2 Kal 30
30
Ko e Teuteu ki he Pāsova
1PEA ‘alu ‘a e fekau ‘a Hesekaia ki ‘Isileli kātoa mo Siuta, ‘o ne fai tohi foki ki ‘Ifalemi mo Manase, ke nau omi ki he fale ‘o Sihova ‘i Selusalema, ke fai ‘a e Pāsova kia Sihova ko e ‘Otua ‘o ‘Isileli. 2He kuo fakakaukau ‘a e tu‘i mo hono hou‘eiki, mo e fakataha kātoa ‘i Selusalema, ke fai ‘a e Pāsova ‘i hono ua ‘o e māhina. 3He na‘e ‘ikai te nau lava ke fai ia ‘i he taimi ko ē, he kuo te‘eki ke tokolahi ‘a e kau taula‘eiki kuo fakatāpui kinautolu, pea kuo te‘eki ke kātoa mai ‘a e kakai ki Selusalema.#Nōm 9.9-11 4Pea na‘e hā totonu ‘a e me‘a ki he tu‘i mo e fakataha kotoa. 5Ko ia na‘a nau fokotu‘u ha tu‘utu‘uni, ke fanongonongo ‘i ‘Isileli, mei Peasipa ‘o a‘u ki Tani, ke nau omi ki Selusalema ke fai ai ‘a e Pāsova kia Sihova ko e ‘Otua ‘o ‘Isileli: he kuo fuoloa mo e ‘ikai te nau fai ia ‘o hangē ko e tohi.#30.5 ‘Oku toe hiki: fai tokolahi. 6Ko ia na‘e lele ‘a e kau talafekau, ‘o ‘ave ‘a e ngaahi tohi ‘a e tu‘i mo e hou‘eiki ki ‘Isileli kotoa mo Siuta, pea hangē ko e tu‘utu‘uni ‘a e tu‘i na‘a nau tala, ‘o pehē, Ha‘a ‘Isileli ē, foki mai kia Sihova ko e ‘Otua ‘o ‘Epalahame, ‘Aisake, mo ‘Isileli, ke ne foki mai ‘e ia ki homou toe kuo hao mei he nima ‘o e ngaahi Tu‘i ‘Āsilia.
7Pea ‘oua te mou hangē ko ho‘omou ngaahi kui mo homou kāinga, ‘a ia na‘a nau hia kia Sihova ko e ‘Otua ‘o honau tupu‘anga, ‘a ē ā na‘a ne tukuange ai kinautolu ke fai ai ha ofo, ‘o hangē ko ia ‘oku mou sio ki ai. 8Ko ia ‘oua te mou kia kekeva hangē ko ho‘omou ngaahi kui, kae ‘atu homou nima kia Sihova, pea mou hū ki hono fale tapu, ‘a ia kuo ne fakatāpui ‘o ta‘engata, pea mou tauhi ‘a Sihova ko homou ‘Otua, kae hiki hono houhau kakaha meiate kimoutolu. 9He kapau te mou foki kia Sihova, pea ko homou kāinga mo ho‘omou fānau te nau ‘ofeina ‘i he kakai na‘e taki pōpula kinautolu, pea te nau foki ki he fonua ni: he ‘oku angalelei mo ‘alo‘ofa ‘a Sihova ko homou ‘Otua, pea ‘e ‘ikai te ne hanga kehe meiate kimoutolu, ‘o kapau te mou foki kiate ia.
10Ko ia, na‘e lele atu ‘a e kau talafekau mei he kolo ki he kolo ‘i he fonua ‘o ‘Ifalemi mo Manase, ‘o a‘u atu ki Sepulone: ka na‘a nau kata mai ki ai, mo nau manuki pē. 11Ka na‘e ai ha tu‘unga me‘a mei ‘Āseli mo Manase mo Sepulone na‘a nau fakavaivai‘i kinautolu, ‘o omi ki Selusalema. 12‘I Siuta foki na‘e ‘i ai ha kau ‘a ‘Elohimi ke nau uouangataha, ‘o fai ‘a e tu‘utu‘uni ‘a e tu‘i mo e hou‘eiki ‘i he funga ‘o e folofola ‘a Sihova.
