KO ‘ĒMOSI 4
4
1FANONGO ki he lea ko eni, ‘a e fanga kau faka-Pēsani, ‘a ia ‘oku ‘i Mo‘unga Samēlia, ‘a e fa‘ahinga ‘oku fakaehaua ‘a e mā‘ulalo, ‘oku laiki ‘a e masiva, ‘oku lea ki honau husepāniti, ‘Omi me‘a ke mau inu. 2Kuo fuakava ‘a ‘Ātonai Sihova ‘i he‘ene mā‘oni‘oni, tala atu ‘oku hoko kiate kimoutolu ha ngaahi ‘aho, ‘a ia ‘e ‘ave ai kimoutolu ‘aki ‘a e māta‘u, pea ko homou toenga, ‘aki ‘a e māta‘u ika. 3Pea te mou hū ki tu‘a ‘i he ngaahi ava ‘o e ‘ā, takitaha ‘i hono laine; pea ‘e lī kimoutolu ki Hāmona#4.3 Hāmona: ‘Oku ‘ikai ‘ilo pe ko e hā ia. –ko Sihova ia mei he Ta‘ehāmai.
Ko e Ta‘eFie Fakapotopoto ‘a ‘Isileli
4Ha‘u ki Pēteli,
‘O fai angahala ai;
Ha‘u ki Kilikali,
‘O fakalahi angahala;
Pea ‘omi ho‘omou ngaahi feilaulau
‘I he pongipongi kotoa pē,
Mo ho‘omou ngaahi tukuhau hongofulu ‘o fakahili ‘aho ‘e tolu;#4.4 pe ta‘u ‘e tolu.
5Pea ‘atu mei he mā lēvani ha feilaulau fakafeta‘i,
Pea mou tala ke hapai kōpano,
‘O fanongonongo ke ‘omi.
He ko ho‘omou manako ia, ha‘a ‘Isileli–
Ko ‘Ātonai Sihova ia mei he Ta‘ehāmai.
6Pea ko au foki kuo u ‘atu kiate kimoutolu ‘a e te‘enifo ma‘a
‘I homou ngaahi kolo kotoa,
Mo e masiva me‘akai ‘i homou ngaahi feitu‘u;
Ka tala‘ehai kuo mou foki kiate au,
Ko Sihova ia mei he Ta‘ehāmai.
7Pea kuo u ta‘ofi foki meiate kimoutolu ‘a e ‘uha, ‘i he kei toe ‘a e māhina ‘e tolu ki he ututa‘u: pea u ‘ai ke ‘uha ki ha kolo ‘e taha, kae ‘ikai ‘uha ‘a e kolo ‘e taha: ko e ‘api ‘e taha na‘e ‘uheina, pea ko e ‘api ‘oku ‘ikai tō ki ai ha ‘uha na‘e mae. 8Ko ia na‘e fai fano ha kolo ‘e ua pe tolu, ‘o a‘u ki ha kolo ‘e taha ke inu vai, pea na‘e ‘ikai te nau mākona:
Ka hono kuo mou foki kiate au–
Ko Sihova ia mei he Ta‘ehāmai.
9Kuo u taa‘i kimoutolu ‘aki ‘a e mahunu, mo e kekena; ko ho‘omou ngaahi fu‘ufu‘unga ngouetapu mo ngoue vaine mo homou ngaahi fiki mo ho‘omou ngaahi ‘ōlive kuo kai ‘e he he‘e-ola:
Ka tala‘ehai kuo mou foki kiate au–
ko Sihova ia mei he Ta‘ehāmai.
10Kuo u fekau atu kiate kimoutolu ‘a e mahaki faka‘auha ‘i hono anga faka-‘Isipite: kuo u tāmate‘i ‘aki ‘a e heletā ho‘omou kau talavou ‘o vete foki ho‘omou fanga hoosi; pea kuo u ‘ai ke tau ki homou ihu ‘a e namuhāhā ‘o homou ngaahi ‘apitanga tau:
Ka hono kuo mou foki mai kiate au–
ko Sihova ia mei he Ta‘ehāmai.
11Kuo u fulihi hamou ni‘ihi, hangē ko e fulihi ‘e he ‘Otua ‘a Sōtoma mo Komola, pea na‘a mou hangē ha potupotu‘i afi kuo hamusi mei he vela: Ka tala‘ehai kuo mou foki kiate au–ko Sihova ia mei he Ta‘ehāmai.#Sēn 19.24
12Ko ia KO ENI ‘a e me‘a te u fai kiate koe, ‘e ‘Isileli:
Pea ko e me‘a ‘i he‘eku teu fai ENI kiate koe,
Ke ke teuteu ke tali ho ‘Otua, ‘e ‘Isileli,
13He vakai, ko ia ia ‘oku ne ngaohi ‘a e ngaahi mo‘unga,
Mo fakatupu ‘a e laumālie,#4.13 pe matangi.
Pea ‘oku ne fakahā ki he tangata ‘a e me‘a ‘oku ne fifili ki ai,
‘A e ‘Afio ‘oku ne ngaohi ‘a e pongipongi, ‘a e po‘uli,#4.13 pe ko e po‘uli.
Pea ‘oku ne hā‘elea ‘a e ngaahi mā‘olunga ‘o māmani–
Ko hono huafa ko Sihova ‘Otua Sāpaoti.
Currently Selected:
KO ‘ĒMOSI 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
