2 Kal 31
31
Ko e Fakalelei Lotu ‘a Hesekaia
1PEA kuo ‘osi ‘a e ngaahi me‘a ko ia, pea hū ki tu‘a ‘a e kau ‘Isileli na‘e ‘ilo ai ki he ngaahi kolo ‘o Siuta, ‘o nau laiki ‘a e ngaahi pou, mo taa‘i ‘a e ngaahi ‘āsela, mo holoki ‘a e ngaahi ‘esi mo e ngaahi ‘ōlita ‘i Siuta kātoa mo Penisimani mo ‘Ifalemi mo Manase, ke ‘osi‘osingamālie. Pea na‘e toki foki ‘a ha‘a ‘Isileli kātoa takitaha ki hono tofi‘a ‘i honau ngaahi kolo.
2Pea na‘e fokotu‘u ‘e Hesekaia ‘a e ngaahi lakanga taula‘eiki mo Līvai hokohoko, takitaha ‘o fakatatau ki he‘ene ngāue; ‘a e kau taula‘eiki mo e kau Līvai foki ki he ngaahi feilaulau-mōifua mo e ngaahi feilaulau-‘ofa, ki he ngaahi lakanga-tauhi, mo e fai ‘o e fakafeta‘i mo e halelu‘ia ‘i he ngaahi matanikolo ‘o e ‘apitanga ‘o Sihova. 3Na‘a ne tu‘utu‘uni foki ‘a e me‘a ‘e vahe mei he koloa ‘a e tu‘i ki he ngaahi feilaulau-mōifua, ki he feilaulau pongipongi mo e efiafi, pea ki he feilaulau ‘o e Sāpate, mo e fakamāhina-fo‘ou, mo e ngaahi kātoanga tu‘utu‘uni, ‘o taau mo ia na‘e tohi ‘i he Lao ‘a Sihova.#Nōm 28.1–29.39
4Na‘a ne fekau foki ki he nofo Selusalema ke ‘ange ‘a e ‘inasi ‘o e kau taula‘eiki mo e kau Līvai, koe‘uhi ke nau nofo ki he Lao ‘a Sihova.#Nōm 18.12-13,21 5Pea ‘i he mafola leva ‘a e fekau, na‘e hanga ‘a ha‘a ‘Isileli ‘o fetuku mai ke lahi ‘a e polopolo ‘o e ta‘u uite, mo e uaine, mo e lolo, mo e honi, mo e fua kotoa ‘o e vao; pea nau ‘omi ke lahi ‘a e tukuhau hongofulu#31.5 polopolo… tukuhau hongofulu; Ko e polopoló ma‘á e kau taula‘eikí, pea ko e tukuhau [vahe] hongofulú ma‘á e kau Līvaí (vakai kia Nōm 18). ‘o e me‘a kotoa. 6Pea ko ha‘a ‘Isileli mo Siuta na‘e nofo ‘i he ngaahi kolo ‘o Siuta, na‘e ‘omi ‘e kinautolu foki ‘a e tukuhau hongofulu ‘o e pulu mo e sipi, mo e tukuhau hongofulu ‘o e ngaahi me‘a tapu kuo nau fakatāpui kia Sihova ko honau ‘Otua, pea nau fokotu‘u tu‘unga. 7‘I hono tolu ‘o e māhina na‘a nau kamata fokotu‘u ‘a e ngaahi tu‘unga, pea ‘i hono fitu ‘o e māhina na‘a nau faka‘osi. 8Pea hā‘ele mai ‘a Hesekaia mo e hou‘eiki, ‘o nau mamata ki he ngaahi tu‘unga, pea nau fakamālō‘ia ‘a Sihova mo hono kakai ‘Isileli. 9Pea huhū ‘e Hesekaia ki he kau taula‘eiki mo e kau Līvai ‘i he ngaahi tu‘unga. 10Pea tali ki ai ‘a ‘Asalaia ko e taula‘eiki lahi na‘e kau ki he fale ‘o Sātoki, ‘o ne pehē, Talu e kamata ‘omi ki he fale ‘o Sihova ‘a e ngaahi me‘a hapai, kuo mau kai ‘o fiu, pea ‘oku toe lahi; he kuo tāpuaki‘i ‘e Sihova ‘a hono kakai; pea ko e toenga ‘oku toe ko e fu‘u me‘a ni.
