KO ‘ĒMOSI 5
5
Ko Hano Malanga‘i ‘o e Fakatomala
1MOU fanongo ki he lea ko eni, ‘a ia ‘oku ou to‘o hake ke tataha ‘aki kimoutolu: ko e tangilāulau ia, si‘i fale ‘o ‘Isileli. 2Kuo tō ‘a e ta‘ahine ko ‘Isileli na‘e tāupo‘ou;
‘E ‘ikai te ne toetu‘u:
Kuo li‘aki ia ki hono kelekele;
‘Oku ‘ikai ha taha ke fokotu‘u ia.
3He ko e folofola eni ‘a ‘Ātonai Sihova, Ko e kolo na‘e ‘alu ki he tau ko e toko afe ‘e toe toko teau pē, pea ko ia na‘e ‘alu ki he tau ko e toko teau ko e toko hongofulu pē ‘e toe ki he fale ‘o ‘Isileli.
4He ko eni ‘a e folofola ‘a Sihova ki he fale ‘o ‘Isileli: 5Kumi kiate au, ka mou mo‘ui: pea ‘oua te mou kumi ki Pēteli, pea ‘oua te mou ‘alu ki Kilikali, pea ‘oua te mou laka atu ki Peasipa: he kuo pau ke ‘alu pōpula ‘a Kilikali, pea ‘e hoko ‘a Pēteli ko e muna. Kumi kia Sihova, ka mou mo‘ui; 6na‘a ne pā mai hangē ha afi ki he fale ‘o Siosifa, ‘o ne keikeina, ‘o ‘ikai ha taha ke tāmate‘i ia telia ‘a Pēteli. 7‘a e fa‘ahinga ‘oku mou liliu ‘a e fakalao ko e kona-‘ī‘ī, mo ‘ohifo ‘a e totonu ke nofo he kelekele; 8kumi kiate ia na‘e ngaohi ‘a Mataliki,#Siope 9.9; 38.31 mo ‘Olioni, pea ‘oku ne liliu ‘a e ‘ata ‘o mate ko e pongipongi, pea ‘oku ne fakapo‘uli ‘a e ‘aho ke kaupō‘uli; ‘a e ‘Afio ‘oku ne ui mai ‘a e vai ‘o e tahi, ‘o ne lilingi ki he funga fonua–ko Sihova hono huafa– 9‘a e ‘Afio ‘oku ne fakatapa mai ‘a e faka‘auha ki he mālohi, pea ‘oku ‘a e faka‘auha ki he talitau‘anga.
10‘Oku nau fehi‘a ki ha taha ‘oku fakatonutonu ‘i he fai‘anga fono,
Pea ‘oku nau fakalili‘a kiate ia ‘oku lea totonu.
11Ko ia ko e me‘a ‘i ho‘omou malaki ‘a e mā‘ulalo, mo tali meiate ia ha ngaahi kavenga uite–neongo kuo mou langa fale ‘aki ‘a e maka kuo hele, kae ‘ikai te mou nofo ai; kuo mou tō ‘ani ngaahi ngoue vaine mamana, kae ‘ikai te mou inu mei ai ‘a e uaine. 12He ‘oku ou ‘ilo ‘a e hulu ho‘omou ngaahi angahala, mo e kaukaua ho‘omou ngaahi hia–‘oku nau fakamālohia ‘a e mā‘oni‘oni, ‘oku nau tali pa‘anga fufū, pea ‘oku nau lolomi ‘a si‘i masiva ‘i he fai‘angafono. 13Ko hono ō ia, ‘Oku fakalongolongo ‘a e fakapotopoto ‘i he taimi ko ia; He ko e taimi kovi ia.
14Ha‘ao ki he lelei, ‘o ‘ikai ki he kovi, koe‘uhi ke mou mo‘ui: pea ‘e toki ‘iate kimoutolu ‘a Sihova ko e ‘Otua Sāpaoti, hangē ko ho‘omou lau ‘oku fai. 15Fehi‘a ki he kovi, pea ‘ofa ki he lelei, pea fokotu‘u ma‘u ‘a e fakakonisitūtone ‘i he fai‘angafono.
