Kolinitō 2 12
12
Ko e Ngaahi Vīsone ‘a Paula
1TĀ kuo pau ke u pōlepole: pea neongo ‘e ‘ikai te u hā lelei ai, ka u fai atu pē ki he ngaahi vīsone, mo e fa‘a fakahā me‘a mei he ta‘ehāmai ‘e he ‘Eiki. 2‘Oku ‘i ai ha tangata Kalisitiane ‘oku ou ‘ilo ki ai, pea ko hono hongofulu mā fā ta‘u ‘eni talu e me‘a ‘oku ou lau ki ai: na‘e punakaki ‘a e toko taha ko ia ki he langi tu‘o tolu: (‘oku ‘ikai te u ‘ilo pe na‘a ne sino, pea ‘oku ‘ikai te u ‘ilo pe kuo ne hiki mei he sino: ko e ‘Otua pē ‘oku ne mea‘i). 3‘Io, ‘oku ou ‘ilo ha tangata na‘e pehe‘i; (hei‘ilo pe na‘e ‘ave mo e sino, pe na‘e tuku ‘a e sino; ko e ‘Otua pē ‘oku mea‘i): 4tokua na‘e punakaki ia ki Palataisi; pea ne ongo‘i ai ha ngaahi lea tāpuhā, ‘a ia ‘oku ‘ikai ngofua ki ha tangata ke lea‘aki. 5‘E ai ha‘aku pole ‘i ha toko taha ‘e pehe‘i; ka ‘e ‘ikai ha‘aku pole ‘ia kita tonu, ka ‘i hoku ngaahi vaivai‘anga pē. 6Seuke, ka ne u loto ke pōlepole, tala‘ehai te u hā ko e sesele; he ko e tala fai tu‘unga te u fai. Ka neongo hono makehe atu ‘o e fakahā me‘a mei he ta‘ehāmai kiate au, ka ‘oku te faka‘ehi‘ehi mei he pōlepole ai; na‘a hulu atu hoku tokanga‘i ‘e ha taha ‘i he me‘a ‘oku ne vakai ‘iate au mo fanongo ‘iate au.
7Ko ia, telia na‘a ku anga hiki ai, na‘e tuku mai ha foto ke nofo ‘i hoku kakano, ko e ‘āngelo ‘a Sētane, ke ne tukimononofoa au, ke ‘oua na‘a ku anga hiki. 8Na‘e tu‘o tolu ‘eku kole ki he ‘Eiki ‘i he toko taha ko ia, ke ne hiki meiate au: 9pea kuo ne folofola mai, ‘Oku fu‘u lahi ‘eku kelesi ki ho‘o me‘a; he ‘oku toki hā hono ivi kotoa he tu‘u ‘i he vaivai. Pea ka ko ia, pea tā te u fili mu‘a ke fai ‘eku pole vaivai ni, koe‘uhi ke hifo mai ‘a e ivi ‘o Kalaisi, ‘o fokotu‘u hono Tāpanekale ‘iate au. 10Ko hono ‘uhinga ia ‘oku ou hōhō‘ia ai ‘i hoku ngaahi vaivai‘anga, ‘i he fa‘a pā‘usia, ‘i he fa‘a faingata‘a‘ia, ‘i he fa‘a fakatanga‘i, ‘i he fa‘a ‘efitu‘ua, koe‘uhi ko Kalaisi; he ka u ka vaivai, ko ‘eku toki mālohi ē.
