Tesalonaiká 2 1
1
1TŪ ko kimautolu, ‘a Paula mo Silivenusi mo Tīmote,#Ngā 17.1 ko ‘emau tohi ki he siasi ko ia ‘o e kakai Tesalonaika, ‘a ia ‘oku ‘i he ‘Otua ko ‘etau Tamai pea mo e ‘Eiki ko Sīsū Kalaisi.
2‘Ofa ke mou ma‘u kelesi mo e fiemālie mei he ‘Otua ko ‘etau Tamai, mo e ‘Eiki ko Sīsū Kalaisi.
Ko e Fakamaau ‘e Fai ‘e Kalaisi ‘oka Liuaki mai
3Kāinga, ‘oku hā mai ko ‘emau ngāue ke fai, ko e fakafeta‘i ma‘u ai pē ki he ‘Otua koe‘uhi ko kimoutolu; ‘io, ko hono taau ia, koe‘uhi ko e fu‘u tupulekina ‘o ho‘omou tui, pea mo e fakalahi ‘o ho‘omou ‘ofa, ko e ‘ofa ‘a e taha ki he taha. 4Ko ia, na‘a mo kimautolu ‘oku mau pōlepole ‘iate kimoutolu ‘i he ngaahi siasi ‘o e ‘Otua, koe‘uhi ko ho‘omou kātaki mo ho‘omou tui; neongo e ngaahi fu‘u fakatanga ‘omoutolu, mo e ngaahi mamahi ‘oku mou lolotonga fetakai.
5‘A ia ko e fakamo‘oni ‘oku ‘i ai ha fakamaau totonu ‘a e ‘Otua, ke faifai pea fakahā ai ho‘omou taau mo e Pule‘anga ‘o e ‘Otua, ‘a ia foki ko e me‘a ‘oku tautekovia ai kimoutolu. 6‘O kapau leva ‘oku me‘a ‘a e ‘Otua ‘oku totonu ke tongi mamahi kiate kinautolu ‘oku fakamamahi‘i kimoutolu: 7pea ke totongi kiate kimoutolu kuo fakamamahi‘i ‘aki ha mālōlō, ‘a ia te mou ma‘u fakataha mo kimautolu, ‘oka fakapū mai ‘a e ‘Eiki ko Sīsū mei he langi ‘i ha uloafi, pea ha‘ofia ‘e hono lahi ko e kau ‘āngelo, 8he‘ene fai sauni ki he kau ta‘e‘ilo ‘Otua, pea ki he kau ta‘etalangofua ki he Kōsipeli ‘o hotau ‘Eiki ko Sīsū; 9ko e fa‘ahinga ia te nau kai hono nunu‘a ko e faka‘auha ta‘engata, ‘o mama‘o mo e fofonga ‘o e ‘Eiki, pea mama‘o mei he lāngilangi ‘o ‘ene māfimafi;#‘Ais 2.10 10‘i he ‘aho ko ia te ne hoko mai ke hā hono lāngilangi he‘ene ho‘ata ‘i hono kau mā‘oni‘oni, pea hā hono fakaofo he‘ene ho‘ata ‘i he kakai na‘e tui; (‘o hangē pē ko ho‘omou tui ki he fakamatala na‘a mau fai atu). 11Pea koe‘uhi ke lava ‘a e me‘a ko ia, ko ia ‘oku mau hūfia foki kimoutolu ma‘u ai pē; koe‘uhi ke me‘a mo finangalo ‘e homau ‘Otua ‘oku mou taau mo e lakanga ne ui kimoutolu ki ai: pea ke ‘ilonga ha fakakaukau ‘o ho‘omou fie faitotonu, pea ke ‘ilonga ha feinga ‘o ho‘omou tui, ke ne fakaai ia ke tu‘u kaukaua; 12kae faifai pea hā ‘a e lāngilangi ‘o e huafa ‘o hotau ‘Eiki ko Sīsū, he‘ene ho‘ata ‘iate kimoutolu; pea ke hā homou lāngilangi he‘ene ho‘ata ‘iate ia: ‘o fakatatau ki he kelesi ‘a hotau ‘Otua, mo e ‘Eiki#1.12 ‘a hotau ‘Otuá mo e ‘Eiki; pe hotau ‘Otua mo ‘Eiki. ko Sīsū Kalaisi.
Currently Selected:
Tesalonaiká 2 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.