Kolinitō 2 7
7
1Ē, tuku hamau feitu‘u ‘i homou loto: tala‘ehai na‘a mau ngāue ta‘etotonu ki ha taha, tala‘ehai na‘a mau maumau‘i ha taha, tala‘ehai na‘a mau fakahekeheke‘i ha taha.
Ko e Fiefia ‘a Paula he Siasí
2‘Oku ‘ikai te u lea pehē ko e valoki: seuke, kuo ‘osi ‘eku fakahā ‘oku mou ‘i homau loto ke mate mo mo‘ui fakataha mo kimoutolu. 3‘Oku lahi ‘ete falala kiate kimoutolu, ‘oku lahi ‘ete pōlepole ‘iate kimoutolu. 4Kuo u fonu ngutungutu ‘i he fiemālie na‘e ‘omi; ‘oku hake fu‘u ‘a e fiefia, pea ngalo ai ‘emau ngaahi mamahi kehekehe.
5He na‘a mo ‘emau ōmai ki Masitōnia ni, ka na‘e ‘ikai momo‘i manofo homau kakano, ka na‘e tautu‘u mai homau fakamamahi mei he potu kotoa pē: mei tu‘a ko e koto fepaki, mei loto ko e koto hoha‘a.#2 Kol 2.13 6Ka ko e ‘Otua, ‘a ia ‘oku ne tokoni ai pē kiate kinautolu ‘oku mo‘ulaloa, na‘a ne tokoni‘i kimautolu ‘aki ‘a e lava mai ‘a Taitusi: 7‘o ‘ikai ‘aki ‘ene lava mai pē, kae ‘aki ‘a e tokoni foki, ‘a ia ne tokoni ‘aki ia ‘e kimoutolu: he na‘e pehē ‘ene fakamatala kiate kimautolu ho‘omou holi mai, ho‘omou fakamamahi, ho‘omou mamahi‘i au; ko ia na‘e ‘āsili ai ‘eku fiefia.
8He neongo na‘a ku fakamamahi‘i kimoutolu ‘aki ‘eku tohi, ‘oku ‘ikai te u tālakitu‘a ‘i he‘eku fai ia, ka ‘oku mo‘oni na‘a ku tālakitu‘a ai. 9Neongo na‘e fuonounou, ka ‘oku ou vakai na‘e ‘i ai mo‘oni ho‘omou mamahi ‘i he tohi ko ia; ka ‘oku ou fiefia ‘eni, ‘o ‘ikai pē koe‘uhi ko ho‘omou mamahi, ka koe‘uhi na‘e iku ho‘omou mamahi ki ho‘omou fakatomala: he ko homou fakamamahi na‘e fai ‘i he funga ‘o e finangalo ‘o e ‘Otua, ke ‘oua na‘a ai hamou maumau‘i ‘e hoko ‘i he‘emau ngāue. 10He ko e mamahi ‘oku faka‘otua hono fai, ‘oku ne langa‘i ha fakatomala ‘oku iku ki ha fakamo‘ui, ‘a ia ‘e ‘ikai tālakitu‘a ai ha taha: ka ko e mamahi ‘oku fakaemāmani ‘oku ne fakatupu mate. 11He vakai ‘a e me‘a na, ‘a ho‘omou mamahi faka‘otua na‘e fai, hono nifi ‘a e feinga na‘e tupu ai ‘iate kimoutolu! kae‘uma‘ā ‘a e faka‘ata‘atā kimoutolu, ‘uma‘ā ‘a e faka‘ise‘isa‘ia, ‘uma‘ā ‘a e manavahē mai, ‘uma‘ā ‘a e holi mai, ‘uma‘ā ‘a e manavakāvakava, ‘uma‘ā ‘a e fai tautea! Kuo mou fai homou tūkuingata ke fakahā ‘oku mou ‘ata‘atā ‘i he me‘a.
12‘Āua; he neongo na‘a ku tohi pehē atu, tala‘ehai na‘a ku fai koe‘uhi ko e siana na‘e fai ‘a e kovi, ‘uma‘ā ‘a e tangata na‘e fai ki ai ‘a e kovi; ka koe‘uhi ke e‘a kiate kimoutolu, pea ‘i he ‘ao ‘o e ‘Otua, ‘a e toka homou loto kiate kimautolu. 13Ko hono ‘uhinga ia ‘e taha ‘o ‘emau fiemālie na‘e fai: ka na‘e fakalahi ki ai, ‘io, ko e me‘a na‘e fu‘u hulu atu ai ‘emau fiefia, ko e fiefia ‘a Taitusi, koe‘uhi kuo ma‘u nonga hono loto meiate kimoutolu kotoa pē.
14He ka ai ha‘aku pōlepole ‘iate kimoutolu ne fai kiate ia, ne ‘ikai fakamaa‘i ai au; kaekehe hangē na‘e mo‘oni ‘emau ngaahi lea kehekehe na‘e fai kiate kimoutolu, pehē foki na‘e hā ‘oku mo‘oni mo ‘emau pōlepole na‘e fai ‘i he ‘ao ‘o Taitusi. 15‘Io, ‘oku ‘āsili ngaue hono fatu kiate kimoutolu ‘i he‘ene fa‘a manatu hake ki he talangofua ‘amoutolu kotoa pē, ‘a ho‘omou tali ia ‘i he ‘apasia mo e tailiili. 16‘Ā, ‘oku te fiefia; he ko e me‘a ‘i ho‘omou ngāue, ‘oku te to‘a ‘i he me‘a kotoa pē.
Currently Selected:
Kolinitō 2 7: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
