Kolinitō 2 6
6
1Kae‘uma‘ā ‘i he‘emau kaungā ngāue mo ia ‘oku mau enginaki foki ke ‘oua na‘a iku ho‘omou tali ‘a e kelesi ‘a e ‘Otua ko e laufanō. 2He ‘oku ne folofola,#‘Ais 49.8
Ko e taimi tali hū ne u ongo‘i ai ko ē,
Ko e ‘aho fai fakamo‘ui ne u tokoni ai koe.
Vakai mai, ko eni pē e taimi mātu‘aki tali hū;
Vakai mai, ko eni pe ‘aho fai fakamo‘ui.
3Kae‘uma‘ā ‘oku mau tokanga ke ‘oua na‘a ai ha tūkia‘anga ‘e tupu ‘i ha‘amau me‘a, na‘a lau‘i ‘a e lakanga. 4Kaekehe ‘oku mau fai ‘a e me‘a ‘oku taau mo e kau sevāniti ‘a e ‘Otua ke fai, ‘oku mau ‘ai ke mau ongolelei ‘i he me‘a kotoa pē–‘i he fa‘a kātaki, ‘i he fa‘a fetekeekina, ‘i he fa‘a faingata‘a‘ia, ‘i he fa‘a ‘efitu‘ua; 5‘i he fa‘a haha, ‘i he fa‘a nofo pilīsone, ‘i he fa‘a ‘ohofia; ‘i he fa‘a ngāue fakaongosia, ‘i he fa‘a ‘ā, ‘i he fa‘a ‘aukai;#Ngā 16.23 6he‘emau anga ma‘a, he‘emau poto ‘i he folofola, he‘emau anga mokomoko, he‘emau anga ‘ofa; 7he‘emau Laumālie Mā‘oni‘oni‘ia, he‘emau ‘ofa ta‘eloi, he‘emau tala ‘a e mo‘oni, he‘emau ma‘u ivi mei he ‘Otua; 8ko ‘emau fai‘aki ‘a e mahafu ‘a e tonuhia ‘i to‘omata‘u mo to‘ohema, ko ‘emau ‘asi atu ‘i he toke‘ia mo e ta‘etoke‘ia, he lau‘ikovia mo e lau‘ileleia; 9tokua ko e kau fai kākā mo e kau fai mo‘oni, tokua ko e kau ta‘e‘iloa mo e kau ‘iloa; tokua ‘oku mau tau‘aki, kae uē! ‘oku mau mo‘ui; tokua ko homau tautea ‘oku fai, ka ko eni, 10‘oku ‘ikai te mau mate; tokua ko e kau toloto ‘i he mamahi, ka ‘oku mau fiefia ma‘u ai pē; tokua ko e kau masiva, ka ‘oku mau fakakoloa ha tokolahi; tokua ko e kau ta‘e-ma‘u-ha-me‘a; ‘osi, ‘oku mau mātu‘aki ma‘u ‘a e me‘a kotoa pē.
11Si‘i kau Kolinitō, kuo fu‘u pu‘aki atu ‘e homau ngutu, kuo fano homau loto. 12Ko ho‘omou ‘efi‘efi na ‘oku ‘ikai ‘iate kimautolu, ka ‘oku ‘i he manava ‘omoutolu pē. 13‘Ē, ka u lea hangē ki ha fānau, mou tali ‘eku fai‘aki ha fai pehē, ‘o mou fano mo kimoutolu.
Ko e Temipale ‘o e ‘Otua Mo‘uí
14‘Oua te mou hanga ‘o hoa-‘a-kehe, he nonofo mo e kau ta‘elotu: he ‘e me‘a taha fēfē ‘a e faitotonu mo e malakilao? pe feohi fēfē ‘a e maama mo e po‘uli? 15‘io, ‘o loto taha fēfē ‘a Kalaisi mo Peliali? Pe ‘inasi fakataha fēfē ‘a e lotu mo e ta‘elotu? 16‘io, pea fa‘ahi fēfē ‘a e temipale ‘o e ‘Otua mo e ngaahi ‘aitoli? He ko kitautolu ko e temipale ‘o e ‘Otua Mo‘ui; ‘o hangē ko ‘ene folofola ‘a e ‘Otua, ‘o pehē,#Lev 26.12; ‘Isi 37.27; 1 Kol 3.16; 6.19 Te u fale ‘aki kinautolu, te u ‘eve‘eva ‘iate kinautolu, pea te u nofo ko honau ‘Otua, pea te nau nofo ko hoku kakai. 17Ko ia, mou hiki mei honau lotolotonga, pea mavahe kimoutolu, pea ‘oua te mou ala ki he me‘a ta‘ema‘a; ko e folofola ē ‘a e ‘Eiki–#‘Ais 52.11 18Pea te u ma‘u kimoutolu ‘e au, pea te u nofo atu ma‘amou tamai,#2 Sām 7.14; 1 Kal 17.13; ‘Ais 43.6; Sel 31.9 pea te mou nofo mai mōku ngaahi foha mōku ngaahi ‘ōfefine–ko e folofola ē ‘a e ‘Eiki Fakaleveleva. 19Ko ia, si‘oku ‘ofa‘anga, he‘etau ma‘u ha ngaahi palōmesi pehē fau, tau fakama‘a kitautolu mei he ‘uli kotoa pē ‘o e kakano mo e loto, ‘o tau fakakakato ‘etau mā‘oni‘oni ‘i he ‘apasia ki he ‘Otua.
Currently Selected:
Kolinitō 2 6: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
