Tesalonaiká 2 2
2
Ko e Tangata Faikoví
1PEA ko e me‘a ki he hoko mai ‘a hotau ‘Eiki ko Sīsū Kalaisi, mo hotau fakatahataha kiate ia, ‘oku mau kole atu, kāinga,#1 Tes 4.15-17 2ke ‘oua na‘a ue‘ingofua kimoutolu mei homou ‘alunga; kae‘uma‘ā ke ‘oua te mou puputu‘u ‘i ha palofisai, pe ‘i ha lea pe tohi, neongo te nau lau ‘oku meiate kimautolu ia; ‘o pehē kuo hokosia ‘a e ‘aho ‘o e ‘Eiki. 3Ke ‘oua na‘a fakahekea kimoutolu ‘e ha toko taha ‘i ha anga ‘e taha; he ‘oku ‘oua pē ia ke motu‘a hoko ‘a e fu‘u fakaholomui, pea mo e fakapū mai ‘a e tangata ko Malakilao, ko e Fanautama ‘a Mala, ko Fakafili; 4‘a ia ‘ilonga ha ‘Otua ‘oku lau ko e ‘Otua, pe ha me‘a ‘oku fai ki ai ‘a e lotu, pea ‘oku ne fakafekāke‘i hake ki ai; ‘io, ‘oku ne mātu‘aki hū ki he Potu Tapu ‘o e ‘Otua, ‘o ne nofo ai, ‘o ne fakahāhā ia ko e ‘Otua.#Tān 11.36; ‘Isi 28.2
5‘Oku ‘ikai te mou manatu koā, na‘a ku tala ‘a e ngaahi me‘a ko ia ‘i he‘eku ‘iate kimoutolu mu‘a? 6Pea ko eni ‘oku mou ‘ilo ‘a e me‘a ‘oku pukepuke hono fakapū, kae‘oua ke hoko hono kuonga totonu. 7He na‘a mo eni ‘oku ngāngāue hono misiteli ‘o e Malakilao; ka ko e ‘oua pē ke hiki ‘a e toko taha ‘oku pukepuke, pea ‘e toki fakapū mai ‘a Malakilao: 8‘a ia ‘e tāmate‘i ‘e he ‘Eiki ko Sīsū ‘aki ‘a e mānava ‘o hono fofonga, pea faka‘auha ‘aki ‘a e fotuaki ‘o ‘ene hoko mai.#‘Ais 11.4 9Ka ko e hoko mai ‘a e toko taha ko ia ‘e fakatatau ki he fa‘a ngāue ‘a Sētane, he‘ene fai‘aki ‘a e ngaahi fa‘ahinga mana kehekehe, mo e me‘a faka‘ilonga mo e me‘a fakaofo, ka ko e koto loi pē;#Māt 24.24 10mo e fai‘aki ‘a e fa‘ahinga fakahekeheke kotoa pē ki he kakai, ka ko e koto kākā: ‘io, ‘o fai ki he kakai ‘oku fakatau ki mala, ko e totongi ‘o e ‘ikai te nau tali ‘a e ‘ofa ki he mo‘oni ka nau mo‘ui ai. 11Pea ko hono ō ia ‘o e fekau atu kiate kinautolu ‘e he ‘Otua ha feinga fakahē, koe‘uhi ke nau tui ki he loi: 12kae faifai pea fakamaau ‘a kinautolu kotoa pē ‘oku ‘ikai tui ki he mo‘oni, ka ‘oku nau mālie‘ia ‘i he me‘a ‘oku hala.
Fai Totonu
13Ka ko kimautolu, ko ‘emau ngāue ke fai, ko e fakafeta‘i ma‘u ai pē ki he ‘Otua koe‘uhi ko kimoutolu, si‘i kāinga ‘ofeina ‘e he ‘Eiki, koe‘uhi ko e fili kimoutolu ‘e he ‘Otua mei he kamata‘anga,#2.13 fili… kamata‘angá; ‘Oku pehē ‘i hono ngaahi hiki fuoloa ‘e ni‘ihi: fili kimoutolu ‘e he ‘Otuá ko e fuofua kakai. ke mou ma‘u ‘a e fakamo‘ui, ‘i he fakamā‘oni‘oni‘i kimoutolu ‘e he Laumālie, pea ‘i ho‘omou tui ki he mo‘oni: 14‘a ia na‘e ui kimoutolu ki ai ‘e he‘emau Kōsipeli, ke mou lava‘i ‘a e lāngilangi ‘o hotau ‘Eiki ko Sīsū Kalaisi. 15‘Āua; ko ia, kāinga, ke mou tu‘u pē, pea puke ‘a e ngaahi tu‘utu‘uni na‘a mou ako ai ‘i he‘emau ngaahi lea mo e tohi.
16Pea ko e ‘Afio ‘a hotau ‘Eiki ko Sīsū Kalaisi, mo e ‘Otua ko ‘etau Tamai, ‘a ia ne ne ‘ofa‘i kitautolu, mo ne tuku mai ha tokoni ta‘engata mo ha ‘amanaki lelei ‘i he fai fakakelesi– 17‘ofa ke ne tokoni‘i ho‘omoutolu loto, pea ‘ilonga ha‘amou ngāue lelei, pe lea, ‘ofa ke ne poupou ai kimoutolu!
Currently Selected:
Tesalonaiká 2 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