Hei‘ilo ‘e ‘ofa ‘a Sihova, ko e ‘Otua Sāpaoti,
Ki he toenga ‘o Siosifa.
16Ko ia ko e folofola eni ‘a Sihova ko e ‘Otua Sāpaoti, ‘a ‘Ātonai: ‘E ai ha tangilāulau ‘i he mala‘e kotoa pē, pea ‘i he ngaahi hala fua pē te nau ‘ioho, ‘Oiauē! ‘oiauē! pea te nau ui mai ‘a e kau fa‘a ki he tangi, pea ko kinautolu ‘oku poto ‘i he tēngihia ke fai ‘a e tangilāulau. 17Pea ‘i he ngaahi ngoue vaine ‘e fai ha tangilāulau: he te u laka atu ‘i ho loto fonua–ko e folofola ia ‘a Sihova.
18‘Oiauē ‘a kimoutolu ‘oku mou fakatauange ke hoko mai ‘a e ‘Aho ‘o e ‘Eiki! Ko e hā ‘oku mou fai pehē ai ki he ‘Aho ‘o e ‘Eiki? 19Ko e po‘uli ia, ‘o ‘ikai koe maama. Ko hono anga ‘oku hangē koe hola ‘a ha tangata mei ha Saione, pea ne fetaulaki mo ha pea; pe ko ‘ene hū ki fale mo faaki hono nima ki he ‘ā, mo e ‘iloange na‘e u‘u ia ‘e ha ngata. 20‘Ikai ko e koto po‘uli ‘a e ‘aho ‘o e ‘Eiki, ‘o ‘ikai ko e maama? ‘io, ko e po‘uli ‘o e po‘uli, ‘o ‘ikai ha ataata ‘i ai, ‘inē?
21‘Oku ou fehi‘a‘ia, ‘oku ou keu‘i ho‘omou ngaahi kātoanga, pea ‘e ‘ikai tali ‘a e hohofi ho‘omou ngaahi fakataha.#‘Ais 1.11-14 22Neongo ho‘omou ‘ohake kiate au ha ngaahi feilaulau-mōifua, mo e ngaahi feilaulau-me‘akai, ‘e ‘ikai te u tali: pea ‘e ‘ikai te u hanga ki ho‘omou ngaahi feilaulau-‘ofa neongo ko e ngaahi manu sino. 23Hiki meiate au ‘a e kavenga ni ‘a e ongoonga‘a mai ho‘omou ngaahi hiva; ‘io, ‘oku ‘ikai te u fie fanongo ki he le‘o ‘o ho‘omou ngaahi helefilo. 24Kae tuku ke tafe atu ‘a e fakakonisitūtone hangē ha vai, mo e faitotonu hangē ha vaitafe tafe ma‘u pē.
25He na‘a mou hiki kiate au pē,#5.25 ‘Oku li‘aki ‘a e pē ‘e he ni‘ihi. fale ‘o ‘Isileli, ‘a e ngaahi feilaulau manu mo e ngaahi feilaulau-me‘akai ‘i he Toafa, ‘o fāngofulu ta‘u?#5.25 Ko e veesi fihi ‘aupito ‘a hono 25, pea ‘oku fai kehekehe hono hikí. #Ngā 7.42-43 26‘Ā! na‘a mou fua ‘a e Tāpanekale#5.26 pe Sīkuti ko homou tu‘i. ‘o homou tu‘i,#5.26 pe Moloke. mo e tu‘unga ‘o ho‘omou ngaahi ‘īmisi,#5.26 pe mo Kuini ko homou ongo ‘īmisi. ‘a e fetu‘u na‘a mou ‘otua‘aki, ‘a ia na‘a mou ngaohi ma‘amoutolu. 27Ko ia ai, te u taki pōpula kimoutolu ki kō atu ‘i Tāmasikusi–ko e folofola ‘a Sihova, ‘a ia ko hono huafa ko e ‘Otua Sāpaoti.
Currently Selected:
KO ‘ĒMOSI 5: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
