Kolinitō 2 4
4
Ko e Koloa ‘i he Ipu ‘Umea
1PEA ko e me‘a ‘i he‘emau ma‘u ‘a e lakanga ko ē (‘a ia ko e ‘ofa tu‘unga‘a pē na‘e fai); ko ia, ‘oku ‘ikai te mau fo‘i. 2Ka mau li‘aki ‘a e fai fufū ‘o e ngaahi me‘a fakamā, ‘o ‘ikai te mau laka fakaoloolo, ‘uma‘ā ha‘amau hu‘i ‘a e folofola ‘a e ‘Otua: ka ko ‘emau ‘ai ke e‘a ‘a e mo‘oni, ko e me‘a ia ‘oku mau fakaongo ‘aki kimautolu ki he konisēnisi kehekehe ‘o e kakai ‘i he ‘ao ‘o e ‘Otua. 3Pea kapau ‘oku mo‘oni ‘oku pulonga ‘emau kōsipeli, ‘oku pulonga pē ‘i he kakai ‘oku fakatau ki mala–‘a kinautolu kuo mo‘oni ai ‘a e me‘a. 4Kuo fakakui ‘e he ‘otua ‘o e tu‘u ko eni ‘a e ‘atamai ‘o e kau ta‘etui, koe‘uhi ke ‘oua na‘a hulu‘ia ‘e he ulo mei he Kōsipeli ‘o e lāngilangi ‘o Kalaisi, ‘a ia ko e ‘īmisi ‘o e ‘Otua. 5(He tala‘ehai ‘oku mau malangaekina kimautolu; ka ‘oku mau malanga‘aki ‘a Kalaisi Sīsū ko e ‘Eiki, pea ko kimautolu ko ho‘omou kau tamaio‘eiki koe‘uhi ko Sīsū.) 6He ko e ‘Otua ia na‘a ne folofola, ‘E ulo mai ha maama mei he po‘uli; pea ko ia ia kuo ne ulo ‘i homau loto, koe‘uhi ke ai ha ulo atu ‘o e ‘ilo ki he lāngilangi ‘o e ‘Otua, ‘i he fofonga ‘o Sīsū Kalaisi.#Sēn 1.3
7Ka ko e anga ‘o ‘emau ma‘u ‘a e koloa ko ia, ‘oku fa‘o hina kelekele, koe‘uhi ke ‘a e ‘Otua ai pē ‘a e makehe atu ‘o e mafai, ‘o ‘ikai ko e me‘a meiate kimautolu. 8Ko homau anga ē, ko e fetekeekina kimautolu mei he potu kotoa pē, kae ‘ikai ‘efitu‘ua; ko e fakapalalaua tu‘u kae ‘ikai hē ‘aupito; 9ko e tulia kae ‘ikai li‘ekina ki he fili; ko e te‘ia kae ‘ikai fakamate. 10‘Oku mau ‘alu fano ai pē mo kimautolu ‘i he sino ni ‘a e tau‘aki ‘a Sīsū, koe‘uhi ke hā foki ‘i homau sino ‘a e mo‘ui ‘a Sīsū. 11Seuke, neongo ko e mo‘ui kimautolu, ka ‘oku tukuange ai pē kimautolu ke mate, koe‘uhi ko Sīsū; koe‘uhi ke hā ‘a e mo‘ui foki ‘a Sīsū ‘i he kakano mate ni ‘omautolu. 12Ko ia, ko e mate ia ‘oku ngāue ‘iate kimautolu, ka ko e mo‘ui ‘iate kimoutolu.
13Ka ko e me‘a ‘i he‘emau ma‘u ha laumālie tui, tatau mo ia ‘oku lau ki ai ‘a e Tohitapu, Na‘a ku tui, ko ia na‘a ku lea; pehē ‘oku mau tui foki, ko ia foki ‘oku mau lea:#Saame 116.10 (LXX) 14he‘emau ‘ilo, ko ia na‘a ne fokotu‘u ‘a Sīsū, te ne fokotu‘u kimautolu foki mo Sīsū, pea ‘atu kimautolu fakataha mo kimoutolu. 15He ko e me‘a ko ia kotoa ‘oku ma‘amoutolu, koe‘uhi ke opeope ‘a e kelesi, ko e me‘a ‘i he tokolahi ‘oku ma‘u ia, pea fakautuutu ai ‘i he‘ene ngāue ‘a e fakafeta‘i, kae ongoongolelei ai ‘a e ‘Otua.
Ko e Mo‘ui he Tuí
16Ko ia ai, ‘oku ‘ikai te mau fo‘i, ka neongo ‘oku ‘au‘auha homau nge‘esi tangata ni, ka ‘oku fai ai pē ‘a e fakafo‘ou ‘o homau tangata ‘i loto, ‘o hokohoko ‘aho pē. 17He ko homau mamahi ma‘ama‘a ni mo mole, ‘oku ne fakatupu ma‘amautolu ha lāngilangi mamafa mo ta‘engata, ko e me‘a fungani ‘i he fungani ange fau; 18lolotonga ‘oku ‘ikai te mau tokanga‘i ‘a e ngaahi me‘a ‘oku hā ni, ka ko e ngaahi me‘a ‘oku ‘ikai hā: he ko e ngaahi me‘a ‘oku hā ‘oku fakataimi pē, ka ko e ngaahi me‘a ‘oku ‘ikai hā ‘oku faka‘ītāniti.
Currently Selected:
Kolinitō 2 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
