KO ‘ĒMOSI 3
3
1MOU fanongo ki he lea ko eni, ‘a ia kuo folofola‘aki ‘e Sihova, ‘o kau kovi kiate kimoutolu, ha‘a ‘Isileli; ‘io, ki he fāmili kotoa ne u ‘ohake mei ‘Isipite,#‘Ais 15.1–16.14; 25.10-11; Sel 48.1-47; ‘Isi 25.8-11; Sef 2.8-11 2‘o pehē, Ko kimoutolu pe kuo u ‘ilo ki ai ‘i he ngaahi fāmili kotoa ‘o māmani: ko ia te u ‘eke kiate kimoutolu ho‘omou ngaahi kovi kotoa pē.
Ko e Fatongia ‘o e Palōfitá
3‘E hā‘ele fakataha ha toko ua,
‘oka ‘oku te‘eki ke na alea?
4‘E kālou ha laione ‘i ha vao,
Ka ‘oku te‘eki ha‘ane ha‘alu?
‘E tukuna atu hono le‘o ‘e ha manu hau mei hono ‘ana,
Ka ‘oku ‘ikai hano ola?
5‘E tō ‘a e manupuna ki ha hele ‘i he kelekele,
‘Osi, kuo ‘ikai fanga ha helepuna ki ai?
‘E puna hake ‘a e hele mei he kelekele,
‘O ‘ikai pō ha me‘a?
6‘Oku ifi koā ‘a e talupite ‘i ha kolo,
‘O ‘ikai tete ‘a e kakai?
‘E hoko koā ha kovi ‘i ha kolo,
Ka ‘oku ‘ikai ko Sihova ia ‘oku fai?
7Seuke, tala‘ehai ‘e fai ‘e ‘Ātonai Sihova ha me‘a, ka te ne fukefuke ki he‘ene kau tamaio‘eiki ko e kau palōfita ‘a e me‘a kuo tu‘utu‘uni.
8Kuo kālou ‘a e Saione, Ko hai ‘e ‘ikai manavahē?
Kuo folofola ‘a ‘Ātonai Sihova, Ko hai ‘e mata‘epalofisai?
Ko Hono Faka‘auha ‘o Samēlia
9Fanongonongo ‘i he ngaahi palasi ‘o ‘Asitoti, pea ‘i he ngaahi palasi ‘o ‘Isipite; ‘Io, mou tala, Mou fakatahataha ki he ngaahi mo‘unga ‘o Samēlia, ‘o mou sio ki he ngaahi fu‘u maveuveu ‘i loto kolo, mo e kakai ‘i ai ‘oku fakamālohia.
10He ‘oku ‘ikai te nau ‘ilo ke faitotonu–ko Sihova ia mei he Ta‘ehāmai–‘a e fa‘ahinga ‘oku fa‘oaki ‘a e fakamālohi mo e fakaehaua ‘i honau ngaahi palasi. 11Ko ia ko e folofola eni ‘a ‘Ātonai Sihova, Ko e fili ena, pea te ne takai ki he fonua; pea te ne ‘ohifo ho ivi meiate koe, pea ‘e vete ho ngaahi palasi.
12Ko e folofola eni ‘a Sihova, Hangē ‘oku hamusi ‘e he tauhi-manu mei he ngutu ‘o e laione ha ongo hui va‘e, pe ha konga telinga; ‘e pehē ‘a e hamusi ‘o ha‘a ‘Isileli, ko kinautolu ‘oku nofo ‘i Samēlia, ‘i he tuliki ‘o e sofa, mo e Tāmasikusi#3.12 tuliki… Tāmasikusi: ‘Oku ‘ikai ke mahino ‘a hono faka-Hepeluú, ka ko e Tāmasikusí ko e hingoa nai ia ‘o e tupenu lelei. ‘A ia, ko hono hiki totonú nai ‘o e tuliki… Tāmasikusí ko e: ngaahi sofa fakasanisani. ‘o e longa. 13Mou fanongo, pea fakamo‘oni ki ai ‘i he fale ‘o Sēkope–ko ‘Ātonai Sihova ia mei he Ta‘ehāmai, ko e ‘Otua ‘o e ngaahi Hōsitē–‘o pehē; 14‘I he ‘aho ‘o ‘eku ‘eke ‘a e ngaahi angahala ‘a ‘Isileli kiate ia, te u ‘a‘ahi foki ki he ngaahi ‘ōlita ‘i Pēteli, pea ‘e tu‘usi ‘a e ngaahi nifo ‘o e ‘ōlita, pea te nau tō ki he kelekele.#2 Tu‘i 23.15 15Pea te u taa‘i ‘a e fale fākavao fakataha mo e fale fakamokomoko; pea ‘e ‘auha ‘a e ngaahi fale lei, pea ‘e mole ‘a e ngaahi fale lahi–ko Sihova ia mei he Ta‘ehāmai.
Currently Selected:
KO ‘ĒMOSI 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
