Kolinitō 2 11
11
Ko e Paula mo e Kau ‘Apōsitolo Kākā
1TAUANGE mo kimoutolu ke mou kātaki si‘aku fai fakasesele! ka ko ‘eku lau ki ai: he ‘oku mou fa‘a kātaki ‘eku tō‘onga. 2He ‘oku ou fua‘atekina kimoutolu, he‘eku fua‘a telia ‘a e ‘Otua: he na‘a ku moa‘uli‘i kimoutolu ke mali mo ha toko taha pē, ‘io, ke u ‘atu kimoutolu kia Kalaisi ko e ta‘ahine molumalu. 3Pea ‘oku te manavahē tu‘u na‘a ‘iloange ‘e le‘ei ho‘omou tokanga, ‘o mou hiki mei ho‘omou toka taha mo nofo molumalu kia Kalaisi; ‘o hangē ne kākaa‘i ‘a ‘Ivi ‘e he Ngata ‘aki ‘ene olo.#Sēn 3.1-5,13 4‘Io, kapau ‘oku malanga‘aki ‘e he ha‘u fo‘ou na ha Sīsū ‘e taha, ‘a ia ‘oku ‘ikai ko e Sīsū na‘a mau malanga‘aki; pea kapau ‘oku mou ma‘u ai ha Laumālie ‘oku fa‘a hinga kehe mo ia na‘a mou ma‘u mu‘a, pe ha Kōsipeli ‘oku fai kehe mo ia na‘a mou tomu‘a tali; pea tā ‘oku tonuhia pē ho‘omou kātaki ‘ene tō‘onga.
5He seuke, ‘oku te pehē ‘e kita ‘oku ‘ikai te te momo‘i tōmui ‘i he ha‘a ‘aposetolo makehe atu na. 6He neongo nai ko e kapo kita ‘i he lea, ka tala‘ehai ‘oku ou pehē ‘i he ‘ilo me‘a loloto: kaekehe, ‘ilonga ha me‘a na‘a mau fai ki ai, na‘a mau ‘ai ke matala ‘i he ‘ao ‘o e kakai kotoa pē ke ‘aonga kiate kimoutolu.
7Ka na‘a kuo u angahala ko ‘eku fakamā‘ulalo ke lava ai homou fakamā‘olunga, ‘ō? ‘A ‘eku malanga‘aki ‘a e Kōsipeli ‘a e ‘Otua kiate kimoutolu ta‘etotongi. 8Na‘a ku fakamasiva ‘a e ngaahi siasi kehe, ‘o u ma‘u ‘oho mei ai ki he‘eku ngāue kiate kimoutolu. 9Pea ‘i he‘eku ‘iate kimoutolu, pea faifai pea u masiva, ka tala‘ehai na‘a ku tuku tāupe ‘i ha taha: he na‘e fakaai hoku masiva ‘e he kāinga ‘i he‘enau omi mei Masitōnia. Pea ‘i he me‘a kotoa pē na‘a ku ta‘ofi au, ke ‘oua na‘a ku hoko ko e kavenga kiate kimoutolu; ‘io, pea te u ta‘ofi ai pē.#Filip 4.15-18 10Ko e mo‘oni ‘a Kalaisi ‘oku ou fai‘aki, ‘o u pehē ‘e ‘ikai ta‘ofi au mei he pōlepole ko ia ‘i he ngaahi feitu‘u ‘o ‘Akeia. 11Ko e hā nai? Ko e ‘ikai te u ‘ofa kiate kimoutolu, ‘ō? ‘Ā, ‘oku mea‘i ia ‘e he ‘Otua.
12Ka ko e me‘a ‘oku ou fai, te u fai ai pē foki; koe‘uhi ke u motuhi ‘aupito ‘a e tu‘unga ‘o e fa‘ahinga na ‘oku fie ma‘u ha tu‘unga ki he‘enau lau; pea ke nau hoko ‘o hangē ko kimautolu ‘i he me‘a ko ia ‘oku nau pōlepole ai. 13He ko e fa‘ahinga ko ia, ko e kau ‘aposetolo loi, ko e kau ngāue fakahekeheke: ‘oku nau ‘ai ai pē ‘a e anga ‘o e kau ‘aposetolo ‘a Kalaisi. 14Pea ko hai ‘e ofo ai? He na‘a mo Sētane ‘oku ne ‘ai ‘a e anga ‘o ha ‘āngelo mei he maama. 15Pea tala‘ehai ko e me‘a fakaofo ‘a e ‘ai ‘e he‘ene kau sevāniti ‘a e anga tofu pē ‘o e kau sevāniti ‘a faitotonu: ka ko e iku‘anga ‘o e fa‘ahinga ko ia ‘e fakatatau ki he‘enau ngāue.