Ko Hono Kātoanga‘i ‘o e Pāsová
13Pea na‘e fakataha ki Selusalema ha kakai lahi, ke fai ‘a e kātoanga Tapu-lēvani ‘i hono ua ‘o e māhina–ko e fu‘u fakataha lahi ‘aupito. 14Pea nau tutu‘u, ‘o ‘ave ‘a e ngaahi ‘ōlita na‘e ‘i Selusalema; pea ko e ngaahi fai‘anga ‘inisēnisi kotoa pē na‘a nau ‘ave, ‘o lī ki he vaitafe ko Kitiloni. 15Pea nau toki tāmate‘i ‘a e Pāsova ‘i hono hongofulu mā fā ‘i hono ua ‘o e māhina; pea na‘e mā ‘a e kau taula‘eiki mo e kau Līvai, ‘o nau fakatāpui kinautolu, ‘o nau ‘omi feilaulau-mōifua ki he fale ‘o Sihova. 16Pea nau tu‘u takitaha ‘i hono tu‘unga mo hono hokohoko hangē ko e lao ‘a Mōsese ko e tangata ‘o ‘Elohimi: na‘e tali ‘e he kau taula‘eiki ‘a e toto mei he nima ‘o e kau Līvai, ‘o nau afuhi ‘aki. 17He ko e tokolahi ‘i he fakataha kuo te‘eki fakatāpui kinautolu, ko ia na‘e ‘a e kau Līvai ‘a e tāmate‘i ‘o e Pāsova ma‘a e kakai na‘e ‘ikai ma‘a, ke fakatāpui kinautolu kia Sihova. 18‘Io, ko e tokolahi ‘o e kakai–ko e tokolahi mei ‘Ifalemi mo Manase, mei ‘Īsaka mo Sepulone–kuo te‘eki ke fakama‘a kinautolu, ka nau kai pē ‘a e Pāsova, neongo na‘e fehālaaki mo e me‘a na‘e tohi. He na‘e hufekina kinautolu ‘e Hesekaia he‘ene pehē, 19Ke fakamolemole mai ‘e he ‘Eiki Lelei ‘a ia fua pē ‘oku ne ‘ai hono loto ke feinga kia ‘Elohimi, kia Sihova ko e ‘Otua ‘o hono tupu‘anga, neongo ‘oku ‘ikai te ne a‘usia ‘a e fakama‘a ‘oku taau mo e fale tapu. 20Pea tali ‘e Sihova ‘a Hesekaia, ‘o ne faito‘o ‘a e kakai. 21Pea ko ha‘a ‘Isileli na‘e fakatefua ki Selusalema na‘a nau fai ‘a e kātoanga Tapu-lēvani mo e fiefia lahi, ‘o ‘aho fitu: pea fai ‘e he kau Līvai mo e kau taula‘eiki ‘a e Halelu‘ia ‘i he ‘aho kotoa pē, ‘o nau fai ki he ‘Eiki mo e ngaahi me‘alea le‘o lahi.#30.21 mo e… lahi; Ko hono faka-Hepeluú ia, ka ‘oku ngali tonu hono hiki ‘o: ‘aki honau iví kotoa. 22Pea na‘e fakamālō ‘e Hesekaia ‘a e kau Līvai na‘e poto lelei ‘i he tauhi kia Sihova. Ko ia na‘a nau kai ‘a e kātoanga, ‘o ‘aho fitu; ‘o nau feia ‘a e ngaahi feilaulau-‘ofa, ‘o vete honau loto kia Sihova ko e ‘Otua ‘o honau tupu‘anga.
Ko Hono Toe Hoko Atu ‘a e Kātoangá
23Pea alea ‘a e fu‘u fakataha ke fai mo e fitu‘i ‘aho: pea nau fai fiefia mo e ‘aho ‘e fitu ko ia. 24He ko Hesekaia Tu‘i Siuta na‘a ne foaki ki he fakataha ha afe‘i pulu mo e sipi ‘e toko fitu afe ke feilaulau ‘aki; pea ko e hou‘eiki na‘a nau foaki ki he fakataha ha afe‘i pulu mo e mano‘i sipi: pea ko e kau taula‘eiki kuo nau fakatāpui kinautolu ‘o tokolahi. 25Pea na‘e fefiefia‘i ‘a e fakataha kātoa ‘o Siuta, mo e kau taula‘eiki mo e kau Līvai, mo e fu‘u fakataha na‘e omi mei ‘Isileli, mo e kakai muli na‘e ha‘u mei he fonua ‘o ‘Isileli, mo kinautolu na‘e nofo ‘i Siuta. 26Ko ia, na‘e lahi ‘a e fiefia ‘i Selusalema; he talu ‘a e taimi ‘o Solomone foha ‘o Tēvita ko e Tu‘i ‘Isileli kuo te‘eki ha me‘a pehē ‘i Selusalema. Pea tutu‘u ‘a e kau Līvai taula‘eiki. 27Pea nau tāpuaki‘i ‘a e kakai: pea na‘e ongona honau le‘o, pea na‘e a‘u hake ‘enau hū ki he ‘afio‘anga toputapu ‘o e ‘Āfifio–‘io, ki langi.
Currently Selected:
2 Kal 30: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
