2 Kal 34
34
Ko e Tu‘i Siuta ko Siosaia
(2 Tu‘i 22.1-2)
1NA‘E valu ta‘u ‘a Siosaia ‘i he‘ene kamata pule; pea na‘e tolungofulu mā taha ta‘u ‘ene hau ‘i Selusalema.#Sel 3.6 2Pea fai ‘e ia ‘a e me‘a na‘e hoa mo e finangalo ‘o Sihova, ‘o ne fou ‘i he ngaahi ‘alunga ‘o ‘ene kui ko Tēvita, ‘o ‘ikai te ne afe ki he to‘omata‘u pe ko e to‘ohema.
Ko Hono Fakafepaki‘i ‘e he Tu‘i ko Siosaiá ‘a e Lotu Hītení
3He ‘i he valu ta‘u ‘o ‘ene pule, lolotonga ‘ene kei talavou, na‘a ne kamata ke feinga ki he ‘Otua ‘o ‘ene kui ko Tēvita: pea ‘i hono hongofulu mā ua ta‘u na‘a ne kamata ke fakama‘a ‘a Siuta mo Selusalema mei he ngaahi ‘esi, mo e ngaahi ‘āsela, mo e ngaahi tamapua, mo e ngaahi ‘īmisi. 4Pea na‘a nau laiki ‘i hono ‘ao ‘a e ngaahi ‘ōlita ‘o e kau Peali; pea ko e ngaahi ‘īmisi ‘o La‘a na‘e tu‘u ai mei ‘olunga na‘a ne tā hifo; pea ko e ngaahi ‘āsela, mo e ngaahi ‘īmisi, mo e ngaahi pou tapu na‘a ne laiki ke lailai, ‘o tuki ke efu, ‘o tūtuu‘i ki he ngaahi fa‘itoka ‘o e kakai kuo feilaulau kiate kinautolu.#2 Tu‘i 21.3; 2 Kal 33.3 5Pea ko e ngaahi hui ‘o e kau taula na‘a ne tutu ‘i he funga ‘o e ngaahi ‘ōlita: na‘e pehē ‘ene fakama‘a ‘a Siuta mo Selusalema.#1 Tu‘i 13.2 6Pea pehē ‘ene fai ‘i he ngaahi kolo ‘o Manase, mo ‘Ifalemi, mo Simione, ‘o a‘u ki Nafitalai ‘i honau ngaahi tu‘unga kolo na‘e tu‘utu‘u holo. 7‘Io, na‘a ne laiki ‘a e ngaahi ‘ōlita, pea ne tuki ke efu ‘a e ngaahi ‘ōlita, pea ne tuki ke efu ‘a e ngaahi ‘āsela, mo e ngaahi ‘īmisi, ‘o ne tā hifo ‘a e ngaahi ‘īmisi ‘o La‘a ‘i he fonua kotoa ‘o ‘Isileli, ‘o ne toki foki ki Selusalema.
Ko Hono ‘Ilo ‘o e Tohi Laó
(2 Tu‘i 22.3-20)
8Pea ‘i he hongofulu mā valu ta‘u ‘o ‘ene pule, kuo ‘osi ‘ene fakama‘a ‘a e fonua, mo e Fale, na‘a ne fekau ‘a Sāfani foha ‘o ‘Asialaia, mo Ma‘aseia ko e pule kolo, mo ‘Ioa foha ‘o Sioahasi na‘e ‘a‘ana ‘a e tohi Kalonikali, ke monomono ‘a e fale ‘o Sihova ko hono ‘Otua. 9Pea na‘a nau a‘u kia Hilikaia ko e taula‘eiki lahi, pea na‘a nau ‘ange ‘a e pa‘anga na‘e ‘omi ki he fale ‘o e ‘Otua, ‘a ia kuo tānaki ‘e he kau Līvai na‘e le‘o matapā mei he kau Manase, mo ‘Ifalemi, pea mei he toenga ‘o ‘Isileli, pea mei Siuta kātoa mo Penisimani mo e nofo Selusalema. 10‘Io, na‘a nau tuku ki he nima ‘o e kakai na‘e fai ‘a e ngāue, ‘a kinautolu na‘e angi ‘i he fale ‘o Sihova; pea nau ‘ange ia kiate kinautolu na‘e fai ‘a e ngāue, ‘a ia na‘a nau ngāue ‘i he fale ‘o Sihova, ke monomono ‘a e fale ‘o ngaohi ke mālohi; 11‘io, na‘a nau ‘ange ia ki he kau kapetā, mo e kau langa fale, ke fakatau maka kuo hele, mo e ‘akau ke toka mo lango ‘i he ngaahi fale kuo maumau ‘e he ngaahi Tu‘i Siuta. 12Pea ko e tu‘unga me‘a na‘e ngāue na‘a nau fai mo‘oni: pea ko honau matāpule ko ‘Iahati mo ‘Opataia ko e ongo Līvai mei ha‘a Mēlali; pea ko Sākalaia mo Mēsuilame mei ha‘a Kōhate ke faka‘ai‘ai mo ‘ena kau Līvai, ‘ilonga ‘a kinautolu na‘e poto ‘i he tā me‘a hiva. 13Na‘e fakaongo foki ki ai ‘a e kau fua kavenga, ‘o nau faka‘ai‘ai ‘a kinautolu fua pē na‘e fai lakanga ‘i he ngāue kehekehe. Pea ko e ni‘ihi ‘o e kau Līvai na‘e sikalaipe mo ‘ōfisa mo le‘o matapā.
