Tīmoté 2 3
3
1KA ko eni ‘a e me‘a ke ke sinaki ‘ilo ki ai; ka hokosia ‘a e kuonga fakamui, ‘e ai ha ngaahi taimi faingata‘a. 2He ko hono kakai te nau ‘ofa kiate kinautolu pē, te nau ‘ofa ki he pa‘anga, te nau fielahi, te nau anga ta‘etoka‘i, te nau lea fie‘otua, te nau talangata‘a ki he mātu‘a; ko e kau ta‘ehounga, ko e kau anga ta‘emolumalu, 3ko e kau ta‘e-‘ofa-ki-ho‘ota, ko e kau ta‘efakamolemole, ko e kau fakakovi, ko e kau ta‘efakama‘uma‘u, ko e kau anga fakamanu, ko e kau ta‘e‘ofa ki he lelei, 4ko e kau lavaki, ko e kau ‘ohonoa, ko e kau loto ‘ao‘aofia ‘i he ‘afungi, ko e kau ‘ofa ki he mālie ‘o ‘ikai ‘ofa ki he ‘Otua, 5ko e kakai ‘oku ma‘u ‘a e nge‘esi ‘o e lotu, ka kuo nau li‘aki hono kakano: ke ke fulitu‘a ki he kakai pehē foki. 6He ‘oku ‘i he fa‘ahinga ko ia ‘a e kakai ‘oku totolo ki he ngaahi fale, pea taki pōpula ha longolonga‘i fefine kuo mafasia ‘i he ngaahi angahala, pea ‘oku tākiekina ‘e he ngaahi holi; 7‘o nau ako ai pē, ka tala‘ehai ‘oku nau lava ke a‘usia ‘a e ‘ilo‘i totonu ‘o e mo‘oni. 8Pea hangē ko e tu‘u ‘a Siani mo Siamepi kia Mōsese, ‘oku pehē foki mo e tu‘u ‘a e fa‘ahinga ni ki he mo‘oni: ko e kakai kuo popo honau loto, pea ‘i he lau ki he lotu ‘oku ‘ikai ha‘anau momo‘i sia‘a.#‘Eki 7.11 9Ka tala‘ehai te nau faka‘a‘au atu: he ko ‘enau vale, ‘e faifai pea mātu‘aki e‘a ki he kakai kotoa, ‘o hangē tofu pē ko e vale ‘anaua.
10Ka ko koe, na‘a ke ma‘u mo‘ao fa‘ifa‘itaki‘anga ‘a e faiako ‘a‘aku, ‘a ‘eku tō‘onga, ‘a ‘eku tu‘utu‘uni pau, ‘a ‘eku tui, ‘a ‘eku anga mokomoko, ‘a ‘eku ‘ofa, ‘a ‘eku kātaki; 11‘a hoku fa‘a fakatanga‘i, ‘a e ngaahi fu‘u mamahi na‘e tō kiate au ‘i ‘Aniteoke mo ‘Aikoniume mo Līsita, ‘a e ngaahi fu‘u fakatanga ko ia na‘a ku mo‘ua ai: ka na‘e hamusi au mei ai kotoa ‘e he ‘Eiki.#Ngā 13.14-52; 14.1-7,8-20 12‘Io, pea ko kinautolu kotoa pē ‘oku loto ke lotu mo‘oni ‘ia Kalaisi Sīsū ‘e fakatanga‘i kinautolu foki. 13Ka ko e kakai kovi mo fakahekeheke te nau faka‘a‘au atu mei he kovi ki he kovi, he‘enau kākaa‘i ‘a e kakai kehe, pea kākaa‘i mo kinautolu. 14Ka ko koe, ke ke nofo ‘i he ngaahi me‘a na‘a ke ako ai, ‘a ia na‘e fakamahino atu, ko ho‘o ‘ilo ki he anga ‘o e kakai na‘a ke ako mei ai. 15Pea mo e talu ho‘o valevale kuo ke maheni mo e Tohitapu, ‘a ia ‘oku ne mafai ke fakapoto koe ke ma‘u ‘a e fakamo‘ui ‘i he tui ‘oku ‘ia Kalaisi Sīsū. 16Ko e potu Folofola kotoa pē ne fakamānava mei he ‘Otua, ‘oku ‘aonga#3.16 Ko e potu… ‘aonga; pe Ko e potu folofola kotoa pē, kuo fakamānava‘i ‘e he ‘Otuá pea ‘oku ‘aonga. foki ki he akonaki, ki he faka‘ilo hala, ki he fakatonutonu, ki he ngaohia ke mā‘oni‘oni: 17koe‘uhi ā ke tu‘u kakato ‘a e tangata faka‘otua, kuo ‘osi sāuni ki he ngāue lelei fuli pē.
Currently Selected:
Tīmoté 2 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