11Pea fekau ‘e Hesekaia ke teuteu ‘ani loki ‘i he fale ‘o Sihova; pea nau fai. 12Pea nau fakahū ki ai ‘a e me‘a kuo hapai, mo e tukuhau hongofulu, mo e ngaahi me‘a kuo fakatāpui, ‘o nau fai tōnunga ai: pea na‘e pule ki ai ‘a e Līvai ko Konanaia, pea hoko ai hono toko ua ko Simi. 13Pea ko Sīheli, mo ‘Asasaia, mo Nāhati, mo ‘Asaeli, mo ‘Ilimoti, mo Siosapati, mo ‘Eliela, mo ‘Isamakaia, mo Māhati, mo Penaia, ko e kau matāpule ia na‘e fakaongo kia Konanaia mo hono tokoua ko Simi, ‘i he tu‘utu‘uni ‘a Hesekaia ko e tu‘i mo ‘Asalaia ko e pule ‘o e fale ‘o ‘Elohimi. 14Pea ko Kole foha ‘o Simina ko e Līvai, ko e le‘o matapā ‘o hahake, na‘e pule ia ki he ngaahi me‘a‘ofa ‘ata‘atā na‘e ‘omi kia ‘Elohimi, ke tufa ‘a e ngaahi me‘a na‘e hapai kia Sihova mo e ngaahi me‘a toputapu. 15Pea na‘e fakaongo kiate ia ‘a ‘Īteni, mo Miniamini, mo Sisua, mo Sēmaia, mo ‘Amalaia, mo Sekonaia, na‘a nau ‘i he ngaahi kolo ‘a taula‘eiki, pea na‘e tu‘anaki kinautolu ke tufa ki honau kāinga, ‘o fakaai honau ngaahi lakanga, ‘o tatau ‘a e lahi mo e si‘i– 16tukukehe ‘a kinautolu na‘e tu‘u ‘i he tohi ‘o e kau tangata, ‘o kamata mei he tolu ta‘u,#31.16 tolu ta‘u; Ko hono faka-Hepeluú ia, ka ‘oku ngali tonu hono hiki ‘o: tolungofulu ta‘u. ‘o fai hake, ‘io, ‘a ia fua pē na‘e hū ki he fale ‘o Sihova ki he me‘a ‘o e ‘aho ‘i hono ‘aho, ki he ngaahi ngafa ‘o e ngāue tauhi ‘i he ngaahi lakanga; 17(pea ko e tohi kakai ‘o e kau taula‘eiki na‘e fai ‘i he fāmili ‘o honau ‘ulumotu‘a, pea ko e kau Līvai na‘e kamata mei he uofulu ta‘u ‘o fai hake ‘i he fai ‘enau ngāue tauhi ‘i he ngaahi lakanga) 18pea ki he tamaiki mo e uaifi mo e ngaahi foha mo e ngaahi ‘ōfefine ‘o kinautolu na‘e tu‘u ‘i he tohi kakai, ‘io, ki he fakataha kātoa; he ‘i he fai ‘o e me‘a na‘e tu‘anaki ‘aki kinautolu na‘a nau hā tāpuhā ‘i he me‘a ‘oku tapu. 19Pea ki he hako ‘o ‘Ēlone ko e kau taula‘eiki na‘e ‘i he vao takatakai ki honau kolo, na‘e ‘i ai ha kau tangata ‘i he kolo takitaha, na‘e lau honau hingoa ke tufa ‘inasi ki he tangata kotoa ‘i he kau taula‘eiki, pea ki he kau Līvai kotoa na‘e tu‘u ‘i he tohi kakai.
20Pea na‘e fai hangē ko ia ‘a Hesekaia ‘i Siuta kātoa, ‘io, na‘a ne fai ‘a e me‘a na‘e lelei mo totonu mo mo‘oni ‘i he ‘ao ‘o Sihova ko hono ‘Otua. 21Pea ‘i he ngāue kotoa pē na‘a ne kamata ke fai ‘i he tauhi ‘o e fale ‘o ‘Elohimi, pea ‘i he lao mo e tu‘utu‘uni, he ha‘ao kia ‘Elohimi, na‘a ne fai‘aki hono loto kotoa, ‘o ne tu‘umālie.
Currently Selected:
2 Kal 31: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