14Pea ‘i he‘enau fakahū ki tu‘a ‘a e pa‘anga kuo ‘omi ki he fale ‘o Sihova, na‘e ‘ilo ‘e Hilikaia ko e taula‘eiki ‘a e Tohi ‘o e Lao ‘a Sihova na‘e fakafai ‘ia Mōsese. 15Pea tali ‘e Hilikaia kia Sāfani ko e sikalaipe, Kuo u ‘ilo ki he Tohi Lao ‘i he fale ‘o Sihova. Pea ‘ange ‘e Hilikaia ‘a e tohi kia Sāfani. 16Pea ‘ave ‘e Sāfani ‘a e tohi ki he tu‘i, pea na‘a ne fakamatala ki he tu‘i ‘a hono fekau, ‘o pehē, Ko e me‘a kātoa na‘e tuku ki ho‘o kau tamaio‘eiki ke fai, ‘oku nau fai. 17Pea kuo nau lilingi ‘a e pa‘anga na‘e ma‘u ‘i he fale ‘o Sihova, pea kuo nau ‘ange ia ki he kau matāpule, pea ki he kakai ‘oku fai ‘a e ngāue. 18Pea fakapā ‘e he sikalaipe ko Sāfani ki he tu‘i ‘o pehē, ‘Oku ai ha tohi ne ‘omi kiate au ‘e Hilikaia ko e taula‘eiki. Pea lau ai ‘e Sāfani ‘i he ‘ao ‘o e tu‘i.
19Pea ‘i he ongo‘i leva ‘e he tu‘i ‘a e ngaahi lea ‘o e Lao, na‘a ne hae hifo hono kofu. 20Pea fekau ‘e he tu‘i ‘a Hilikaia, mo ‘Ahikami foha ‘o Sāfani, mo ‘Apitoni#34.20 ‘Apitoni; ‘oku tu‘u ‘ia 2 Tu‘i 22.12 ko ‘Akepoa. foha ‘o Maika, mo Sāfani ko e sikalaipe, mo ‘Āsaia ko e tamaio‘eiki ‘a e tu‘i, ‘o pehē, 21Mou ‘alu ‘o huhū kia Sihova koe‘uhi ko au, pea koe‘uhi ko e toenga ‘o ‘Isileli mo Siuta ‘i he ngaahi lea ‘a e tohi kuo ‘ilo: he ‘oku lahi ‘a e houhau ‘a Sihova kuo mahua mai kiate kitautolu, ko e me‘a ‘i he ‘ikai tauhi ‘e he‘etau ngaahi kui ‘a e folofola ‘a Sihova, ke fai ‘o taau mo e ngaahi me‘a kuo tohi ‘i he tohi ni.
