Tesalonaiká 2 3
3
Hūfia Kimautolu
1KO hono faka‘osi ‘eni. Kāinga, mou hūfia kimautolu, koe‘uhi ā ke lele atu ‘a e folofola ‘a e ‘Eiki, pea fakahīkihiki‘i, ‘o hangē hono fai ‘iate kimoutolu foki. 2Pea koe‘uhi ā ke fakahaofi kimautolu mei he kakai angakehe mo pau‘u: he tala‘ehai ‘oku lotu kotoa pē.
3Ka ko e ‘Eiki ko e toko taha ia ‘oku fai ki he‘ene lea, pea te ne poupou kimoutolu, ‘o le‘ohi mei he Fili. 4‘Io, ‘oku mau falala ‘i he ‘Eiki ‘oku mou fai, pea te mou fai, ‘a e ngaahi me‘a ‘oku mau fekau atu.
5Pea ‘ofa ke taki tonu ‘e he ‘Eiki homou loto ki he ‘ofa ‘a e ‘Otua, mo e kātaki ‘a Kalaisi.
Ko e Fakatokanga he Fakapikopikó
6Pea ko eni, kāinga, ‘oku mau fekau atu ‘i he huafa ‘o e ‘Eiki ko Sīsū Kalaisi, ke ‘ilonga ha kāinga ‘e laka hala, ‘o makehe mo e tu‘utu‘uni na‘a nau ma‘u meiate kimautolu, pea mou fake‘ehi‘ehi mei ai. 7He ‘oku mou lāu‘ilo ‘a e me‘a ‘oku totonu ke mou fai ‘i ho‘omou fa‘ifa‘itaki kiate kimautolu. He tala‘ehai na‘a mau laka hala ‘i he‘emau ‘iate kimoutolu; 8‘uma‘ā ha‘amau kai mā mofisi pē, kaekehe na‘a mau kai ‘i he ongosia mo e fitefita‘a, he na‘a mau ngāue ‘i he ‘aho mo e pō ke ‘oua na‘a mafasia hamou toko taha. 9‘Oku ‘ikai ko ‘eku pehē na‘e tapu, ka koe‘uhi ke mau hoko ko e taipe kiate kimoutolu ke mou fa‘ifa‘itaki mai. 10Kae ‘uma‘ā, lolotonga ‘emau ‘iate kimoutolu, ko eni ‘a e fekau na‘a mau tuku atu, Ka ‘ikai fie ngāue ha taha, pea ‘oua foki na‘a ne kai.
11He ko eni kuo mau fanongo ‘oku ‘i ai hamou ni‘ihi ‘oku laka hala, ‘o ‘ikai te nau momo‘i ngāue ma‘anautolu, ka nau makaka noa. 12Ka ‘oku mau fekau mo enginaki ‘i he ‘eiki ko Sīsū Kalaisi ki he alā kakai pehē, ke nau ngāue haunoa ke kai si‘anau mā totonu.
13Pea ko e me‘a kiate kimoutolu, kāinga, ‘oua te mou fiu ‘i he fai lelei. 14Pea ka ai ha taha ‘oku ‘ikai ke talangofua ki he‘emau lea ‘i he ‘ipiseli ni, ‘ai ke ‘ilonga ‘a e tangata ko ia, pea fakakehekehe mo ia mōno fakamaa‘i. 15Kae ‘oua ‘e lau ia ko e fili, kae tākitala‘i ia hangē ko e tokoua.
Ko e Tāpuaki ‘a e ‘Eikí
16Pea ko e ‘Afio ‘a e ‘Eiki, ‘a ia ‘oku ‘a‘ana ‘a e nonga, ‘ofa ke ne ‘atu ‘a e nonga ‘i he taimi kotoa pē mo e me‘a kotoa pē! ‘Ofa ke ‘iate kimoutolu kotoa pē ‘a e ‘Eiki!
17Ko e fetapa ‘eni ‘oku fai‘aki ‘a e nima ‘o‘oku Paula; ‘a ia ko e faka‘ilonga ‘i he‘eku ‘Ipiseli kotoa pē: ko e anga ‘eni ‘o ‘eku mata‘itohi.
18Ko e kelesi ‘a hotau ‘Eiki ko Sīsū Kalaisi, ‘ofa ke ‘iate kimoutolu kotoa pē ia.
Currently Selected:
Tesalonaiká 2 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
