2 Kal 29
29
Ko e Tu‘i Siuta ko Hesekaia
(2 Tu‘i 18.1-3)
1NA‘E kamata pule ‘a Hesekaia kuo ne uofulu mā nima ta‘u; pea na‘e uofulu mā hiva ta‘u ‘ene hau ‘i Selusalema; pea ko e hingoa ‘o ‘ene fa‘ē ko ‘Āpaia, ko e ‘ōfefine ‘o Sākalaia. 2Pea fai ‘e ia ‘a e me‘a na‘e hoa mo e finangalo ‘o Sihova, hangē tofu pē ko e fai ‘e he‘ene kui ko Tēvita.
3Pea hanga ‘e he‘ene ‘afio ‘i he ‘uluaki ta‘u ‘o ‘ene pule, mo e ‘uluaki māhina, ‘o ne fakaava ‘a e ngaahi matapā ‘o e fale ‘o Sihova, ‘o ne ngaohi ia. 4Pea ne fakahū mai ‘a e kau taula‘eiki mo e kau Līvai, ‘o ne fakataha kinautolu ‘i ke mala‘e ki hahake, ‘o ne folofola kiate kinautolu, 5Kau Līvai, mou fanongo mai; mou fakama‘a kimoutolu mu‘a, pea mou fakama‘a ‘a e fale ‘o Sihova ko e ‘Otua ‘o homou tupu‘anga; pea fetuku kitu‘a ‘a e ‘uli mei he Potu Tapu. 6He na‘e hia ‘etau ngaahi kui, ‘o nau fai ‘a e me‘a na‘e tau kovi ki he finangalo ‘o Sihova ko hotau ‘Otua, pea na‘a nau li‘aki ia, mo hanga kehe mei he ‘afio‘anga ‘o Sihova, ‘o sītu‘a ki ai. 7Na‘a nau tāpuni foki ‘a e ngaahi matapā ‘o e hū‘anga, mo tāmate‘i ‘a e ngaahi maama; pea ko e ‘inisēnisi na‘e ‘ikai te nau tutu, pea ko e feilaulau-mōifua na‘e ‘ikai te nau ‘atu ‘i he Potu Tapu ki he ‘Otua ‘o ‘Isileli. 8Ko ia, na‘e tō ki Siuta mo Selusalema ‘a e houhau ‘o Sihova, pea ne tuku kinautolu ke tekatali ‘aki, ko e me‘a ke fai ai ha ofo, mo ha faka‘ise‘isa, hangē ko ia ‘oku mou lolotonga sio ki ai homou mata. 9He vakai, ko ‘etau mātu‘a kuo tō ‘i he heletā, pea ko hotau ngaahi foha, mo hotau ngaahi ‘ōfefine, mo hotau ngaahi uaifi kuo taki pōpula koe‘uhi ko ia.
10Pea ko eni ‘oku ‘i hoku loto ke fai ha kovinānite mo Sihova ko e ‘Otua ‘o ‘Isileli, ke foki meiate kitautolu ‘a e kakaha ‘o hono houhau. Nga‘ata, ‘oua foki te mou fakapikopiko; 11he kuo fili kimoutolu ‘e he ‘Eiki ke taka ‘i hono ‘ao, ke fai hono tauhi; ‘io, ke mou hoko ko ‘ene kau tauhi, mo ‘ene kau tutu ‘inisēnisi.
12Toki tutu‘u ‘a e kau Līvai, ‘a Māhati foha ‘o ‘Amasai, mo Sioeli foha ‘o ‘Asalaia, ko kinaua mei ha‘a Kōhate: pea mei ha‘a Mēlali, ‘a Kisi foha ‘o ‘Āpeti, mo ‘Asalaia foha ‘o Sihaleleli: pea mei ha‘a Kēsoni, ‘a ‘Ioa foha ‘o Sima, mo ‘Īteni foha ‘o ‘Ioa. 13Pea mei ha‘a ‘Elisafani, ‘a Sīmeli mo Siueli: pea mei ha‘a ‘Ēsafe, ‘a Sākalaia mo Matanaia: 14pea mei ha‘a Hēmani, ‘a Sehueli mo Simi: pea mei ha‘a Situtuni, ‘a Sēmaia mo ‘Osieli.
