2 Kal 36
36
Ko e Tu‘i Siuta ko Sihoa‘asi
(2 Tu‘i 23.30-35)
1PEA to‘o ‘e he kakai ‘o tuku‘uta ‘a Sihoa‘asi foha ‘o Siosaia, ‘o nau fakanofo ia ke tu‘i, ke fetongi ‘ene tamai ‘i Selusalema. 2Na‘e uofulu mā tolu ta‘u ‘a Sihoa‘asi ‘i he‘ene kamata pule, pea na‘e tolu māhina ‘ene hau ‘i Selusalema. 3Pea hifo ia ‘e he Tu‘i ‘Isipite ‘i Selusalema, ‘o ne hilifaki ha mo‘ua ki he fonua ko e taleniti siliva ‘e teau mo e taleniti koula ‘e taha. 4Pea na‘e fakanofo ‘e he Tu‘i ‘Isipite hono tokoua ko ‘Īlaiakimi ke pule ki Siuta mo Selusalema, ‘o ne liliu hono hingoa ke Sihoiakimi. Pea puke ‘e Neko hono tokoua ko Sihoa‘asi, ‘o ‘ave ki ‘Isipite.#Sel 22.11-12
Ko e Tu‘i Siuta ko Sihoiakimi
(2 Tu‘i 23.35–24.7)
5Na‘e uofulu mā nima ta‘u ‘a Sihoiakimi ‘i he‘ene kamata pule, pea na‘e hongofulu mā taha ta‘u ‘ene hau ‘i Selusalema; pea ne fai ‘a e me‘a na‘e tau kovi ki he finangalo ‘o Sihova ko hono ‘Otua.#Sel 22.18-19; 26.1-6; 35.1-19 6Pea ‘alu hake ke tau‘i ia ‘e Nepukanesa, ko e Tu‘i Pāpilone, ‘o ne kii‘i ia ke ‘ave ki Pāpilone.#Sel 25.1-38; 36.1-32; 45.1-5; Tān 1.1-2 7Na‘e ‘ave foki ‘e Nepukanesa ki Pāpilone ‘a e nāunau ni‘ihi mei he fale ‘o Sihova, ‘o ne tuku ‘i hono temipale ‘i Pāpilone. 8Pea ko hono toe ‘o e ngāue ‘a Sihoiakimi, mo e ngaahi fakalielia na‘a ne ngaohi, mo e ngaahi me‘a fakalielia na‘e ‘ilo ‘iate ia, kuo tohi kotoa ‘i he Puka ‘o e Ngaahi Tu‘i ‘Isileli mo Siuta: pea na‘e fetongi ia ‘i he pule ‘e hono foha ko Sihoiakini.
Ko e Tu‘i Siuta ko Sihoiakini
(2 Tu‘i 24.8-17)
9Na‘e valu ta‘u#36.9 valu ta‘u; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: taha valu ta‘u (pea vakai kia 2 Tu‘i 24.8). ‘a Sihoiakini ‘i he‘ene kamata pule; pea ko e māhina ‘e tolu mo e ‘aho ‘e hongofulu na‘a ne hau ‘i Selusalema: pea na‘a ne fai ‘a e me‘a na‘e tau kovi ki he finangalo ‘o Sihova. 10Pea ‘i he toe māfana mai ‘a e ta‘u na‘e ‘alu ‘a e fekau ‘a Kingi Nepukanesa, ‘o ‘omi ia ki Pāpilone; pea na‘e ‘omi mo ia ‘a e nāunau mahu‘inga ‘o e fale ‘o Sihova; pea ne fakanofo ‘a Setekaia na‘a ne tokoua ‘aki#36.10 tokoua ‘aki; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: tokoua ‘o ‘ene tamaí. ke pule ki Siuta mo Selusalema.#Sel 22.24-30; 24.1-10; 29.1-2; 37.1; ‘Isi 17.12,13
Ko e Tu‘i Siuta ko Setekaia
(2 Tu‘i 24.18-20; Sel 52.1-3a)
11Na‘e uofulu mā taha ta‘u ‘a Setekaia ‘i he‘ene kamata pule pea na‘e hongofulu mā taha ta‘u ‘ene hau ‘i Selusalema.#Sel 27.1-22; 28.1-17 12Pea fai ‘e ia ‘a e me‘a na‘e tau kovi ki he finangalo ‘o Sihova ko hono ‘Otua. Na‘e ‘ikai te ne fakavaivai ia ‘i he ‘ao ‘o Selemaia, ‘a e palōfita na‘e lea tonu mei he fofonga ‘o Sihova.
