Tīmoté 1 4
4
Ko e Hē ‘a e Ni‘ihi
1KA ‘oku folofola fakapatonu mai ‘e he Laumālie, ‘o pehē, ‘E hiki ha ni‘ihi mei he totonu ‘o e lotu ‘i he ngaahi kuonga ‘amui, he‘enau nofo ki he ngaahi fa‘ahikehe fakahala, mo e ngaahi tokāteline ‘a e kau tēvolo: 2ko e me‘a ‘i he fakamatamatalelei ‘a e kakai ‘oku lea loi, ‘a e kakai kuo tā faka‘ilonga ho‘onautolu konisēnisi, 3‘a e kakai ‘oku nau tapui ‘a e mali, ‘o fekau ke faka‘ehi‘ehi mei he ngaahi fa‘ahinga me‘akai, ‘a ia ko e ngaahi me‘a na‘e ngaohi ‘e he ‘Otua ma‘a e kakai ‘oku tui mo ‘ilo kānokano ki he mo‘oni, ke nau kai mo e fakafeta‘i. 4He ‘ilonga ha me‘a kuo ngaohi ‘e ke ‘Otua ‘oku lelei ia, pea ‘oku ‘ikai ha me‘a ke li‘aki, kapau ‘e ma‘u mo e fakafeta‘i: 5koe‘uhi kuo hoko ko e me‘a mā‘oni‘oni he folofola ‘a e ‘Otua mo e hūfia.
Ko e Fai Fatongia ‘Aonga Ma‘a Kalaisí
6Kapau te ke enginaki ‘a e ngaahi me‘a ni ki he kāinga, te ke hoko ko e faifekau lelei ‘a Kalaisi Sīsū, ‘i ho‘o fakamaheni ai pē koe ‘i he ngaahi tala fakalotu, pea mo e ngaahi fakamatala ‘o e tokāteline lelei na‘a ke ako fakatotolo ki ai. 7Ka ko e ngaahi tala tupu‘a fakaetangata na mo fakafinemātu‘a, fakafisi koe ki ai: ka ke ngaohi koe ke anga ki he lotu mo‘oni. 8He ko e ngaohi ‘o e sino ‘oku ‘aonga ki ha me‘a si‘i pē, ka ko e lotu mo‘oni ‘oku ‘aonga ki he me‘a kotoa pē; he ‘oku ne ma‘u tala‘ofa ki he mo‘ui ko eni, pea mo ia ka hoko mai. 9‘Oku mo‘oni ‘a e lea pea taau ke tali ‘e he loto kotoa. 10He ko e me‘a ia ‘oku tau fakafitefita‘a ki ai mo tau,#4.10 ‘oku tau… tau; ‘Oku pehē ‘i hono ngaahi hiki fuoloa ‘e ni‘ihi: ‘oku fehi‘anekina ai kitautolú. koe‘uhi kuo tu‘u ‘etau falala ki he ‘Otua Mo‘ui, ‘a ia ko e Fakamo‘ui ‘o e kakai kotoa pē, kae lahi kiate kinautolu ‘oku tui.
11Ke ke tu‘utu‘uni ‘a e ngaahi me‘a ni mo ako‘aki. 12‘Oua na‘a tuku ke fakasīkaka‘i koe ‘e ha taha ko ho‘o talavou; kaekehe ke ke hoko ko e toko taha ke fa‘ifa‘itaki ki ai ‘e he kakai lotu, ‘i he lea, ‘i he ‘ulungāanga, ‘i he ‘ofa, ‘i he tui, ‘i he anga ma‘a. 13Nofo ki he lau lēsoni, mo e fai ha tokoni, mo e faiako, kae‘oua ke u ‘alu atu. 14‘Oua na‘a ke tuku noa pē ‘a e mafai ‘oku ‘iate koe, ‘a ia na‘e foaki kiate koe ‘i he palofisai mo e hilifaki nima ‘e he kau Faifekau. 15Ke ke mamafa ki he ngaahi me‘a ko ia; ke ke ngāue ki he ngaahi me‘a ko ia; koe‘uhi ke hā ki he kakai kotoa ho‘o laka ki mu‘a. 16Lamalama kiate koe mo e me‘a ‘oku ke ako‘aki: ke ke nofo‘aki fai ‘a e ongo me‘a ko ia; he ‘i ho‘o fai pehē, te ke fakamo‘ui koe mo kinautolu foki ‘oku fanongo kiate koe.
Currently Selected:
Tīmoté 1 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