15Pea na‘a nau fakataha honau kāinga, ‘o nau fakama‘a‘i kinautolu, ‘o nau toki hū ke fakama‘a ‘a e fale ‘o Sihova, ‘o hangē ko e tu‘utu‘uni ‘a e tu‘i ‘i he funga ‘o e folofola ‘a Sihova.#29.15 ‘o nau toki hū… ‘a Sihova; pe pea nau talangofua ki he tu‘utu‘uni ‘a e tu‘í ‘o nau hū ke fakama‘a ‘a e fale ‘o Sihová, ‘o hangē ko e Lao ‘a Sihová. 16Pea hū ‘a e kau taula‘eiki ki he potu lotoloto ‘o e fale ‘o Sihova ke fakama‘a ia: pea nau fetuku kitu‘a, ki he loto‘ā ‘o e fale ‘o Sihova, ‘a e ‘uli kehekehe na‘e ma‘u ‘i he temipale ‘o Sihova. Pea na‘e tali ia ‘e he kau Līvai ke fetuku kitua‘ā ki he vaitafe ki Kitiloni.
17Pea ko e ‘uluaki ‘aho ‘o e ‘uluaki māhina na‘a nau kamata ai hono fakatāpui, pea ‘i hono ‘aho valu ‘o e māhina ko ia kuo nau a‘u ki he fale hū‘anga ‘o Sihova; pea nau fakatāpui ‘a e fale ‘o Sihova, ‘o ‘aho valu: pea ‘i hono ‘aho hongofulu mā ono ‘o e ‘uluaki māhina kuo ‘osi.
Ko Hono Toe Fakatāpui ‘o e Temipalé
18Pea nau toki hū ki fale kia Kingi Hesekaia, ‘o nau fakatau folofola hake, Kuo mau fakama‘a kotoa ‘a e fale ‘o Sihova, mo e ‘ōlita tutu‘anga feilaulau, mo hono nāunau kotoa, pea mo e tēpile mā fono mo hono nāunau kotoa. 19Ko e ngaahi nāunau foki ne tuku li‘aki ‘e ‘Āhasi lolotonga ‘ene pule, he taimi na‘a ne fai angahala ai, kuo mau teuteu mo fakatāpui, pea ‘oku nau kātoa hena ‘i he mata ‘ōlita ‘o Sihova.
20Pea tu‘u hengihengi hake ‘a Kingi Hesekaia, ‘o ne fakataha ‘a e hou‘eiki ‘o e kolo, ‘o ‘alu hake ki he fale ‘o Sihova. 21Pea nau ‘omi ha fitu‘i pulu, mo ha fitu‘i sipi tangata, mo ha fitu‘i lami, mo ha fitu‘i kosi tangata mo feilaulau-angahala ma‘a e pule‘anga, pea ma‘a e fale tapu, pea ma‘a Siuta. Pea ne fekau ki ha‘a ‘Ēlone taula‘eiki ke feia ia ‘i he ‘ōlita ‘o Sihova. 22Ko ia na‘a nau tāmate‘i ‘a e fanga pulu, pea tali ‘a e toto ‘e he kau taula‘eiki, ‘o nau afuhi ‘aki ‘a e ‘ōlita: pea nau tāmate‘i ‘a e fanga sipi tangata, ‘o nau afuhi ‘aki ‘a e ‘ōlita hono toto ‘o‘ona: na‘a nau tāmate‘i foki ‘a e fanga lami, ‘o nau afuhi ‘aki ‘a e ‘ōlita hono toto ‘o‘ona. 23Pea nau ‘unuaki mai ‘a e fanga kosi tangata mo feilaulau-angahala ki he ‘ao ‘o e tu‘i mo e fakataha; pea nau hilifaki honau nima ki ai: 24pea na‘e tāmate‘i kinautolu ‘e he kau taula‘eiki, pea nau feia ‘aki ‘a e toto ‘i he ‘ōlita ha feilaulau angahala ko e fai ha fakalelei ma‘a ‘Isileli kātoa: he na‘e fekau ‘a e tu‘i ke fai ma‘a hono kotoa ‘o ‘Isileli ‘a e feilaulau-mōifua mo e feilaulau-angahala.
