2 Kal 35
35
Ko Hono Kātoanga‘i ‘e Siosaia ‘a e Pāsová
(2 Tu‘i 23.21-23)
1PEA fai ‘e Siosaia ‘i Selusalema ‘a e Pāsova kia Sihova; pea na‘a nau tāmate‘i ‘a e Pāsova ‘i hono ‘aho hongofulu mā fā ‘o e ‘uluaki māhina. 2Pea ne fokotu‘u ‘a e kau taula‘eiki ki honau ngaahi lakanga, ‘o ne lōtaki kinautolu ki he ngāue ‘o e fale ‘o Sihova. 3Pea ne fekau ki he kau Līvai na‘e fakahinohino ‘a e kau ‘Isileli, ‘a e fa‘ahinga kuo tapu kia Sihova, ‘o pehē, Tuku ‘a e ‘A‘ake tapu ki he fale na‘e langa ‘e Solomone foha ‘o Tēvita ko e Tu‘i ‘Isileli; ‘oku ‘ikai ‘amoutolu ke fua ‘i homou uma: ka ko eni, mou ngāue kia Sihova ko homou ‘Otua, pea ki hono kakai ‘Isileli. 4Pea mou tali teuteu ‘o fakatatau ki homou ngaahi ‘ulumotu‘a mo homou ngaahi lakanga, ‘o taau mo e tohi ‘a Tēvita ko e Tu‘i ‘Isileli, mo hono hiki ‘e Solomone ko hono foha.#2 Kal 8.14 5Pea mou tu‘u ‘i he Fale Tapu ke tali ‘a e ngaahi vāhenga ‘ulumotu‘a ‘o homou kāinga ko e ngaahi matakali kehe–‘io, ko ha vāhenga faka‘ulumotu‘a ki hani Līvai. 6Pea mou tāmate‘i ‘a e Pāsova, pea mou toki fakama‘a kimoutolu, pea mou toki teu ki hamou kāinga, ke fai ‘o taau mo e folofola ‘a Sihova na‘e fakafai ‘ia Mōsese.
7Pea na‘e foaki ‘e Siosaia ki he kakai noa, ‘a e fa‘ahinga manu iiki hangē ko e lami mo e ki‘i kosi, ko e ngaahi feilaulau faka-Pāsova–na‘a ne foaki ia ki he kakai kotoa na‘e ‘iloa mai, fe‘unga mo e toko tolu mano, mo e pulu ‘e tolu afe: ko e me‘a ia mei he koloa ‘a e tu‘i. 8Pea ko hono hou‘eiki na‘a nau foaki ki he kakai, ki he kau taula‘eiki, pea ki he kau Līvai, ‘a e me‘a ki he feilaulau-‘ofa.#35.8 ‘Oku fihi. Ko Hilikaia, mo Sākalaia, mo Sīheli, ko e hou‘eiki ‘o e fale ‘o ‘Elohimi, na‘a nau foaki ki he kau taula‘eiki, ki he ngaahi feilaulau faka-Pāsova, ‘a e sipi mo e kosi. 9Ko e ua afe mā onongeau, pea mo e tolungeau‘i pulu ‘a e sipi mo e kosi. Ko Konanaia foki, pea mo Sēmaia mo Nātaniela ko hono kāinga, mo Hasapaia, mo Sī‘eli mo Siosapati, ko e hou‘eiki ‘o e kau Līvai, na‘a nau foaki ki he kau Līvai, ki he ngaahi feilaulau faka-Pāsova, ‘i he fa‘ahinga manu iiki ko e toko nima afe, pea ‘i he fanga pulu ko e toko nimangeau.
10Ko ia na‘e teu ‘a e ngāue, pea na‘e tutu‘u ‘a e kau taula‘eiki ‘i honau tu‘unga, mo e kau Līvai ‘i honau ngaahi lakanga, ‘o hangē ko e tu‘utu‘uni ‘a e tu‘i. 11Pea tāmate‘i ‘e kinautolu ‘a e Pāsova, pea tali ‘e he kau taula‘eiki ‘a e toto mei honau nima, ‘o afuhi ‘aki, kae fohi ‘e he kau Līvai. 12Pea nau ‘ave ‘a e ngaahi feilaulau-mōifua ke tufa ki he ngaahi vāhenga faka‘ulumotu‘a ‘o e ngaahi matakali kehe, ke nau ‘atu ki he ‘Eiki, ‘o hangē ko e me‘a ‘oku tu‘u ‘i he Puka ‘a Mōsese: pea na‘e pehē ‘enau fai ki he fanga pulu. 13Pea na‘e ta‘o ‘a e Pāsova ‘o hangē ko e konisitūtone: pea ko e ngaahi me‘a tapu na‘a nau haka ‘i he ngaahi kapa, mo e ngaahi tikatele, mo e ngaahi tisi, ‘o nau vave ‘aki ki he kakai kotoa pē.#‘Eki 12.8-9 14Pea hili ia na‘a nau teu ma‘anautolu, pea ma‘a e kau taula‘eiki; he ko e kau taula ‘eiki, ko e ha‘a ‘Ēlone, na‘a nau mo‘ua ‘i he ‘atu ‘o e feilaulau-mōifua mo e ngako, ‘o a‘u ki he po‘uli: ko ia na‘e teu ‘e he kau Līvai ma‘anautolu, pea ma‘a e kau taula‘eiki ko e ha‘a ‘Ēlone. 