KO 2 SĀMIUELA 1
1
Ko e ‘Ilo ‘e Tēvita ‘a e Pekia ‘a Saulá
1PEA hili ‘a e pekia ‘a Saula, pea kuo foki ‘a Tēvita mei he taa‘i ‘o ha‘a ‘Amaleki, pea kuo ‘aho ua ‘ene nofo ‘i Sikilaki; 2‘iloange ‘i hono ‘aho tolu na‘e ha‘u ha tangata mei he ‘apitanga tau na‘e ‘ia Saula, pea kuo mahae hono kofu, pea kelekelea hono ‘ulu: pea ‘i he‘ene a‘u kia Tēvita, na‘a ne tōmape‘e ki he kelekele, ‘o fai ‘ene faka‘apa‘apa. 3Pea lea ‘a Tēvita kiate ia, Ko ho‘o ha‘u mei fē? Pea tali ‘e ia, ko ‘eku hola mei he ‘apitanga tau ‘o ‘Isileli.
4Pea pehē ‘e Tēvita kiate ia, Na‘e fēfē ‘a e me‘a? Fakamatala mai mu‘a. Pea tali ‘e ia, Kuo hola ‘a e kakai mei he tau, pea kuo tō foki honau tokolahi, ‘o pekia; kae‘uma‘ā kuo pekia ‘a Saula mo hono foha ko Sionatane.
5Pea pehē ‘e Tēvita ki he tama na‘e ha‘u mo e ongoongo, Na‘a ke ‘ilo fēfē kuo pekia ‘a Saula mo hono foha ko Sionatane?
6Pea talanoa ‘a e tama na‘e ha‘u mo e ongoongo, Na‘a ku ‘alu fāinoa ki Mo‘unga Kilipoa, pea tā ko Saula ena ‘oku ne fokotu‘u hono tao, ‘o mālōlō ai; pea ko e tau sāliote ena mo e tau heka hoosi ‘oku tata‘o mai.#1 Sām 31.1-6; 1 Kal 10.1-6 7Pea ‘i he‘ene kilo ki tu‘a ‘o ne ‘ilo au, na‘a ne ui mai. 8Pea u tali, Ko au eni. Pea ne me‘a mai, Ko hai koe? 9Pea u tali, Ko e ‘Amaleki au. Pea ne me‘a mai, Tu‘u mai mu‘a kiate au, ‘o tāmate‘i au, he kuo ma‘u au ‘e he ninimo, ka ‘oku kei kakato ‘eku mo‘ui. 10Ko ia na‘a ku tu‘u kiate ia, ‘o u tāmate‘i; he na‘a ku ‘ilo ‘e ‘ikai te ne mo‘ui hili ‘ene tō: pea u to‘o ‘a e kalauni mei hono ‘ulu, mo e vesa mei hono nima, pea kuo u ha‘u mo au ki heni ki he feitu‘u na.
11Pea ala ‘e Tēvita ki hono kofu, ‘o hae hifo; pea pehē foki ‘a e kau tangata na‘e ‘iate ia: 12pea nau tangi fetuki, mo ‘aukai, ‘o a‘u ki he efiafi, koe‘uhi ko Saula, pea koe‘uhi ko Sionatane ko hono foha, pea koe‘uhi ko e kakai ‘a Sihova, pea koe‘uhi ko e fale ‘o ‘Isileli; he‘enau tō ‘i he heletā.
13Pea pehē ‘e Tēvita ki he tama na‘e ha‘u mo e ongoongo, Ko e tangata mei fē koe? Pea ne pehē, Ko e foha au ‘o ha motu‘a muli ko e ‘Amaleki.
14Pea pehē ‘e Tēvita ki ai, Na‘e fēfē ho‘o fakata‘emālū‘ia ke ala ki he pani ‘a Sihova ke tāmate‘i? 15Pea ui ‘e Tēvita ki ha taha ‘a e kau tama, ‘o pehē, ‘Unu‘unu atu, ‘o taa‘i ia. 16Pea ne taa‘i ia, ‘o ne pekia. Pea pehē ‘e Tēvita ki ai, Ko ho toto ‘oku ‘i ho tumu‘aki ‘o‘ou; he na‘e fakamo‘oni ‘e ho ngutu ‘o‘ou ho‘o me‘a, ho‘o pehē, Ko au na‘a ku tāmate‘i ‘a e pani ‘a e ‘Eiki.
17Pea tēngihia ‘e Tēvita ‘a Saula mo hono foha ko Sionatane ‘aki ‘a e tangilāulau ko eni: 18pea ne fekau ke ako ‘a ha‘a Siuta ‘i he hiva na ko e Kaufana;#1.18 ke ako… Kaufana: Ko hono faka-Hepeluú ia, ka ‘oku pehē he hiki fuoloa ‘e taha: ke ako ia ‘e ha‘a Siuta. vakai kuo tohi ia ‘i he tohi ko Sesa.#Sios 10.13
19‘E ‘Isileli, kuo tāmate‘i ho‘o teunga
‘I he ngaahi potu mā‘olunga!
‘Oi, he tō ‘a e fa‘ahinga kaukaua!
20‘Oua ‘e tala ki Kati,
‘Oua ‘e fanongonongo ‘i he ngaahi hala ‘o ‘Asikeloni;
Na‘a fiefia ai ‘a kau ta‘ahine Filisitia,
Na‘a hākahaka ‘a e ‘ōfefine ‘o e kau ta‘ekamu na.
21Ngaahi mo‘unga ‘o Kilipoa,
‘Oua ‘e hahau pe ‘uha kiate kimoutolu na,
He li‘aki ai ‘a e pā ‘o e kau to‘a,
Ko e pā ‘o Saula, hangē ne ‘ikai pani ia.
22Mei he toto ‘o e tō, mei he ngako ‘o e to‘a,
Ko e kaufana ‘a Sionatane na‘e ‘ikai sītu‘a,
Pe foki nge‘esi ‘a e heletā ‘a Saula.
23Ko e me‘a faka‘ofa mo masani
‘a e vā ‘o Saula mo Sionatane ‘i he‘ena mo‘ui,
Pea ‘i he pekia na‘e ‘ikai te na māvae ai;
Na‘a na vave ‘i he fanga ‘īkale,
Na‘a na mālohi ‘i he fanga laione.
24‘A ta‘ahine ‘Isileli, mou tēngihia ‘a Saula,
‘Ene ‘atu hamou kofu kulokula,
Mo ni me‘a fakausousa,
Mo fakaheka ki homou kofu ‘a e teunga koula.
25‘Oi, he tō ‘a e fa‘ahinga kaukaua lolotonga ‘a e tau na!
Si‘i Sionatane kuo tō ho ngaahi potu mā‘olunga!
26Hoto nāpa‘a koe‘uhi ko koe, ‘alā Sionatane:
Ko ho‘o angalelei kiate au ko e me‘a kehe!
27‘Oi, he tō ‘a e fa‘ahinga kaukaua,
Mo e fu‘u mahafu kuo ‘auha!
Currently Selected:
KO 2 SĀMIUELA 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