25Pea ne fokotu‘u ‘a e kau Līvai ‘i he fale ‘o Sihova ‘oku nau fakasimipale, fakahelefilo mo fakaha‘ape, ‘o taau mo e tu‘utu‘uni ‘a Tēvita, mo Kata ko e tongafisi ‘a e tu‘i, mo Nētane ko e palōfita: he ko e tu‘utu‘uni na‘e meia Sihova ‘o fakafai ‘i he‘ene kau palōfita. 26Pea tutu‘u ‘a e kau Līvai mo e nāunau ‘a Tēvita, pea ko e kau taula‘eiki ‘oku nau fakatalupite. 27Pea tala ‘e Hesekaia ke feia ‘a e feilaulau-mōifua ‘i he ‘ōlita. Pea ‘i he kamata leva hono fai na‘e kamata foki ‘a e hiva ‘o Sihova, pea ha‘aki mo e ngaahi talupite mo e nāunau ‘a Tēvita ko e Tu‘i ‘Isileli. 28Pea ko e fu‘u fakataha ē ‘oku nau hū, pea ko e kau hiva ē ‘oku nau hiva, pea ko e kau ifi ē ‘oku nau ifi talupite; ‘o fai atu kotoa ke ‘osi ‘a e feilaulau-mōifua. 29Pea ‘i he ‘osi leva hono fai, na‘e tū‘ulutui ‘a e tu‘i mo kinautolu kotoa na‘e ‘i ai, ‘o nau hū. 30Pea fekau ‘e Kingi Hesekaia mo e hou‘eiki ke hiva halelu‘ia ‘a e kau Līvai, ‘o fai‘aki ‘a e ngaahi lea ‘a Tēvita mo ‘Ēsafe tongafisi. Pea na‘a nau fai fiefia ‘a e halelu‘ia, ‘o nau tulolo ‘o hū.
31Pea tali ‘e Hesekaia, ‘o ne folofola ange, Ko eni kuo mou fakatāpui kimoutolu ki he ‘Eiki, mou ‘unu‘unu mai, ‘o ‘omi feilaulau mo e me‘a fakafeta‘i ki he fale ‘o Sihova. Pea na‘e ‘omi feilaulau ‘e he fakataha, mo e me‘a fakafeta‘i; pea ‘ilonga kinautolu na‘e vēkeveke fai na‘a nau ‘omi feilaulau-mōifua. 32Pea ko e lau ‘o e feilaulau-mōifua na‘e ‘omi ‘e he fakataha ko e pulu ‘e fitungofulu, ko e sipi tangata ‘e teau, ko e lami ‘e uangeau: ko e ‘omi kotoa ia mo feilaulau-mōifua kia Sihova. 33Pea ko e ngaahi me‘a ne fakatāpui, ko e pulu ‘e onongeau, mo e sipi ‘e tolu afe. 34Ka na‘e toko si‘i fau ‘a e kau taula‘eiki, ‘o ‘ikai te nau lava ke fohi ‘a e feilaulau-mōifua kotoa, ko ia na‘e tokoni kiate kinautolu ‘e honau kāinga Līvai, kae‘oua ke ‘osi ‘a e ngāue, pea ‘oua ke ‘osi ‘a e kau taula‘eiki ‘enau fakatāpui kinautolu: he na‘e hulu ‘a e lototō ‘a e kau Līvai ‘i he fai honau fakatāpui ‘i ha‘a taula‘eiki. 35Kae‘uma‘ā foki na‘e fu‘u lahi ‘a e feilaulau-mōifua, mo e ngako ‘o e feilaulau-‘ofa, mo e ngaahi kava ‘o e feilaulau-mōifua. Ko ia na‘e fokotu‘u ‘a e ngāue ‘o e fale ‘o Sihova ke maau.
36Pea na‘e fiefia ‘a Hesekaia, pea mo e kakai kotoa, ‘i he teuteu kuo fai ‘e ‘Elohimi ma‘a e kakai: he na‘e fakafokifā pē ‘a e me‘a.
Currently Selected:
2 Kal 29: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
