Kolinitō 2 3
3
Ko e Aleapau Fo‘ou ‘a e ‘Otuá
1TĀ ko ‘emau toe kamata ē ke sani kimautolu, ‘ō? tā na‘e mei totonu ‘apē ke mau fai ‘o hangē ko e ni‘ihi, ‘o ma‘u tohi fakaongo ‘i he‘emau ‘alu atu, pea ma‘u foki meiate kimoutolu ‘i he‘emau ō mai, ‘ō? 2‘Ā, ko kimoutolu ko ‘emau tohi kuo tongi ‘i homau loto, ‘o lau mo toe lau ‘e he kakai kotoa pē: 3‘o mou mātu‘aki e‘a ko e tohi na‘e fai ‘e Kalaisi, ‘o ‘ave ‘e kimautolu; ‘a ia ‘oku ‘ikai fai‘aki ‘a e vaitohi, kae ‘aki ‘a e Laumālie ‘o e ‘Otua Mo‘ui, ‘o ‘ikai tongi ‘i ha ngaahi tohi‘anga maka, ka ‘i ha ngaahi tohi‘anga mo‘ui, ko e ngaahi loto.#‘Eki 24.12; Sel 31.33; ‘Isi 11.19; 36.26
4Pea ko eni, ko e me‘a ‘ia Kalaisi, ‘oku ‘i ai ha‘amau falala pehē ‘i he‘emau feangai mo e ‘Otua. 5‘Oku ‘ikai ko ‘eku pehē, ‘oku mau fe‘unga ‘e kimautolu ke fakakaukau ha me‘a fakaekimautolu pē; ka ko homau fe‘unga‘anga ‘oku mei he ‘Otua; 6‘a ia foki na‘a ne ngaohi kimautolu ke fe‘unga mo homau lakanga, ko e kau talafekau ‘o e Fuakava Fo‘ou, ‘o ‘ikai ‘o ha tohi, ka ‘o ha laumālie. He ‘oku nofo ‘a e tohi ke tāmate, ka ‘oku nofo ‘a e laumālie ke fakamo‘ui.#Sel 31.31
7Pea ko eni, ko e tala mate na, ‘a ia na‘e tohi mata‘itohi mo tongi tongi ‘i ha ngaahi maka, ka na‘e pehē fau ‘a e lāngilangi ‘o ‘ene hoko mai, ko ia na‘e ‘ikai lava ‘e ha‘a ‘Isileli ke sio fakamama‘u ki he fofonga ‘o Mōsese, koe‘uhi ko e lāngilangi ‘o hono fōtunga, ‘a ia na‘e mole ngofua.#‘Eki 34.29 8Pea kapau ko ia, huanoa ‘a e hoko lāngilangi mai ‘a e tala laumālie. 9‘Io, kapau ko e me‘a lāngilangi ‘a e tala fakamo‘ua, kae huanoa ‘ene hulu atu ‘a e tala fakatonuhia ‘i he lau lāngilangi. 10Pea neongo ko ha me‘a lāngilangi ‘ia, seuke, ‘oku ‘ikai hano lāngilangi ‘i he feitu‘u ko eni, koe‘uhi ko ‘ene fungani hake ‘a e lāngilangi ‘e taha. 11‘Io, kapau na‘e fou lāngilangi mai ‘a e me‘a mole, huanoa ‘ene lāngilangi‘ia ‘a e me‘a tolonga.
12Ko ia, ‘i he‘emau ma‘u ha ‘amanaki pehē, ‘oku mau ‘ai ke mahino ‘aupito ‘emau lea. 13Pea ‘oku ‘ikai te mau fai ‘o hangē ko Mōsese, ‘a ia na‘a ne fa‘a ‘ai ha pulonga ki hono fofonga, koe‘uhi ke ‘oua na‘a sio atu ‘a ha‘a ‘Isileli, ‘o ma‘u ‘ene ngata ‘a e me‘a mole na.#‘Eki 34.33 14Kaekehe, na‘e hoko ‘o kanongata‘a honau ‘atamai: seuke, ‘oku kei tu‘u pē ‘a e pulonga pē ko ia, ‘o a‘u mai ki he ‘aho ni, ‘oka fai ‘a e lau ‘o e Fuakava Motu‘a; ‘o ‘ikai tatala ‘a e pulonga ‘o ‘ilo kuo ka‘anga ia ‘ia Kalaisi. 15‘Io, ka fai ha lau ‘o Mōsese ‘oku ma‘u pulonga honau loto, ‘o a‘u ki he ‘aho ni: 16ka ‘oka tafoki ia ke hanga ki he ‘Eiki, pea to‘o ‘a e pulonga.#3.16 ka… pulonga; Ko hono hiki ‘e taha ‘o e vēsí ni ‘oku pehē: ka ‘oka tafoki ha taha ki he ‘Eikí pea ‘oku to‘o leva ‘a e pulongá. #‘Eki 34.34 17Ka ko e ‘Eiki ko eni ko e Laumālie: pea ‘ilonga ha potu ‘oku ‘i ai ‘a e Laumālie ‘o e ‘Eiki ‘oku ‘i ai ‘a e tau‘atāina. 18Ka ko kitautolu kotoa pē, lolotonga ‘etau lau ta‘epūlou, ‘o sio ki he lāngilangi ‘o e ‘Eiki hangē ha ma‘ali mai ‘i ha sio‘ata, ‘oku tau liliu ai ki hono ‘īmisi ko ia, ‘o fai mei ha lāngilangi ki ha lāngilangi, ‘o hangē ai pē ko e ngāue ‘a e ‘Eiki ko Laumālie.
Currently Selected:
Kolinitō 2 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