Ko e Kātaki Mamahi ‘a Paula koe‘uhí ko Kalaisi
16Ka u foki ki he‘eku lea: ‘ofa ke ‘oua na‘a lau au ‘e ha taha ko e sesele: pea kapau ‘e ‘ikai lava ia, pe‘i tali pē au ‘aki ‘a e tali ‘o e sesele, koe‘uhi ke u fai mo au ha‘aku ki‘i pōlepole. 17Ko e me‘a ‘oku ou teu lau, tala‘ehai ‘oku ou lau ko ‘eku ma‘u ha fa‘ifa‘itaki‘anga mei he ‘Eiki; ka ‘oku hangē kuo u puke fakasesele he‘eku falala pehē ki he pōlepole. 18Ko eni ‘oku ‘i ai ha tokolahi ‘oku pōlepole fakakakano, ko ia ka u pōlepole mo au. 19He seuke! ‘Oku mou kātaki fiemālie ‘a e kau sesele: kae fēfē, he ko e kau poto kimoutolu. 20Seuke, ‘oku mou kātaki pē neongo ‘ene fakapōpula‘i kimoutolu ‘e ha taha, neongo ‘ene kai ‘o ‘osi ho‘omou me‘a, neongo ‘ene tauhele‘i kimoutolu, neongo ‘ene fakahīkihiki ia, neongo ‘ene sipi‘i homou mata, ka ‘oku mou kātaki ia. 21Tā ‘oku hoa ‘eku lea mo hoku lau‘i, ‘a e pehē na‘a mau vaivai. Ka ‘ilonga ha me‘a ‘oku tu‘unga ai ha taha ‘ene mālohi, ko e me‘a ko ia ‘oku ou mālohi ai au (ko ‘eku fakasesele ‘eni ‘oku lea).
22Ko e Hepelū koā kinautolu? pehē mo au. Ko e ‘Isileli kinautolu? pehē mo au, Ko e hako ‘o ‘Epalahame kinautolu? pehē mo au. 23Ko e kau sevāniti ‘a Kalaisi kinautolu? (ka u lea hangē ha kua) makehe atu pē au: he hulu atu ‘eku fakafitefita‘a, he hulu atu ‘eku nofo pilīsone, he ngei hoku taa‘i, he tu‘o lahi ‘eku tei mate–#Ngā 16.23 24Ne tu‘o nima mālō hoku kaui‘imaea‘i ‘e he kakai Siu, pea ka nau ka fai, na‘e toe ‘a e hapo ‘e taha pea kakato ‘a e fāngofulu‘i hapo;#Teu 25.3 25kuo tu‘o tolu hoku loholoho‘i faka-Loma, tu‘o taha hoku tolomaka‘i, tu‘o tolu ‘eku vaka mamate, ko e ‘aho kotoa mo e pō mo ‘eku kakau ‘i he moana–he‘eku fononga tu‘o lahi;#Ngā 16.22; 14.19 26he‘eku fa‘a meimei tu‘utāmaki ‘i he ngaahi vaitafe, he‘eku fa‘a meimei tu‘utāmaki ‘i he ngaahi kaiha‘akau, he‘eku fa‘a meimei tu‘utāmaki ko e ngāue ‘a hoku fa‘ahinga, he‘eku fa‘a meimei tu‘utāmaki mei he Senitaile, he‘eku fa‘a meimei tu‘utāmaki ‘i kolo, he‘eku fa‘a meimei tu‘utāmaki ‘i tua‘ā, he‘eku fa‘a meimei tu‘utāmaki ‘i tahi, he‘eku fa‘a meimei tu‘utāmaki mei he kau lotu loi;#Ngā 9.23; 14.15 27he fitefita‘a mo e ongosia, he‘eku fa‘a ‘ā fuoloa, he‘eku fiekaia mo fie inua, he‘eku fa‘a ‘aukai, he‘eku mokosia mo masiva kofu. 28Pea ke ‘oua na‘a ku lau kotoa, ka ‘oku ‘i ai ‘eku kavenga ‘oku hilifaki mai ‘i he ‘aho kotoa pē, ko e lotomo‘ua he tauhi ‘o e ngaahi siasi. 29‘Anefē ha vaivai ha taha, ‘o ‘ikai te u vaivai ai? ‘Anefē ha humu ha taha, ‘o ‘ikai te u vevela ai?
30‘Ē, ka kuo pau ke u pōlepole, pea tā te u pole pē he‘eku ngaahi vaivai ‘anga. 31Ko e ‘Otua mo Tamai ‘a e ‘Eiki ko Sīsū, ‘a ‘ene ‘Afio ‘oku ‘o‘ona ‘a e fakamālō ‘o lauikuonga, ‘oku ne mea‘i ‘oku ‘ikai te u loi. 32‘I he‘eku ‘i Tāmasikusi, na‘e le‘ohi ‘a e kolo ‘o e kau Tāmasikusi ‘e he kōvana ‘a e tu‘i ko ‘Aletasi, ko ‘ene fie puke au:#Ngā 9.23-25 33pea na‘e fakahū au ‘i ha tupa ‘i ha kato, ‘o tukutukuhifo kitua‘ā, pea u hao meiate kinautolu.
Currently Selected:
Kolinitō 2 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