22Ko ia na‘e ō ‘a Hilikaia mo kinautolu mei he tu‘i kia Hūlita ko e fefine palōfita, ko e uaifi ‘o Sālumi foha ‘o Tikuati, foha ‘o ‘Āsela, ko e tauhi ‘o e ngaahi kofu; (na‘e nofo ‘a e fefine ‘i Selusalema ‘i Kōlofo‘ou); pea nau alea mo ia ‘o hangē ko ē. 23Pea tali ‘a e fefine kiate kinautolu, Ko eni ‘a e folofola ‘a Sihova ko e ‘Otua ‘o ‘Isileli, Tala ki he tangata na‘e fekau mai kimoutolu kiate au, 24Ko e folofola eni ‘a Sihova, Ko au eni ‘oku ou ‘omi ha kovi ki he potu ni, pea ki he kakai ‘oku nofo ai, ‘a e ngaahi mala ‘oku tu‘u ‘i he tohi ‘a ia kuo lau ‘i he ‘ao ‘o e Tu‘i Siuta: 25ko e totongi ‘o ‘enau li‘aki au, mo ‘enau tutu ‘inisēnisi ki he ngaahi ‘otua kehe, koe‘uhi ke nau langa‘i ‘eku ‘ita ‘i he ngāue kehekehe ‘a honau nima: ko ia, kuo mahua ‘eku houhau ki he potu ni, ‘o ‘ikai matāmate‘i. 26Ka ko e me‘a ki he Tu‘i Siuta ne fekau mai kimoutolu ke huhū ki he ‘Eiki, te mou lea kiate ia, ‘o pehē: Ko e folofola eni ‘a Sihova ko e ‘Otua ‘o ‘Isileli, Koe‘uhi ko e ngaahi me‘a kuo ke fanongo ki ai, 27ko e me‘a ‘i he ongongofua ho loto, mo ho‘o fakavaivai‘i koe ‘i he ‘ao ‘o e ‘Otua, ‘i ho‘o fanongo ki he ngaahi tala na‘a ku fai ki he potu ni, pea ki he kakai ‘oku nofo ai; pea kuo ke fakavaivai koe ‘i hoku ‘ao, pea kuo ke hae hifo ho kofu mo tangi ‘i hoku ‘ao: ko ia ko au foki kuo u ongo‘i koe, ko e tala ia ‘a Sihova mei he Ta‘ehāmai, 28Vakai, te u fakataha koe mo ho‘o ngaahi kui, pea ‘e ‘ave koe ki ho fa‘itoka ‘i he tu‘umālie, pea ‘e ‘ikai sio ho mata ki he ngaahi fu‘u kovi ‘oku ou ‘omi ki he potu ni mo hono kakai.
Pea na‘a nau foki mo e tala ko ia ki he tu‘i.
Ko Hono Fokotu‘u ‘e Siosaia ha Aleapau ‘a e Kakaí mo Sihova ke nau Talangofua Kiate Ia
(2 Tu‘i 23.1-20)
29Toki ‘alu ‘a e fekau ‘a e tu‘i ke tānaki mai ‘a e kau mātu‘a ‘o Siuta mo Selusalema. 30Pea hā‘ele hake ‘a e tu‘i ki he fale ‘o Sihova, mo e kau tangata Siuta, mo e nofo Selusalema, mo e kau taula‘eiki, mo e kau Līvai, ‘io, ‘a e kakai kotoa ko e si‘i mo e lahi: pea ne lau ke ongo kiate kinautolu ‘a e ngaahi tala ‘o e Puka ‘o e Kovinānite, ‘a ia kuo ‘ilo ‘i he fale ‘o Sihova. 31Pea tu‘u ‘a e tu‘i ‘i hono potu,#34.31 ‘i hono potu; Ko hono faka-Hepeluú ia, ka ‘oku ngali tonu ‘a hono hiki ‘o: ‘i he ve‘e pou fakatu‘í (vakai kia 2 Tu‘i 23.3). ‘o ne fai kovinānite ‘i he ‘ao ‘o Sihova, ke angimui ki he ‘Eiki, pea ke tauhi ‘ene ngaahi tu‘utu‘uni, mo ‘ene ngaahi fakamo‘oni, mo ‘ene ngaahi fekau, ‘aki hono loto kotoa mo hono laumālie kotoa, ke fai ‘a e ngaahi lea ‘o e kovinānite ‘oku tohi ‘i he puka ni. 32Pea ne kouna ‘a e kakai kotoa na‘e ‘ilo ‘i Selusalema mo Penisimani ke ‘io ki ai. Pea fai ‘a e nofo Selusalema ‘o taau mo e kovinānite ‘o e ‘Otua, ‘a e ‘Otua ‘o honau tupu‘anga. 33Pea ‘ave ‘e Siosaia ‘a e ngaahi fakalielia kotoa mei he ngaahi fonua na‘e kau ki ha‘a ‘Isileli, ‘o ne kouna ‘a e kakai kotoa na‘e ‘ilo ‘i ‘Isileli ke tauhi ‘a Sihova ko honau ‘Otua. Lolotonga ‘ene mo‘ui na‘e ‘ikai te nau afe mei he angimui kia Sihova ko e ‘Otua ‘o honau tupu‘anga.
Currently Selected:
2 Kal 34: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
