‘e ‘ikai te ke ngāue‘aki ‘a e ‘olopo‘ou ‘o ho‘o pulu, pea ‘e ‘ikai te ke kosi ‘a e ‘olopo‘ou ‘o ho‘o sipi pe kosi. 20‘I he ‘ao ‘o Sihova ko ho ‘Otua te ke kai ia ‘i he ta‘u mo e ta‘u, ‘a koe mo ho fale, ‘i he potu ‘e fili ‘e Sihova. 21Pea kapau ‘oku ai hano ‘ila–‘oku heke, pe kui; ha ‘ila kovi–‘e ‘ikai te ke feilaulau ‘aki ia kia Sihova ko ho ‘Otua. 22Te ke kai pē ‘i ho kolo: ko e ta‘ema‘a mo e ma‘a ‘e fakatou kai ai, ‘o hangē ko e fai ki he kaseli mo e tia. 23Ngata ‘i he toto, ‘e ‘ikai kai ia: te ke lilingi ia ki he kelekele ‘o hangē ha vai.#Sēn 9.4; Lev 7.26-27; 17.10-14; 19.26; Teu 12.16,23
Currently Selected:
KO TEUTALŌNOME 15: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