Ko e Hamu ‘o Selusalemá
(2 Tu‘i 25.1-21; Sel 52.3-11)
13Na‘a ne angatu‘u foki kia Kingi Nepukanesa, ‘a ia kuo ne fakafuakava ia ‘i he ‘Otua: pea ne fakakekeva hono kia, mo fakafefeka hono loto, ke ‘oua te ne foki kia Sihova ko e ‘Otua ‘o ‘Isileli.#‘Isi 17.15 14Kae‘uma‘ā ko e hou‘eiki kotoa ‘o e kau taula‘eiki mo e kakai, na‘e fakautuutu ‘enau ngāue kovi ‘i he‘enau fai ‘a e ngaahi fakalielia kotoa ‘o e hīteni; pea nau fakalielia‘i ‘a e fale ‘o Sihova kuo ne fakatāpui ‘i Selusalema. 15Pea ko Sihova ko e ‘Otua ‘o honau tupu‘anga na‘a ne fakafai ‘i he‘ene kau talafekau ‘ene tala kiate kinautolu, ‘o ne tu‘u hengihengi hono fekau atu; he na‘a ne ma‘ema‘ekina hono kakai, mo hono ‘afio‘anga: 16ka na‘a nau luma‘i ai pē ‘a e kau talafekau ‘a ‘Elohimi, ‘o nau fakasīkaka‘i ‘ene ngaahi lea, ‘o nau manuki‘i ai pē ‘ene kau palōfita; kae faifai pea hake ‘a e houhau ‘a Sihova ki hono kakai, ‘o ‘ikai toe felave ha me‘a ki ai.
17Ko ia, na‘a ne ‘omi kiate kinautolu ‘a e tu‘i ‘o e Kau Kalitia, ‘a ia na‘a ne tāmate‘i ‘aki ‘a e heletā honau kau talavou ‘i honau fale tapu, ‘o ‘ikai te ne ma‘ema‘ekina ha talavou pe finemui, ha fatutangata pe ha a‘ua‘u: na‘a ne tuku kotoa pē ki hono nima.#Sel 21.1-10; 34.1-5 18Pea ko e nāunau kotoa ‘o e fale ‘o ‘Elohimi, ‘a e lalahi mo e iiki, mo e koloa na‘e tuku ‘i he fale ‘o Sihova, mo e koloa na‘e tuku ‘i he fale ‘o e tu‘i mo hono hou‘eiki; na‘a ne ‘omi kotoa ki Pāpilone. 19Pea na‘a nau tutu ‘a e fale ‘o ‘Elohimi, pea nau laiki ‘a e ‘ā ‘o Selusalema, ‘o nau fakamomofi hono ngaahi palasi, ‘o maumau hono ngaahi nāunau mahu‘inga. 20Pea ko kinautolu kuo hao mei he heletā na‘a ne taki pōpula ki Pāpilone, pea nau nofo hopoate kiate ia mo ‘ene fānau, kae‘oua ke hau ‘a Pēsia. 21Ke fakamo‘oni ‘a e folofola ‘a Sihova na‘e lea‘aki ‘e Selemaia, ke ‘oua ke ma‘u lelei ‘e he fonua hono ngaahi Sāpate;#36.21 hono ngaahi Sāpaté; Ko e lau eni ki he pehē ‘i he Laó ‘oku tapu ke ngoue‘i e kelekelé ‘i he ta‘u hono fitu kotoa pē (vakai kia Lev 25.1-7). he lolotonga ‘ene lala na‘a ne ma‘u Sāpate: kae‘oua ke kakato ha ta‘u ‘e fitungofulu.#Sel 25.11; 29.10
Ko e Fekau ‘e Kōlesi ke Foki ‘a e Kakai Siú ki Honau Fonuá
(‘Ēsela 1.1-4)
22Pea ‘i he ‘uluaki ta‘u ‘o Kōlesi ko e Tu‘i Pēsia,#36.22 Tu‘i Pēsia; Na‘e ma‘u ‘e Kōlesi ‘a e kolo ko Pāpiloné ‘i he ta‘u 539 KM ‘o ne pule ai pē ko e Tu‘i ‘o e pule‘anga Pāpilonia. pea koe‘uhi ke fakamo‘oni ki he folofola ‘a Sihova na‘e lea‘aki ‘e Selemaia, ko ia na‘e ue‘i ‘e Sihova ‘a e laumālie ‘o Kōlesi ko e Tu‘i Pēsia, ‘o ne fanongonongo ‘i hono pule‘anga kotoa, ‘o ne tohi foki, ‘o pehē.
23Ko e folofola eni ‘o Kōlesi Tu‘i Pēsia, Ko Sihova ko e ‘Otua ‘o Langi kuo ne foaki kiate au ‘a e ngaahi pule‘anga kotoa pē ‘o māmani; pea kuo ne na‘ina‘i kiate au ke langa ha fale mo‘ona ‘i Selusalema, ‘a ia ‘oku ‘i Siuta. ‘Ilonga kimoutolu ‘i hono kakai kotoa ‘oku ne ‘atā ke ‘alu ki ai, pea ‘ofa ke kau mo ia ‘a Sihova ko hono ‘Otua.#‘Ais 44.28
Currently Selected:
2 Kal 36: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