Ko e Hoha‘a ‘a Paula ki he Kau Kolinitoó
11Tā kuo u hoko ‘o sesele: ka na‘a mou loki au ki ai. Seuke, na‘e mei totonu mu‘a ke sani au ‘e kimoutolu: he tala‘ehai na‘a ku momo‘i tōmui ‘i he ha‘a ‘aposetolo makehe atu na; neongo ko e me‘a noa au. 12Kehe na‘e feia ‘i homou lotolotonga, ‘i he funga ‘o ha fu‘u kātaki, ‘a e ngaahi faka‘ilonga ‘aposetolo, ko e ngaahi me‘a faka‘ilonga mo fakaofo, mo e ngaahi mana mo‘oni. 13He ko e hā tū ha me‘a ne mou tōmui ai ‘i he ngaahi siasi kehe? Ngata pē ‘apē ‘i he ‘ikai te u fakamafasia kimoutolu ‘e au. ‘Ē, fakamolemole ‘eku ngāue kovi ko ia.
14Vakai, kuo ‘osi ‘eni ‘eku teu ke ‘alu atu ko hono tu‘o tolu; ka ‘e ‘ikai te u fakamafasia ai kimoutolu; he ‘oku ‘ikai te u fiema‘u ho‘omou me‘a, ka ko kimoutolu ‘atā pē. He tala‘ehai ko e ngāue ‘a e fānau ke fokotu‘u koloa ma‘a e mātu‘a, ka ko e mātu‘a ma‘a e fānau: 15ka ko au ‘oku ou mātu‘aki loto ke mahomo atu ‘eku me‘a, ‘io, ke ‘osi atu mo au foki koe‘uhi ko homou laumālie, neongo ‘e faka‘au hifo hoku ‘ofa‘i ‘i he tupulekina ‘eku ‘ofa atu.
16Pea ko eni, tau tuku ko ia: tā na‘e ‘ikai te u fakamafasia kimoutolu ‘e au; ka ko ‘eku ma‘u kimoutolu, tokua, ‘aki ‘eku olo, he ko e tama kākā. 17‘Ē, hono ai ha taha kuo u fekau atu, ‘o u ma‘u me‘a ai meiate kimoutolu, ‘ō? 18Ne u kole ‘a Taitusi ke ‘alu atu, pea u fekau ke ‘alu mo ia ‘a e kāinga ‘e taha; ne ma‘u me‘a ‘a Taitusi meiate kimoutolu, ‘ō? ‘Ikai ‘oku taha tofu pē ‘a e anga na‘a ma fai‘aki ‘ema fakafeangai atu? ‘ikai na‘a ma topuva‘e taha?
19Kuo loa ho‘omou lau, ‘oku mau fakamatala pehē ke mou fakatonuhia kimoutolu. ‘Ā, ko e ‘ao ‘o e ‘Otua ‘oku mau fai ai ‘emau lea, pea ‘oku mau tu‘u ‘ia Kalaisi: ka ko eni, si‘omau ‘ofa‘anga, ko ‘emau ngaahi me‘a kotoa pē ‘oku mo‘omou langa hake. 20He ‘oku te manavahē na‘a ‘iloange te u ‘ilo kimoutolu, ‘i he‘eku a‘u atu, ‘oku mou fai kehe mo e me‘a ‘oku ou tangi ki ai: pea mou ‘ilo ai au foki, ‘oku ‘ikai te u hangē ko e me‘a te mou tangi ki ai. Na‘a ‘iloange ‘e hā ‘iate kimoutolu ha fetu‘usi, ha meheka, ‘a e fe‘ite‘itani, ‘a e fakafelaulauhi, ‘a e fefasitu‘u‘aki, ‘a e fefakakovi‘aki, ‘a e ta‘emīngao, mo e fakamaveuveu. 21‘Io, ‘oku te manavahē na‘a toe fakatōkilalo au ‘e hoku ‘Otua ‘i he‘eku a‘u atu, koe‘uhi ko kimoutolu; pea ‘e ‘a‘aku ke tēngihia ha ni‘ihi ‘iate kinautolu kuo nau taukave ‘enau angahala ko ia, ‘o ‘ikai te nau fakatomala ‘i he anga‘uli, mo e fe‘auaki, mo e pau‘u, ‘a ia na‘a nau fai.
Currently Selected:
Kolinitō 2 12: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