15Pea ko e kau hiva ko e ha‘a ‘Ēsafe na‘a nau tu‘u ‘i honau tu‘unga, ‘o fakatatau ki he tu‘utu‘uni ‘a Tēvita, mo ‘Ēsafe, mo Hēmani, pea mo Situtuni ko e tongafisi ‘a e tu‘i; pea ko e kau le‘o matapā na‘e ‘i he matapā takitaha: na‘e ‘ikai te nau ongosia hiki mei he‘enau potu ngāue; he na‘e teu ma‘anautolu ‘e honau kāinga ko e kau Līvai.#1 Kal 25.1 16Ko ia na‘e mateu ‘a e ngāue kotoa ‘a Sihova ‘i he ‘aho ko ia ke feia ‘a e Pāsova, pea ke ‘atu ‘a e ngaahi feilaulau-mōifua ‘i he funga ‘ōlita ‘o e ‘Eiki, ‘o hangē ko e tu‘utu‘uni ‘a Kingi Siosaia. 17Pea ko e kakai ‘Isileli na‘e ‘iloa mai na‘a nau fai ‘a e Pāsova ‘i he taimi ko ia, pea mo e Kātoanga Tapu-lēvani, ‘o ‘aho fitu.#‘Eki 12.1-20 18Pea talu ‘a e taimi ‘o e palōfita ko Sāmiuela mo e ‘ikai fai ‘i ‘Isileli ha Pāsova hangē ko ia; ‘io, na‘e ‘ikai ha Tu‘i ‘Isileli te ne fai ha Pāsova hangē ko ia na‘e fai ‘e Siosaia, mo e kau taula‘eiki, mo e kau Līvai, mo Siuta kātoa, mo e kau ‘Isileli na‘e ‘iloa mai, pea mo e nofo Selusalema. 19‘I hono hongofulu mā valu ta‘u ‘o e pule ‘a Siosaia na‘e fai ‘a e Pāsova ko ia.
Ko e ‘Osi ‘a e Pule ‘a Siosaiá
(2 Tu‘i 23.28-30)
20Hili ‘a e fu‘u me‘a ko ia, ‘a e sāuni ‘e Siosaia ‘a e Temipale, na‘e ‘alu hake ‘a Neko ko e Tu‘i ‘Isipite ke fai tau ‘i Kalikimisi, ‘a ia ‘oku ne ‘i he ve‘e ‘Eufaletesi; pea hū ki tu‘a ‘a Siosaia ke fakafetaulaki kiate ia. 21Pea tuku mai ‘e ia ha tu‘unga talafekau ki ai, ke lea ‘o pehē, Ko ho hā au, Tu‘i Siuta? Tala‘ehai ko ‘eku tau ni kiate koe, ka ko e ha‘a tu‘i ‘oku ma vāvātau mo au; pea kuo fekau ‘e he ‘Otua ke u fakavave: tu‘u ke ‘atā mo e ‘Otua ‘a ia ‘oku ne kau mo au, ke ‘oua te ne faka‘auha koe. 22Kae ‘ikai fie foki ‘a Siosaia mei he fai mo ia, ka ne fakakehe ia ke ne fai tau mo ia; pea na‘e ‘ikai te ne tokanga ki he ngaahi lea ‘a Neko, ‘a ia na‘e mei he fofonga ‘o e ‘Otua, ‘o ne a‘u atu ki he tele‘a ‘o Mekito ke tau.
23Pea fana‘i ‘e he tau kaufana ‘a Kingi Siosaia; pea pehē ‘e he tu‘i ki he‘ene kau tamaio‘eiki, ‘Ave au; he kuo u kafo lahi. 24Ko ia na‘e ‘ave ia ‘e he‘ene kau tamaio‘eiki mei he sāliote ko ia, ‘o fakaheka ia ki hono ua ‘o e sāliote na‘a ne ma‘u, pea nau fakahā‘ele ia ki Selusalema; pea ne pekia; pea na‘a nau telio ia ‘i he fa‘itoka ‘o ‘ene ngaahi kui, pea na‘e tēngihia ‘a Siosaia ‘e Siuta kātoa mo Selusalema.
25Pea fai ‘e Selemaia ha tangilāulau ‘o Siosaia; pea ko e kau tangata hiva mo e fefine hiva na‘a nau lau kia Siosaia ‘i he‘enau ngaahi tangilāulau, pea ‘oku kei fai. ‘Io, na‘a nau fokotu‘u ia ko e tu‘utu‘uni ki ‘Isileli; pea vakai, kuo tohi ‘a e ngaahi tangi ‘i he Tohi Tangilāulau.
26Pea ko hono toe ‘o e ngāue ‘a Siosaia, mo ‘ene ‘ofa ki he lotu, ‘a ‘ene fai ki he ngaahi me‘a ‘oku tu‘u ‘i he Lao ‘a Sihova; 27‘io, ko ‘ene ngaahi ngāue, ‘a e ‘uluaki mo e kimui, vakai kuo tohi kotoa ‘i he Puka ‘o e Ngaahi Tu‘i ‘Isileli mo Siuta.
Currently Selected:
2 Kal 35: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
